«ق.مۇحامەدحانوۆ اتىنداعى ءبىلىم جانە مادەنيەت ورتالىعى» قوعامدىق قورىنىڭ ۇيىمداستىرۋىمەن الماتى قالاسى ىشكى ساياسات باسقارماسىنىڭ قولداۋىمەن قازاقتىڭ اقىن-سازگەرلەرىنىڭ شىعارماشىلىعىندا ايشىقتالعان كەلەلى ويلار مەن رۋحاني قۇندىلىقتاردى جاس ۇرپاقتىڭ بويىنا سىڭىرۋگە باعىتتالعان «دالا داۋىلپازدارى» اتتى ءداستۇرلى ءان كەشى ءوتتى.
«ق.مۇحامەدحانوۆ اتىنداعى ءبىلىم جانە مادەنيەت ورتالىعى» قوعامدىق قورىنىڭ ۇيىمداستىرۋىمەن الماتى قالاسى ىشكى ساياسات باسقارماسىنىڭ قولداۋىمەن قازاقتىڭ اقىن-سازگەرلەرىنىڭ شىعارماشىلىعىندا ايشىقتالعان كەلەلى ويلار مەن رۋحاني قۇندىلىقتاردى جاس ۇرپاقتىڭ بويىنا سىڭىرۋگە باعىتتالعان «دالا داۋىلپازدارى» اتتى ءداستۇرلى ءان كەشى ءوتتى.
بۇل كەشتە ابايدىڭ, اسەتتىڭ, بالۋان شولاقتىڭ, ەستايدىڭ اندەرى شىرقالدى. حالىق جۇرەگىنەن ورىن العان «كوزىمنىڭ قاراسى», «ايتتىم سالەم قالامقاس», «ءىنجۋ-مارجان», «عاليا», «قورلان», «قۇسني-قورلان» اندەرىندەگى ىڭكار سەزىم ءيىرىمدەرى قانداي جاعداي بولماسىن ادامي قۇندىلىقتاردى ساقتاپ قالۋعا جەتەلەيتىنى ءسوزسىز.
سايات نۇرعازين, ەركىن شۇكىمانوۆ, ارداق يساتاەۆا, نۇرجان جانپەيىسوۆ, تالعات ابۋعازى, جانكەلدى ماياساروۆ, دۋلات ازات ۇلى, ەرناز حالىقوۆ, ەرقانات كوشەنوۆ, عازىم قابدەنوۆ, نۇرگۇل القوجا, جانقوزا اياپوۆ, تىلەۋلەس قۇرمانعاليەۆ, ەركەبۇلان كاريپوۆ, سايلاۋ نۇربەرگەن سىندى كوپتەگەن رەسپۋبليكالىق, حالىقارالىق سايىستاردىڭ لاۋرەاتتارى كونتسەرتتىڭ اسەرلى وتۋىنە ۇيىتقى بولدى.
كەش كورەرمەندەرى: جوعارى وقۋ ورىندارى مەن كوللەدج ستۋدەنتتەرى, مەكتەپ وقۋشىلارى, زەينەتكەرلەر مەن ەڭبەك جانە سوعىس ارداگەرلەرى ارا-اراسىندا انشىلەرگە قوسىلىپ, كەشتىڭ قىزىقتى وتۋىنە اتسالىستى. وسىنىڭ بارىنە قۋاناسىڭ. الايدا, بۇل رەتتە ويلانارلىق جاعدايلار دا جوق ەمەس. وسىدان ءبىراز بۇرىن جاستار اراسىندا «قازاق اقىندارى مەن سازگەرلەرىن قانشالىقتى بىلەسىڭ؟» دەگەن ساۋالداما ءجۇرگىزگەن بولاتىنبىز. وكىنىشكە وراي, ساۋالدامانىڭ ناتيجەسى كوڭىل كونشىتپەيدى. كوپتەگەن جاس بۋىن وكىلدەرى, ناقتى ايتساق, ساۋالداماعا قاتىسقانداردىڭ 80 پايىزى حالىق اندەرى جونىندە ەشتەڭە بىلمەيتىن بولىپ شىقتى. مىنە, سوندىقتان دا ۇلتتىق ونەرىمىز وسى ىسپەتتەس مازمۇندى كەشتەردە عانا ەمەس, ءار وتباسىندا, ءبىلىم بەرۋ وشاقتارىندا, قوعامدا ۇنەمى ناسيحاتتالىپ وتىرۋى ءتيىس. «ق.مۇحامەدحانوۆ اتىنداعى ءبىلىم جانە مادەنيەت ورتالىعى» قوعامدىق قورى جاس ۇرپاقتى جىگەرى, رۋحى مىقتى الاش ۇلانى رەتىندە تاربيەلەۋدى باعىت-باعدارىندا ۇستاپ كەلەدى.
دينا مۇحامەدحان,
«ق.مۇحامەدحانوۆ اتىنداعى ءبىلىم جانە مادەنيەت ورتالىعى» قوعامدىق قورىنىڭ ديرەكتورى.
الماتى.