پارلامەنت سەناتى دەپۋتاتتارىنىڭ پىكىرلەرىنشە, اۆياكومپانياعا قاتىستى جانجالداردىڭ بارلىعىندا بىردەي جولاۋشىلار كىنالى بولىپ شىعا بەرمەيدى. كومپانيا پەرسونالىنا ءارتۇرلى جاعدايلارعا بەيىمدىلىك تانىتىپ, قازاق ءتىلىن جاقسى بىلۋلەرى ءتيىس. بۇل تۋرالى Tengrinews.kz ءتىلشىسى حابارلادى.
سەناتورلار «ەير استانانىڭ» پەرسونالىن جۇرتتى جانجالعا وزدەرى ارانداتاتىنى ءۇشىن ايىپتادى. «ءبىز ۇدايى ۇشاقتارمەن ۇشىپ تۇرامىز. مەن ءوزىمنىڭ جەكە تاجىريبەم ارقىلى بىلەمىن, شەت ەلدەرگە باراتىن بولساق, تۇرىك نەمەسە اراب اۆياجەلىلەرىنىڭ ۇشاقتارىنا بيلەت الۋعا تىرىسامىز. جالپى, تىم بولماعاندا قىزمەت كورسەتۋ دەڭگەيىنىڭ ءوزى تومەن بولعاندىقتان, «ەير استاناعا» تاپ كەلمەۋگە ۇمتىلامىز. بۇلاردا ءبىرىنشى كەزەكتە قانداي ساتتەرگە تاپ بولۋعا بولادى؟ بىلايىنشا, ەرەجەنىڭ ءبارى ءوزىنىڭ رەتىندەگىدەي بولىپ ورىندالاتىن سياقتى, بىراق ومىرلىك جاعدايلار دەگەن بار, سولارعا كەلگەندە, بۇلار اپىراقتاپ قالادى. وكىنىشكە وراي, اسىرەسە, «ەير استانانىڭ» قىزمەت كورسەتۋشى پەرسونالى كوپ جاعدايدا جانجالعا وزدەرى باستاماشى بولىپ جاتادى», - دەدى سەناتور قايسار وماروۆ كولىك جانە كوممۋنيكاتسيا مينيسترىمەن كەزدەسۋ كەزىندە.
بۇدان كەيىن ول ءبىر جاعدايدى ەسكە ءتۇسىردى. «جۇكتەردى تىركەۋ ءجۇرىپ جاتىر. ءبىزدىڭ ءبارىمىز ءبىر ورىنعا رۇقسات ەتىلەتىن جۇكتىڭ سالماعى 30 كيلو ەكەنىن جاقسى بىلەمىز. ال ءبىر ادامنىڭ جۇگى 32 كيلو بولىپ شىقتى. سوسىن تەكسەرۋشىلەر الگى كىسىنى ابدەن مۇقياتتاپ سالعان جۇگىن بۇزىپ, ارتىق 2 كيلونى الىپ تاستاۋعا ءماجبۇر ەتتى. باسقا اۆياجەلىلەردە مەن مۇندايدى كورگەن ەمەسپىن. بۇل بارىپ تۇرعان جانجال تۋعىزاتىن جاعداي عوي. بىلايىنشا ۇساق-تۇيەك نارسە, بىراق وسىندايلار بۇل اۋە جەلىلەرىندە ۇشقىڭ كەلمەيتىن احۋالدى تۋعىزادى», - دەپ اتاپ ءوتتى قايسار وماروۆ.
ءوز كەزەگىندە «ەير استانا» اق باسشىسى پيتەر فوستەر كومپانيادا پەرسونالدى وقىتۋدىڭ ۇدايى جۇرگىزىلىپ تۇراتىنىن جەتكىزدى.
«مەن سىزدەر ايتقان ەسكەرتپەلەردىڭ ءبارىن قابىلدايمىن. ءبىز بۇل ماسەلەلەردى زەرتتەيتىن بولامىز. جۇككە قاتىستى ءسىزدىڭ ايتقاندارىڭىز وتە دۇرىس, سەبەبى, ادەتتەگى پراكتيكادا جۇكتىڭ 3-4 كيلوعا دەيىن ەكى جاققا دا اۋىتقيتىنى راس. كومپانيا ءاردايىم قاجەتتى پروتسەدۋرالاردىڭ بالانسىن ساقتاۋعا ۇمتىلادى. ءبىز قىزمەتكەرلەرىمىزدى كەز كەلگەن ومىرلىك سيتۋاتسيالارعا بەيىم بولۋعا ۇيرەتەمىز», - دەدى ول.
«مەن بورتسەرىكتەرىنىڭ نارازىلىق ءبىلدىرۋدىڭ مۇنداي ءادىسىن قولدانۋلارىن قولدامايمىن. بۇل كىسىلەر وزدەرىنىڭ ارەكەتتەرى ارقىلى بۇكىل قوعامعا كولەڭكە تۇسىرەتىندەرىن ۇمىتپاۋلارى كەرەك. حالىقتىڭ كوپشىلىگى ستيۋاردەسسالار مەملەكەتتىك ءتىلدى بىلمەيدى دەگەنمەن كەلىسەدى. مەن ءوزى اپتاسىنا ءتورت رەت ۇشامىن, بايقايتىنىم, كوبىسى ءتىلدى بىلمەيدى. سىزدەر ولارعا مەملەكەتتىك ءتىلدى ۇيرەتەسىزدەر مە, جوق پا؟», - دەپ سۇرادى سەناتور سارسەنباي ەڭسەگەنوۆ.
ال «ەير استانا» اق پرەزيدەنتى پيتەر فوستەر ولاردىڭ ءتىلدى وقىتۋ كۋرستارىنان وتەتىنىن ايتىپ سەندىردى.
«حابارلاما الدىمەن قازاقشا, سوسىن ورىسشا, سوڭىنان اعىلشىنشا ايتىلادى. بۇل ءتارتىپ ۇشاققا ءىلىنىپ قويىلاتىن بارلىق كەستەلەر مەن اقپاراتتاردا ساقتالادى», - دەدى پرەزيدەنت.
ساكەن مايلىباي.