وڭىردەگى اۋرۋحانالار قىزمەتىمەن تانىستى

قازىر №2 وبلىستىق اۋرۋحانادا كوروناۆيرۋس ينفەكتسياسىنا شالدىققان پاتسيەنتتەرگە ارنالعان 180 ينفەكتسيالىق توسەك بار. مۇندا 162 ناۋقاس ەم قابىل­داپ جاتىر. ستاتسيونارداعى توسەكتىك ورىن­نىڭ 90 پايىزى بوس ەمەس. اۋرۋحا­ناداعى 100 ورىن وتتەكتى كونسولمەن قامتاماسىز ەتىلگەن. سونداي-اق وكپەنى جاساندى جەلدەتەتىن 12 اپپارات بار.

وبلىستىق دەنساۋلىق ساقتاۋ باس­قارماسىنىڭ باسشىسى نۇرلىبەك قابدىقاپاروۆتىڭ ايتۋىنشا, قوسىمشا 90 توسەكتىك ينفەكتسيالىق ستاتسيونار سالۋ جوسپارلانىپ وتىر. دەمەۋشىلەر 30 وكپەنى جاساندى جەلدەتۋ جانە 100 وكسيگەناتسيا اپپاراتىن ساتىپ الىپ بەرمەك. ال قۇرمانعازى اۋدانىنا كومپيۋتەرلىك توموگرافيا اپپاراتى الىنادى.

– ورتالىقتاندىرىلعان وتتەگى جۇيەسى جوق جەرلەرگە وتتەگى كونتسەنتراتورىن ورناتۋ كەرەك. ەگەر وتتەگىسىز جۇمىس ىستەي­تىن كونتسەنتراتتار بولسا, ونى دا ساتىپ الۋ قاجەت. مۇنداي اپپاراتتاردى ءبىرىن­شى كەزەكتە مۇقتاج ستاتسيونارلارعا جىبەرىڭىزدەر, – دەدى مينيستر.

سونداي-اق ا.تسوي جەدەل مەديتسينالىق جاردەم ستانساسىنىڭ 103 ديسپەتچەرلىك قىزمەتىمەن, جەدەل جاردەم قوڭىراۋىن قابىلداۋ, پاتسيەنتتەردىڭ جاعدايىنىڭ اۋىرلىعىنا بايلانىستى قوڭىراۋلاردى سۇرىپتاۋ جۇمىسىمەن تانىستى. بۇل ستانسادا 42 جەدەل جاردەم بريگاداسى مەديتسينالىق كومەك كورسەتەدى. ستانسادا تاۋلىگىنە شامامەن 1100-1200 شاقىرۋ قابىلدانادى. جۇكتەمە ەكى ەسەگە ارتقان.

وبلىستىق جەدەل مەديتسينالىق جاردەم ستانساسىنىڭ بازاسىندا ءوڭىر تۇرعىندارىنا كونسۋلتاتسيالىق كومەك كورسەتۋ ماقساتىندا 103, 109 جانە 112 نومىرلەرى بويىنشا تاۋلىك بويى call-ورتالىعى جۇمىس جاساۋدا. مۇندا مەديتسينا قىزمەتكەرلەرى كۇنىنە ورتاشا ەسەپپەن العاندا 240 وتىنىشكە جاۋاپ بەرەدى. ال ءموبيلدى بريگادا ءبىر تاۋلىكتە 35 قوڭىراۋعا قىزمەت كورسەتەدى. ماماندار رەسپيراتورلىق اۋرۋ بويىنشا شاقىرعانداردان پتر-تەست كومەگىمەن COVID-19 ينفەكتسياسىنا اناليز الادى. پاتسيەنتتى قاراپ, ساتۋراتسياسىن ولشەيدى. وسىعان وراي, مينيستر ءموبيلدى امبەباپ بريگادانىڭ جۇمىسىن كۇشەيتۋدى, امبۋلاتوريالىق ءدارى-دارمەكپەن قامتاماسىز ەتۋ ءۇشىن دارىلىك زاتتاردى ۋاقتىلى جەتكىزۋدى, سونىمەن قاتار تاپسىردى.

ا.تسوي ونلاين-رەجىمدە وبلىستىق دەنساۋلىق ساقتاۋ باسقارماسىنىڭ باسشىسىمەن وڭىردەگى ەپيدەميالىق جاعدايعا قاتىستى بىرقاتار ماسەلەنى تالقىلادى. اتاپ ايتقاندا, كەن ورىندارىندا ىندەتتىڭ ءورشۋىنىڭ الدىن الۋ, جاعدايى اۋىر پاتسيەنتتەردى شۇ­عىل ەمدەۋدىڭ ءادىسىن ازىرلەۋ, مەديتسينا ماماندارىنىڭ جەتىسپەۋشىلىگى ماسە­لەسىن شەشۋ سىندى پروبلەمالار قوز­عالدى.

– كوروناتاكسيگە باسا نازار اۋدارۋ كەرەك. بۇل ىسكە سالونى تازا كەز كەلگەن تاكسي ارالاسا الادى. ەگەر ەمحانادا كولىك جەتىسپەي جاتسا, بۇل جەرگىلىكتى اكىمدىك كومەكتەسپەيدى دەگەن ءسوز, – دەدى مينيستر.

اتىراۋ