قازاقتىڭ باس اقىنى, اعارتۋشى ءارى قوعام قايراتكەرى اباي قۇنانباي ۇلىنىڭ مەرەيتويى حالىقارالىق دەڭگەيدە كەڭىنەن اتالىپ وتىلۋدە. ۇلتىمىزدىڭ داڭقتى پەرزەنتىن ۇلىقتاۋ شاراسى پولياك ەلىندە دە ءوز جالعاسىن تابۋدا.
جۋىردا «پولياك پوشتاسىنىڭ» ورتالىق عيماراتىندا حاكىمنىڭ مەرەيتويىنا وراي «اباي قۇنانباي ۇلىنىڭ تۋعانىنا-175 جىل» اتتى پوشتا ماركاسىنىڭ سالتاناتتى تانىستىرىلىمى بولىپ ءوتتى. عالىمدار, ديپلوماتتار, پوشتا سالاسىنىڭ قىزمەتكەرلەرى مەن باق وكىلدەرى باس قوسقان, اقىن مۇراسىن, سونىمەن قاتار, حالقىمىزدىڭ رۋحاني مادەنيەتىن تانىتا ءتۇسۋ باعىتىندا ۇيىمداستىرىلعان بۇل جوبانىڭ باستاماشىسى قازاقستان رەسپۋبليكاسىنىڭ پولشاداعى ەلشىلىگى, ال ونى جۇزەگە اسىرۋشى «پولياك پوشتاسى» اق بولعاندىعىن اتاپ ءوتۋ قاجەت.
شارا بارىسىندا العاشقى بولىپ ءسوز العان قازاقستاننىڭ پولشاداعى توتەنشە جانە وكىلەتتى ەلشىسى ءالىم قيراباەۆ جينالعان كوپشىلىككە اقىننىڭ پالساپالىق ۇستانىمدارى, گۋمانيستىك كوزقاراستارى, شىعارماشىلىعىنىڭ يدەيالىق باعىتى مەن سيپاتى تۋراسىندا اقپارات بەرىپ, قازاق حالقىنىڭ ەۋروپا مەن ازيا مادەنيەتتەرىن جاقىنداستىرۋداعى, ۇلتىمىزدىڭ رۋحاني الەمىن كارى قۇرلىق جۇرتشىلىعىنا تانىستىرۋداعى ادولف يانۋشكەۆيچ, گۋستاۆ زەلينسكي جانە برونيسلاۆ زالەسسكي سىندى پولياك زيالىلارىنىڭ ەڭبەكتەرىن جوعارى باعالايتىنىن اتاپ ءوتتى. سونىمەن بىرگە پولياك ۇلتىنىڭ كەزەكتى ءبىر وكىلى, زاڭگەر سەۆەرين گروسستىڭ ۇلى ابايمەن دوستىق بايلانىس ورناتىپ, اقىننىڭ ءوز ۇلتىنىڭ ءداستۇرلى قۇقىعىن زەرتتەگەن گروسسقا تاپتىرماس كەڭەسشى بولىپ, كومەك قولىن سوزعاندىعىن تىلگە تيەك ەتتى.
پولياك جانە قازاق تاراپىنان قاتىسقان لاۋازىم يەلەرىنىڭ ءسوز سويلەۋ ءبولىمى اياقتالىسىمەن تاراپتار پوشتا ماركاسى ورنالاسقان تۇعىردىڭ پەردەسىن اشۋ ءراسىمىن جۇزەگە اسىرىپ, وعان قازاقستان ەلشىسىمەن بىرگە «پولياك پوشتاسى» اق توراعاسى توماش زدجيكوت جانە پر ءسىم شىعىس دەپارتامەنتىنىڭ ديرەكتورى يان حوفموكل مىرزالار قاتىستى. پەردە اشىلعان ساتتە عۇلامانىڭ بەينەسى جانە ونىڭ تۋ سىرتىنداعى كيىز ءۇي, ماۋەلى اعاشتار مەن كوك اسپاننان قۇرالعان ۇيلەسىمدى كومپوزيتسيا الىستان كوزگە جىلى ۇشىراي كورىندى. «پولياك پوشتاسى» مەكەمەسىنىڭ بەرگەن اقپاراتىنا سايكەس 135 مىڭ دانامەن شىعارىلعان ماركانىڭ ولشەمدەرى: 31,25x39,5 مم. پوشتا ماركاسى 30 ماۋسىمنان باستاپ اينالىمعا شىعارىلماق.
سالتاناتتى تانىستىرىلىمنىڭ رەسمي ءبولىمى اياقتالعاننان كەيىن قازاق تاراپى شاراعا قاتىسىپ, اقىن تۇلعاسىنا ەرەكشە ىقىلاس بىلدەرگەن قاۋىمعا تانىمال تۇركىتانۋشى عالىم, قازاق ءتىلىنىڭ بىلگىرى, پروفەسسور حەنريك يانكوۆسكيدىڭ تارجىماسىمەن, قازاقستان ەلشىلىگىنىڭ قولداۋىمەن بيىل ەكىنشى رەت باسىلعان ابايدىڭ «قارا سوزدەرىن» سىيعا تارتتى. ال جينالعان قاۋىم بولسا اقىننىڭ تۋىندىلارىنان ۇزىندىلەر وقىپ, ونىڭ ءومىرى مەن قىزمەتى تۋرالى پىكىر الماستى. وسى ورايدا اباي قۇنانباي ۇلىن ۇلىقتاۋ شاراسىنا قاتىسۋشى ازاماتتارمەن سۇحباتتاسىپ, پىكىرىن تىڭداعان ەدىك:
توماش زدجيكوت, «پولياك پوشتاسى» اق توراعاسى: ءبىز قازاق تاراپىمەن بەرىك ىنتىماقتاستىق ورناتقانبىز. ونىڭ مىسالى, 2017 جىلى ءىى دۇنيەجۇزىلىك سوعىس جىلدارى ورتالىق ازيادا جاساقتالعان پولياك اسكەرىن ەستە ساقتاۋ ماقساتىندا «اندەرس اسكەرى – ءۇمىت ءىزى» اتتى پوشتا ماركاسىن بىرلەسە شىعارعان بولاتىنبىز. ال بۇگىنگى «اباي قۇنانباي ۇلىنىڭ تۋعانىنا-175 جىل» پوشتا ماركاسىن سالتاناتتى تۇردە تانىستىرىپ وتىرمىز. بۇل ءبىز ءۇشىن ۇلكەن مارتەبە!
يان حوفموكل, پر ءسىم شىعىس دەپارتامەنتىنىڭ ديرەكتورى: ءحىح عاسىردا ءومىر سۇرگەندىگىنە قاراماستان اباي, قايتا ورلەۋ كەزەڭىنىڭ ادامى سىندى جان-جاقتى, شىن مانىندەگى سەگىز قىرلى ءبىر سىرلى تۇلعا بولعاندىعىن بىلەمىز. ارينە اقىندىق – ابايدىڭ ءبىر قىرى عانا. ءبىز قازاق اقىنىنىڭ ولەڭ شۋماقتارىمەن قاتار اۋەنىن كەلتىرگەن سازگەرلىك ونەرىنەن دە حاباردارمىز. دەيتۇرعانمەن, اباي شىعارماشىلىعىندا ونىڭ قارا سوزدەرىنىڭ ورنى ەرەكشە. ءوزىنىڭ قازاقستانعا ساپارى بارىسىندا ريم پاپاسى يوان پاۆەل ءىى اباي قۇنانباي ۇلىنىڭ قارا سوزدەرىنەن ءۇزىندى وقىعان بولاتىن. جالپى, عۇلامانىڭ قارا سوزدەرىن ءاردايىم باسشىلىققا العان ءجون دەپ بىلەمىن. مەن بالا كەزىمنەن پوشتا ماركالارىن جيناۋمەن اۋەستەندىم. وسى ءساتتى پايدالانا وتىرا اتالعان بىرلەسكەن جوبانى جۇزەگە اسىرۋشى تالاپتارعا العىسىمدى بىلدىرەمىن.
جاندوس اۋەلبەك ۇلى,
ارنايى «Egemen Qazaqstan» ءۇشىن
ۆارشاۆا (پولشا)