مەملەكەت باسشىسى عالىمداردى اقوردادا قابىلدادى. وسىنداي جاقسى ءۇردىس سوڭعى ەكى-ءۇش جىلدان بەرى قالىپتاسىپ كەلە جاتىر, سونىمەن بىرگە عىلىمعا كوڭىل ءبولۋ دە بۇرىنعىدان ارتا ءتۇستى. بيىلعى كونستيتۋتتسيالىق رەفورما دا عىلىمعا باسىمدىق بەرۋ تۋرالى ايتىلدى. سول ءۇشىن عىلىم قازىر مەملەكەتىمىز ءۇشىن ماڭىزعا يە بولدى. مىسالى, سينگاپۋر, جاپونيا ەلدەرىندە عىلىمعا ستراتەگيالىق دەڭگەيدە كوڭىل بولەدى. سونىڭ ارقاسىندا ولار دامۋ ساتىسىنا كوتەرىلدى. ءبىزدىڭ ەلىمىز دە قازىر وسى باعىتقا قادام باستى. قازىر پرەزيدەنت جانىنداعى ۇلتتىق عىلىم اكادەمياسى عىلىمي ماڭىزى بار ۇلكەن جوبالاردى جۇزەگە اسىرىپ جاتىر. مىسالى, قىتاي ەلىمەن بىرگە «DeepBas» دەپ اتالاتىن ۇلكەن بازا جاساۋعا كىرىستى. سونىمەن بىرگە وڭتۇستىك كورەيامەن بىرىگىپ «Silk Net» دەگەن ينستيتۋت قۇردى.
ءوزىم ساياساتتانۋ سالاسى بويىنشا مامانمىن. وسى سالادا دوكتورلىق قورعاپ, قازىرگى جاستاردىڭ مادەنيەتىن, ولاردىڭ قوعامداعى بەلسەندىلىگىن, ساياسي قۇندىلىقتارىنىڭ قالىپتاسۋ ماسەلەلەرىن زەرتتەپ ءجۇرمىن. وتكەن جىلى اقش-تىڭ دجوردج ۆاشينگتون ۋنيۆەرسيتەتىنىڭ ورتالىق ازيا باعدارلاماسى اياسىندا شاقىرىلعان پروفەسسور رەتىندە ءبىر جىل زەرتتەۋمەن اينالىستىم. سول زەرتتەۋلەر اياسىندا عىلىمي ماقالالارىم حالىقارالىق بەدەلدى جۋرنالدا جارىق كوردى. اقش-تا وقىپ جۇرگەندە «The Diplomat» اتتى جۋرنالعا «ديماش فەنومەنى جانە قازاقستاندىق جۇمساق كۇش» دەگەن اناليتيكالىق ماقالا شىعاردىق. ياعني ديماش قۇدايبەرگەننىڭ فەنومەن رەتىندە الەمگە تانىلۋى تۋرالى جازدىق. بۇل ماقالا ديماشتىڭ جانكۇيەرلەرى تاراپىنان جىلى قابىلداندى.
2025 جىلعى قازاقستاننىڭ باستى عىلىمي جەتىستىگى اتالدى
اتالعان جۋرنالعا «قازاقستاننىڭ كوپۆەكتورلى ساياساتى جانە توقاەۆتىڭ ونداعى ءرولى» اتتى ماقالام دا جارىق كوردى. بۇگىنگى كەزدەسۋدە پرەزيدەنت عىلىمعا قاتىستى جاڭا ءبىر باستاما كوتەردى. وتكەن جولى قوجا احمەت ياساۋي اتىنداعى سىيلىق تاعايىنداعان بولاتىن. ەندى ءال-فارابي اتىنداعى تاعى ءبىر سىيلىق تاعايىندالاتىن بولدى. بۇل ماراپات عىلىم سالاسىنا ەرەن ەڭبەگى سىڭگەن عالىمدارعا بەرىلەدى. بۇل دا ءبىر جاڭالىقتىڭ باستاۋى.
جەڭىسبەك تولەن,
پرەزيدەنت جانىنداعى ۇلتتىق عىلىم اكادەمياسى
ءبىلىم جانە قوعامدى دامىتۋ ورتالىعىنىڭ باسشىسى, PhD