قازاقستانداعى لۋدومانيا مەن ويىن بيزنەسى: وتاندىق عالىمداردىڭ عىلىمي ەڭبەكتەرى تانىستىرىلدى

اۋقىمدى جيىنعا قر عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى اقەركە ابىلايحان, جەتىسۋ وبلىسى اكىمىنىڭ ورىنباسارى مارلەن كولباەۆ, قۇقىق قورعاۋ ورگاندارىنىڭ وكىلدەرى, شەتەلدىك جانە وتاندىق جوعارى وقۋ ورىندارىنىڭ عالىمدارى, ساراپشىلار مەن زەرتتەۋشىلەر قاتىستى.

حالىقارالىق كونفەرەنتسيا قوعامداعى وزەكتى ماسەلەگە اينالعان لۋدومانيانىڭ الەۋمەتتىك, قۇقىقتىق, پسيحولوگيالىق جانە مەديتسينالىق قىرلارىن كەشەندى تۇردە تالقىلاۋعا ارنالدى. بۇگىندە قۇمار ويىندارعا تاۋەلدىلىك جەكە ادامنىڭ عانا ەمەس, تۇتاس قوعامنىڭ تۇراقتىلىعىنا اسەر ەتەتىن كۇردەلى الەۋمەتتىك قۇبىلىس رەتىندە باعالانۋدا. اسىرەسە جاستار اراسىندا كەڭ تارالۋى وتباسى قۇندىلىقتارىنا, قوعامدىق ساناعا جانە قارجىلىق تۇراقتىلىققا ەلەۋلى قاۋىپ توندىرۋدە.

سوڭعى جىلدارى مەملەكەت دەڭگەيىندە بۇل ماسەلەگە ەرەكشە نازار اۋدارىلىپ كەلەدى. مەملەكەت باسشىسى قاسىم-جومارت توقاەۆ 2023 جىلعى ۇلتتىق قۇرىلتايدا قۇمار ويىندارعا تاۋەلدىلىكتىڭ قوعامعا تيگىزەتىن زارداپتارىن اتاپ ءوتىپ, جاستاردى مۇنداي قاۋىپتەن قورعاۋ, الدىن الۋ تەتىكتەرىن كۇشەيتۋ جانە جاۋاپكەرشىلىك مادەنيەتىن قالىپتاستىرۋ باعىتىنداعى جۇمىستاردى جۇيەلەۋ قاجەتتىگىن كوتەرگەن بولاتىن. ال 2024 جىلعى قاۋىپسىزدىك كەڭەسىندە لۋدومانيا ماسەلەسى قوعامدىق قاۋىپسىزدىك پەن الەۋمەتتىك تۇراقتىلىققا ىقپال ەتەتىن فاكتورلاردىڭ ءبىرى رەتىندە قاراستىرىلىپ, مەملەكەتتىك دەڭگەيدە كەشەندى شارالاردى كۇشەيتۋ مىندەتى قويىلدى. وسى تۇرعىدان العاندا جەتىسۋ جەرىندە وتكەن حالىقارالىق كونفەرەنتسيا مەملەكەتتىك ساياسات پەن عىلىمي ىزدەنىستى ۇشتاستىرعان ماڭىزدى الاڭعا اينالدى.

كونفەرەنتسيا اياسىندا لۋدومانيا تاقىرىبىنا ارنالعان عىلىمي مونوگرافيالاردىڭ تۇساۋكەسەرى ءوتتى. اتاپ ايتقاندا, ەرمەك بورىباەۆ پەن جاننا  حامزينانىڭ رەداكتسياسىمەن جارىق كورگەن «قۇمار ويىن بيزنەسىن مەملەكەتتىك رەتتەۋدىڭ حالىقارالىق تاجىريبەلەرى مەن لۋدومانيانىڭ الدىن الۋ شارالارىن كەشەندى زەرتتەۋ» («كومپلەكسنوە يسسلەدوۆانيە مەجدۋنارودنىح پراكتيك گوسۋدارستۆەننوگو رەگۋليروۆانيا يگورنوگو بيزنەسا ي مەر پو پرەدۋپرەجدەنيۋ لۋدوماني») جانە «قازاقستانداعى لۋدومانيا مەن ويىن بيزنەسىنە كەشەندى پانارالىق تالداۋ» («كومپلەكسنىي مەجديستسيپلينارنىي اناليز لۋدوماني ي يگورنوگو بيزنەسا ۆ كازاحستانە») اتتى عىلىمي ەڭبەكتەر كوپشىلىككە تانىستىرىلدى. زەرتتەۋلەردە قۇمار ويىندارعا تاۋەلدىلىكتىڭ سەبەپتەرى مەن سالدارى, حالىقارالىق رەتتەۋ تاجىريبەلەرى جانە الدىن الۋ تەتىكتەرى كەشەندى تۇردە سارالانعان.

ايتا كەتۋ كەرەك, حالىقارالىق كونفەرەنتسيا قر عىلىم جانە جوعارى ءبىلىم مينيسترلىگىنىڭ باعدارلامالىق-نىسانالى قارجىلاندىرۋى اياسىندا جۇزەگە اسىرىلىپ جاتقان BR24992927 «قازاقستانداعى لۋدومانيانى ينتەگراتيۆتى زەرتتەۋ جانە ونى ازايتۋدىڭ كوپسالالى ستراتەگيالارى» عىلىمي باعدارلاماسى, سونداي-اق قر مادەنيەت جانە اقپارات مينيسترلىگىنىڭ قولداۋىمەن جانە ازاماتتىق باستامالاردى قولداۋ ورتالىعى كەاق قاتىسۋىمەن ىسكە اسىرىلاتىن «قازاقستان جاستارى اراسىندا لۋدومانيانىڭ الدىن الۋ بويىنشا كەشەندى شارالار» جوباسى شەڭبەرىندە ۇيىمداستىرىلدى.

جەتىسۋ تورىندە وتكەن حالىقارالىق باسقوسۋ عىلىمي قاۋىمداستىق, مەملەكەتتىك ورگاندار مەن ازاماتتىق قوعام وكىلدەرىنىڭ كۇش بىرىكتىرۋى ارقىلى لۋدومانياعا قارسى كۇرەستىڭ جاڭا باعىتتارىن ايقىنداعان ماڭىزدى ديالوگ الاڭىنا اينالدى.