ەلىمىزدە العاش رەت تولىقتاي جاساندى ينتەللەكت كومەگىمەن جاسالعان مۋلتفيلم كينوتەاتردان كورسەتىلدى. «تۇركىستان ساقشىلارى» اتتى جوبا شىتىرمان وقيعالارعا تولى تارتىمدى سيۋجەتىمەن ەرەكشەلەنەدى, دەپ جازادى Egemen.kz.
العاشقى سەرياسى «تۇمار» تەلەۆيزيالىق سىيلىعىنا يە بولعان انيماتسيالىق تۋىندىنى ازىرلەۋگە كەتكەن شىعىن ادەپكى مۋلتفيلمدەرگە قاراعاندا – 100 ەسە از. وسىلايشا, جوبا اۆتورى عاسىر قۇرالباي ۇلى جي ارقىلى دا تولىققاندى دۇنيە جاساۋعا بولاتىنىن دالەلدەۋگە تىرىسقان.
«ەڭ العاشقى يدەيا وتكەن جىلدارى Chatgpt سۋرەتتەردى دۇرىس شىعارىپ جاتقاندا ويعا كەلدى. سول كەزدە وسى سۋرەتتەرگە انيماتسيانى قوسۋ تۋرالى ويلادىم. يدەيامدى جەرگىلىكتى تەلەارنا قولداي كەتتى. جي ارقىلى مۋلتفيلم ازىرلەۋ ارقىلى شىعىندى جانە ۋاقىتتى ازايتتىق. ارينە جي-ءدىڭ دە انيماتسيا سالاسىندا كەمشىلىگى بار. بىراق ۋاقىت وتە كەلە بۇل دا جويىلادى دەپ ويلايمىن», دەيدى عاسىر قۇرالباي ۇلى.
«تۇركىستان ساقشىلارى» بالالارعا ەڭ الدىمەن تۋعان جەرگە دەگەن سۇيىسپەنشىلىكتى, ونى قورعاۋ جاۋاپكەرشىلىگىن سەزىندىرۋدى ماقسات ەتكەن. بۇل مۋلتفيلمدە ساقشى ۇعىمى تەك كۇش پەن باتىرلىقتى عانا ەمەس, ادالدىقتى, ادىلدىكتى, دوستىقتى جانە بىرلىككە ۇمتىلۋدى بىلدىرەدى. مۋلتفيلمدە جاساندى ينتەللەكت جوبا اۆتورلارىنىڭ شىعارماشىلىق مۇمكىندىگىن كەڭەيتەتىن قۇرال رەتىندە قولدانىلعان. سونداي-اق جي ستسەناريدى دامىتۋدا كەيىپكەرلەردىڭ ۆيزۋالدىق وبرازدارىن ىزدەۋ مەن كەيبىر انيماتسيالىق شەشىمدەردى جىلدام سىناپ كورۋگە سەپتەسكەن. نەگىزگى ستسەناري وزەگىن بەلگىلى ەرجان جاۋباي مەن ومىربەك نىشانبەك جازىپ شىققان. ۇزاقتىعى 50 مينۋتتى قۇرايتىن مۋلتفيلم 3,5 ايدا ءازىر بولعان.
«قازىر جي بارلىق شەكارانى بۇزدى. ەندى شالعاي اۋىلدا تۇرىپ تا جي-مەن نەبىر تۋىندىلاردى جاساۋعا بولادى, باستىسى ينتەرنەت جانە قاجەت جازىلىمدار بولسا بولعانى», دەدى عاسىر قۇرالباي ۇلى.
ەلىمىزدە العاش رەت تولىقتاي جاساندى ينتەللەكت كومەگىمەن جاسالعان مۋلتفيلم تۇركىستانداعى كينوتەاتردا كىشكەنتاي كورەرمەن نازارىنا تەگىن ۇسىنىلعان.