مەملەكەتتىك سىيلىقتىڭ يەگەرى, قازاقستاننىڭ حالىق جازۋشىسى, تاۋەلسىز «تارلان» سىيلىعىنىڭ يەگەرى قادىر مىرزا ءالي – قازاق ۇلتى ءۇشىن ەرەن تۇلعا. قازاق ادەبيەتىنىڭ كورنەكتى وكىلى, داڭقتى شايىردىڭ سوڭىندا وشپەس مۇرا, اقىل-ويدىڭ كەنى قالدى.
بيىل ەلىمىزدەگى باستى مەرەيتويلاردىڭ بىرەگەيى – قادىر عينايات ۇلىنىڭ 85 جىلدىعى قازاق رۋحانياتى مەن مادەنيەتى ءۇشىن داڭقتى داتا, اسا قادىرلى كۇن. اقىننىڭ اسىل مۇراسىن تۇگەندەپ, حالىققا كەڭىنەن ناسيحاتتاۋ – شايىرىن شىن قادىرلەگەن جۇرتشىلىق پەن تۋعان ەلىنىڭ ەنشىسىندە ەكەنى ءمالىم. بۇل ورايدا, قادىر مىرزا ءالي اتىنداعى باتىس قازاقستان وبلىستىق مادەنيەت جانە ونەر ورتالىعىنىڭ جاساپ جاتقان جۇمىسى اۋىز تولتىرىپ ايتارلىقتاي.
وسى جىلدىڭ 27 ماۋسىمىندا اشىلعانىنا 5 جىل تولىپ وتىرعان مەكەمە قادىر اقىننىڭ قازىناسىن ناسيحاتتاۋدا ۋاقىتپەن ساناسپاي, تالماي ەڭبەك ەتىپ كەلەدى. وعان ءوڭىردى ايتپاعاندا, تۇگەل ەلىمىز كۋا. بۇل ەڭ الدىمەن ۇلتىمىزدىڭ ماڭدايىنا بىتكەن ۇلى اقىننىڭ قازاق ادەبيەتى تاريحىنا التىن ارىپپەن جازىلعان اتىن اسقاقتاتۋ, بەدەلىن بيىكتەتۋ ەمەس پە؟
2015 جىلى قادىر اقىننىڭ 80 جىلدىعىنا وراي وڭىردە اۋقىمدى شارالار ءوتتى. باتىس قازاقستان وبلىسىندا اقىننىڭ اسقاق بەينەسىن كورسەتەتىن ەكى بىردەي ەسكەرتكىشتىڭ اشىلىپ, اقىننىڭ داڭقىن تاعى ءبىر ايشىقتادى. ءمۇسىننىڭ ءبىرى – ورال قالاسىندا بوي كوتەرسە, ەكىنشىسى تۋعان جەرى – جىمپيتى اۋىلىنىڭ ورتالىعىندا «قاسقايىپ تۇر».
ورالداعى قادىر اقىنعا ارنالعان قولا ءمۇسىن ۇلىلىقتىڭ قاراپايىم بەينەسىندەي. قازاقستان سۋرەتشىلەر وداعىنىڭ مۇشەلەرى رينات ابەنوۆ, ەربول زيابەكوۆ, يبراگيم ايدەنوۆتەردىڭ قولىنان شىققان كوركەم تۋىندى ماڭايىنان وتكەن جاندى تاڭداندىرماي قويمايدى.
ءيا, وسىدان تۋرا بەس جىل بۇرىن سول كەزدەگى وبلىس اكىمى نۇرلان نوعاەۆتىڭ قولداۋىمەن قاداسى قاعىلعان قادىر ورتالىعىنىڭ قادىر-قاسيەتى جىل وتكەن سايىن ارتىپ كەلە جاتىر. اتالمىش ورتالىقتىڭ اشىلۋ سالتاناتىندا العاش بولىپ ايگىلى ءابىش كەكىلباەۆ, نۇرلان ورازالين, اقۇشتاپ باقتىگەرەەۆا باستاعان اعا بۋىن وكىلدەرى ات باسىن تىرەپ, الداعى قىزمەتىنە اق باتاسىن بەردى. ۇلت زيالىلارى ۇلى شايىردىڭ ەسكەرتكىشى الدىندا باس ءيىپ, سالتاناتى كەلىسكەن سارايدى كورىپ قايران قالىستى.
باسقا وڭىردە بالاماسى جوق بۇل ورتالىق – ورالعا كەلگەن ساپارىندا ەلباسى نۇرسۇلتان نازارباەۆتىڭ جوعارى باعاسىن الدى.
ادەبيەت الەمىندە ءدۇر سىلكىنەر جاڭالىق بولعان قادىر ورتالىعى عيماراتىنىڭ شىن مانىندە سالتاناتى كەلىسكەن, ەرەكشە. نىساننىڭ ارحيتەكتورى – حالىقارالىق ارحيتەكتۋرا اكادەمياسىنىڭ مۇشەسى, قازاقستان رەسپۋبليكاسىنىڭ قايراتكەرى بوكەباي ساماتبەك تاجەن ۇلى بولسا, قۇرىلىس مەردىگەرى – قوشان قايدار جاسەن ۇلىنىڭ باسشىلىعىنداعى «بولاشاق–ت» جشس. مىنە, ورتالىق قۇرىلىسىنىڭ از-كەم تاريحى وسىنداي.
قازاققا كەڭىنەن تانىس قادىر عينايات ۇلىنىڭ سوڭىنا قالعان مۇرالارى دا ورتالىقتا ورنالاسقان اقىن اتىنداعى ادەبي مەموريالدىق كابينەتتە, مۋزەيدە ساقتالعان. مۇنداعى سورەلەردە جينالعان كىتاپتىڭ بارلىعى قادىر اقىننىڭ جەكە كىتاپحاناسىنان الىنعان. 6767 كىتاپ وسى ورتالىقتىڭ ەڭ ماڭىزدى, ەڭ قۇندى قازىناسى.
مۇراجايدىڭ نەگىزگى بولىگىندە قادىر اقىننان قالعان مۇرالارمەن تولىق تانىسۋعا بولادى. قادىر مىرزا ءاليدىڭ جىمپيتى اۋىلىنىڭ مەكتەبىنەن تۇلەپ ۇشقانداعى كامەلەتتىك اتتەستاتى, سىنىپتاستارىمەن تۇسكەن سۋرەتتەرى الىستان كوز تارتادى. بالا قادىردان دانا قادىرعا دەيىنگى ەڭبەك پەن ىزدەنىس جولدارىنان سىر شەرتەتىن اقپاراتتار دا وسىندا. تالاي-تالاي جىرلار, سۇيەكتى شىعارمالار دۇنيەگە كەلگەن اقىننىڭ جەكە جۇمىس بولمەسى قاز قالپىندا تۇر.
اقىن جىرلارى ەل اۋزىنا ەرتە ىلىگىپ, زاڭعار جازۋشىلار وڭ باعاسىن بەرگەن بولاتىن. «وي ورمانى» اتتى جيناعى ءۇشىن 1966 جىلى العان لەنين كومسومول سىيلىعى, 1980 جىلى «جەرۇيىق» اتتى كىتابى ءۇشىن مەملەكەتتىك سىيلىقتىڭ يەگەرى اتانعانداعى دەرەك پەن دالەل كورمەدەن كورىنىس تاپتى.
تاۋەلسىزدىك جىلدارىندا العان ماراپاتتارى ءبىر توبە. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قۇرمەتتى پروفەسسورى اتاعى, سونىمەن قاتار حالىقارالىق «اۆياس» سىيلىعى قۇجاتتارىن كورمەي ءوتۋ مۇمكىن ەمەس. شەت ەلدەرگە ساپارى, وتباسىمەن تۇسكەن سۋرەتتەرى, تۇتىنعان زاتتارى, اق قالپاعى, قالتا تەلەفونى, ت.ب. قۇندى جادىگەرلەرى كوزدىڭ قاراشىعىنداي ساقتاۋعا ابدەن لايىق دۇنيەلەر.
سونىمەن قاتار مۇراجايدا ادەبيەتتىڭ كورنەكتى وكىلدەرىنە, جىراۋ, باتىرلارعا ارنالعان كورمە زالى بار. سىرىم, ماحامبەت باتىرلارعا ارنالعان بۇرىش ولكە تاريحىنان سىر شەرتەدى. ۇلى اقىن ابايدان باستالعان ارنايى بۇرىشتار كەلۋشىلەردى مول مالىمەتكە قانىقتىرادى. ولكە تاريحىندا ءىزى قالعان ورىستىڭ ۇلى اقىنى ا.س.پۋشكين, تاتار حالقىنىڭ اقىنى عابدوللا توقاي, عالىم قاجىم جۇماليەۆ, «اقجايىق» تريلوگياسىنىڭ اۆتورى, جەرلەس قالامگەر حامزا ەسەنجانوۆ, تايىر جاروكوۆ, ەڭبەك جولىن ورالدا باستاعان مايدانگەر اقىن قاسىم امانجولوۆ سەكىلدى زاڭعار تۇلعالار جايىنداعى قۇندى جادىگەرلەر باعا جەتپەس بايلىق ىسپەتتى.
جەرلەس اقىندار ساعىنعالي سەيىتوۆ, جۇبان مولداعاليەۆ, جازۋشى بەرقايىر امانشين, قادىر اقىننىڭ زامانداستارى, ادەبيەتتىڭ بەلدى وكىلدەرى مۇقاعالي مەن تۇمانباي, فاريزا, انەس ساراي, ءابىش كەكىلباي, قاجىعالي مۇحامبەتقالي, مىرزاتاي جولداسبەكوۆ حاقىنداعى دەرەكتەر وسكەلەڭ ۇرپاق ءۇشىن اسا قۇندى.
الپىس جىلدىق تاريحى بار اقجايىق ايتىسىنا ارنالعان بۇرىش جانە ءوڭىر ادەبيەتىنىڭ دامۋىنا ۇلەس قوسىپ جۇرگەن اقىن-جازۋشىلار تۋرالى مالىمەتتەر مەنمۇندالاپ تۇر.
قادىرداي بەلگىلى اقىننىڭ بەدەلىن الاسارتپاي, بيىككە كوتەرىپ كەلە جاتقان ورتالىق بەس جىلدا قانشا بەلەستەن ءوتتى. شىعارماشىلىق ۇجىم بۇگىندە وبلىستاعى ىرگەلى مادەنيەت وشاعىنا اينالىپ, ەل-حالىقپەن تىعىز قارىم-قاتىناس جاساپ كەلەدى. مادەني ۇجىمنىڭ جۇمىسى ءسات سايىن جاندانىپ, تىڭ جوبالارمەن تولىعۋدا. ايتالىق, «ەلەۋلى ەسىمدەر» جوباسىمەن ونەر, مادەنيەت, ءبىلىم, دەنساۋلىق جانە باسقا دا سالالارعا ەڭبەك سىڭىرگەن ەسىمى ەلەۋلى جاندارمەن كەزدەسۋ كەشتەرى وتكىزىلىپ, رۋحاني شارالار اپتا سايىن تۇراقتى ۇيىمداستىرىلسا, سوڭىنا وشپەس ءىز قالدىرعان ۇلى تۇلعالاردى ۇلىقتاۋ ماقساتىندا «جارق ەتىپ سونگەن ءبىر جۇلدىز» اتتى جوبا قولعا الىندى.
«اۋىلداعى ارداقتىلار» جوباسى اۋىل تۇرعىندارىنىڭ تىنىس تىرشىلىگىمەن تىعىز بايلانىستى. بۇل جوبا ەڭبەكپەن, يگى ىستەرىمەن, اتىمتاي جومارتتىعىمەن, قاراپايىمدىلىعىمەن جەرلەستەرىنىڭ العىسىن ارقالاپ جۇرسە دە, ەسىمى ەلگە بەيتانىس اۋىل ازاماتتارىن دارىپتەۋگە ارنالادى. وسىنداي جانى جايساڭ جاندارمەن جۇزدەسۋ – كوپشىلىككە وي سالارى انىق.
سونداي-اق ونەرلى اۋلەتتى كوپشىلىككە ناسيحاتتاۋعا ارنالعان «جۇلدىزدى وتباسى» جوباسى قولعا الىندى. اكەلى-بالالى, ەرلى-زايىپتى, اعايىندى ونەرپازدارمەن كەزدەسۋ كەشىن وتكىزۋ ارقىلى, بۇل جوبانىڭ ءمان-مازمۇنى اشىلىپ كەلەدى. سونىمەن قاتار «تاسادا جۇرگەن تالانتتار» جوباسى جاس دارىنداردىڭ تىنىسىن اشۋعا باعىتتالعان, بۇل جوبا وسى جىلى دا جالعاسىن تابادى.
قادىر مىرزا ءالي اتىنداعى مادەنيەت جانە ونەر ورتالىعى ۇلتىمىزدىڭ اسىل قۇندىلىقتارىن دارىپتەۋمەن ەرەكشەلەنۋدە. اتادان بالاعا ميراس بولعان ايتىس ونەرىنىڭ دە جالاۋىن جىقپاي, جايىق جۇرتىمەن «جۇزدەستىرۋ» جولىندا ايانباي ەڭبەك ەتىپ ءجۇر. ماسەلەن, قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعىنا ارنالعان «ازاتتىقتىڭ اق تاڭى», الاشوردا قوزعالىسىنىڭ 100 جىلدىعىنا ارنالعان «الاشتىڭ باعى – ازاتتىق» اتتى رەسپۋبليكالىق اقىندار ايتىسىن جوعارى دەڭگەيدە ۇيىمداستىردى. ۇستىمىزدەگى جىلدىڭ ناۋرىز ايىندا «جاستار جىلى» اياسىندا رەسپۋبليكالىق اقىندار ايتىسى دا ورتالىق ۇجىمىنىڭ «جۇدىرىقتاي جۇمىلۋىمەن» تياناقتى ءارى جوعارى دەڭگەيدە ءوتتى. ەلدى ەلەڭ ەتكىزگەن VIII «التىن دومبىرا» ايتىسى 2019 جىلدىڭ جەلتوقسان ايىندا ورال قالاسىندا دۇبىرلەپ ءوتتى.
«قادىر جولىمەن...» جوباسى اياسىندا اقىننىڭ شىعارماشىلىعىن ناسيحاتتايتىن «دالا ديدارى» كوشپەلى ونەر ۇجىمى قۇرىلدى. اتالمىش ونەر ۇجىمىنىڭ قۇرىلۋ ماقساتى – قايتالانباس تۇلعا قادىر مىرزا ءالي شىعارماشىلىعىن ناسيحاتتاۋ. ياعني ۇجىم قۇرامىنداعى انشىلەر اقىننىڭ سوزىنە جازىلعان اندەردى جاندى داۋىستا شىرقاسا, تالانتتى جاستار ولەڭدەرىن وقىپ, ءازىل-قالجىڭدارى مەن افوريزمگە اينالعان دانالىق ويلارىن, قاناتتى سوزدەرىن كەڭىنەن دارىپتەيدى. بۇل – دالانىڭ ءبىرتۋار پەرزەنتىنىڭ باي مۇراسىنا دەگەن زور قۇرمەت.
ۇجىم بۇگىندە حالىقتىڭ وڭ باعاسىن الا ءبىلدى. وبلىسىمىزدىڭ اۋدان, اۋىلدارىندا ونەر كورسەتىپ, تاجىريبەسىن شىڭداعان «دالا ديدارى» اتىراۋ, ماڭعىستاۋ وبلىستارىنا, نۇر-سۇلتان, الماتى قالالارىنا ونەر ساپارىن جاساپ, قادىر شىعارماشىلىعىن قۇرمەتتەيتىن كورەرمەننىڭ ىقىلاسىنا بولەندى. وتكەن جىلدىڭ وزىندە كورشىلەس اقتوبە قالاسىندا ەكى مارتە ونەر كورسەتىپ, بولاشاعىنىڭ زور ەكەندىگىن ءبىر باعدارلاپ العان ەدى.
دۇنيەنى دۇرلىكتىرگەن اتى جامان ىندەت قاي سالانى بولسىن اۋرە-سارساڭعا سالدى. ءدال وسىنداي شاقتا قادىر ورتالىعى ەلمەن بىرگە بولدى. اقىن قازىناسىن الەۋمەتكە الەۋمەتتىك جەلى ارقىلى جەتكىزۋ و باستان بار. دەيتۇرعانمەن, ەلدەگى جاعدايعا بايلانىستى ۇجىم دا قاشىقتان جۇمىسقا كىرىسىپ, ءبىر ءسات بولسىن داعدارىپ قالعان ەمەس. قادىر مىرزا ءاليدىڭ ولەڭدەرىن كۇن سايىن الەۋمەتتىك جەلىگە سالىپ, وقىرمانعا ۇسىندى. بەلگىلى ونەر يەلەرى, ورتالىقتا قىزمەت ىستەيتىن وبلىس ايتىسكەرلەرى «اقجايىق» تەلەارناسى ارقىلى, ورتالىقتىڭ جەلىدەگى پاراقشالارى ارقىلى اقىن ولەڭدەرىن جاتقا وقىدى. بىرنەشە ونلاين ايتىس ۇيىمداستىردى. ورتالىقتىڭ تىنىس تىرلىگىنەن حابار بەرەتىن ۆيدەوروليكتەر, ونلاين ەكسكۋرسيالار ۇسىنىلدى. ەلىمىز ىندەتتەن امان ءوتىپ, بۇرىنعى قالىپقا قايتا ورالعاندا, قادىر ورتالىعى ادەتتەگىدەي, قىزۋ جۇمىسقا كىرىسپەك.
قازاقستاننىڭ جازۋشىلار, كومپوزيتورلار, سۋرەتشىلەر, كۇيشىلەر وداعىنىڭ وبلىستىق بولىمشەلەرى دە وسى جەردە ورنالاسقان. ايتىس الاڭىندا اقجايىق اقىندارىنىڭ جەڭىسى مەن جەمىسى زور. بۇل ونەرلى ولكەگە ءتان بولسا كەرەك. وڭىرىمىزدەگى ەلگە تانىمال جانە جاس اقىنداردىڭ باسىن ءبىر ارناعا توعىستىرۋ, ءبىر جەردە ديدارلاسۋ, وي ءبولىسۋ – تالانتتى شىڭدايتىنى انىق. وسى تۇرعىدا بيىل ورتالىقتان ايتىسكەرلەر بولمەسى جاساقتالىپ, ءتول ونەر جۇيرىكتەرىنىڭ ءجيى باس قوساتىن ورنىنا اينالىپ كەلەدى.
قازاقستاندا بالاماسى جوق ورتالىق عيماراتىنىڭ قاپتالىندا ساحناسىنان تالاي جۇلدىز ونەر كورسەتكەن 1125 ورىندىق امفيتەاتر جۇمىس ىستەيدى. امفيتەاتردا جاز مەزگىلىندە ءاربىر اۋدان ونەرپازدارى ونەر كورسەتەدى. بۇل – كەشكى سەرۋەنگە شىققان قالا تۇرعىندارىنىڭ كوڭىل كۇيىن كوتەرەرى ءسوزسىز. سەبەبى بۇل شاعىن اۋداندا تۇڭعىش پرەزيدەنت اتىنداعى ساياباق تۇرعىندار يگىلىگىنە قىزمەت كورسەتۋدە.
سونىمەن قاتار ورتالىقتا م.گوركي اتىنداعى قالالىق كىتاپحانا بولىمشەسى جانە قادىر اقىننىڭ زامانداس دوسى, بوكەي قۇمىندا دۇنيەگە كەلگەن اقىن جانعالي نابيۋللين اتىنداعى وقىرمان بولمەسى جۇيەلى جۇمىس ىستەپ كەلەدى. بۇل بولمەدە جانعالي اقىننىڭ وتباسىنىڭ ۇيعارۋىمەن جەكە كىتاپحاناسىنان 1200 كىتاپ اكەلىنىپ, وقىرمان يگىلىگىنە پايدالانىلۋدا.
ورتالىقتىڭ 150 ورىندىق كونتسەرت زالىندا ءار اپتا سايىن ادەبي-سازدى شارالار وتكىزىلىپ تۇرادى. ياعني وڭىرىمىزگە تانىمال اقىن-جازۋشىلار, مادەنيەت سالاسىنا ەڭبەگى سىڭگەن قايراتكەرلەر, ەڭبەك ارداگەرلەرىمەن كەزدەسۋ كەشتەرى, سونداي-اق, ءومىر جولىنا ايتۋلى ءىز قالدىرعان قايراتكەرلەردى ەسكە الۋ كەشتەرى ۇيىمداستىرىلىپ, حالىقتىڭ كوزايىمىنا اينالدى.
تىرلىگى قات-قابات ورتالىقتا اقپارات ءبولىمى جۇيەلى جۇمىس ىستەۋدە. قولعا الىنعان ءاربىر شارانى الدىن الا الەۋمەتتىك جەلىلەرگە جارنامالاپ, ءوتۋ بارىسى مەن قورىتىندىسىن جەلى قولدانۋشىلارىنا ۋاقتىلى جەتكىزىپ وتىرادى. بۇل رەتتە ورتالىقتا «قادىرتسەنتر» جەكە سايتى ىسكە قوسىلسا, «ۋايتمەدجيك» ستۋدياسى اقپارات جانە جارناما جۇمىستارىن بەينەباياندا جاساۋعا ءوز ۇلەسىن قوسىپ كەلەدى.
قاشاندا جاس تالانتتاردىڭ تىنىسىن اشۋعا ۇلەس قوساتىن, مادەني وشاقتان قوڭىر داۋىسىمەن تىڭدارمانداردىڭ جۇرەگىن تەبىرەنتىپ جۇرگەن وبلىس ءانشىسى ەرلان قۋانىشەۆ ورتالىق جانىنان سوڭعى ۇلگىدەگى مۋزىكالىق قۇرىلعىلارمەن جابدىقتالعان «داۋىس RECORDS» دىبىس جازۋ ستۋدياسىن اشتى. قازاقستان رەسپۋبليكاسىنىڭ مادەنيەت قايراتكەرى, كومپوزيتور ادىلبەك سۇلەيمەنوۆ جەتەكشىلىك ەتەتىن ەلگە تانىمال حالىقتىق «اجەلەر سالەمى» ءانسامبلى تاربيە-ءتالىمى مول حالىق اندەرىمەن قاتار, ەل اراسىنا كەڭىنەن تاراعان مازمۇندى اندەردى ورىنداپ, كوپشىلىكتىڭ قوشەمەتىنە بولەنىپ ءجۇر.
سونىمەن قاتار ورتالىقتاعى دومبىرا ۇيىرمەسى ۇلتتىق قۇندىلىقتاردى دارىپتەۋگە ۇمتىلعان ۇل-قىزداردى قۇدىرەتتى كۇي الەمىنە جەتەلەيدى. دومبىرا ۇيىرمەسىنىڭ جەتەكشىسى – كۇيشى, ۇستاز اسقار كەنجەعاليەۆ. قۇرمانعازى مەن دينانىڭ مەكەنى – اقجايىق – ءتۇتىنى ءتۇزۋ ۇشقان كۇيدىڭ وشاعى. بۇل رەتتە, قازاقستان كۇيشىلەر وداعىنىڭ وبلىستىق فيليالى دا (فيليال توراعاسى ا.كەنجەعاليەۆ) قارقىندى جۇمىس اتقارۋدا. بۇل ۇلتتىق دومبىرا كۇنى قارساڭىندا ورتالىقتا كۇيشىلەر بولمەسى اشىلىپ, اقسۇيەك ونەرگە قاتىستى دەرەكتەرمەن تولىقتى.
اقىن اتىن ۇلىقتاۋ – ۇرپاققا امانات. بۇل ورايدا, قادىر ورتالىعى ورنالاسقان قالامىزدىڭ 6-شاعىن اۋدانىنداعى اۋىزەكى تىلدە «62 ءۇي» اتالىپ كەلگەن ايالداماعا رەسمي تۇردە قادىر مىرزا ءالي ورتالىعى اتاۋى بەرىلدى. سونداي-اق تاعى دا ءبىر قۋانىشتى جاڭالىقتىڭ كۋاسى بولدىق. ەلوردامىزدا رەسپۋبليكالىق ونوماستيكالىق كوميسسياسىنىڭ وتىرىسىندا, قالالىق ءماسليحات شەشىمىمەن ورال قالاسىنىڭ 5-شاعىن اۋدانىنا قادىر مىرزا ءاليدىڭ ەسىمىن بەرۋ تۋرالى شەشىم شىقتى. بۇل اقجايىق ءوڭىرىنىڭ جەتىستىگى.
باتىس قازاقستان وبلىسى عانا ەمەس, ەلىمىز تامسانىپ, تاڭعالارلىقتاي ەرەكشە عيماراتىمەن, تىڭ باستاما, جوبالارىمەن, يگى مادەني ءىس-شارالارىمەن دارالانعان قادىر مىرزا ءالي اتىنداعى مادەنيەت جانە ونەر ورتالىعىنىڭ بۇگىنگى تىنىسى كەڭ, كەلەشەگى جارقىن. قادىر اقىننىڭ قازىناسىن جيناقتاپ, حالىققا ناسيحاتتاپ وتىرعان بىرلىگى بەكەم, ساۋلەتى ەرەك مەكەمە قالامىزدىڭ كوركىنە ءسان, رۋحانياتىنا ءنار بەرىپ تۇر.
ەل رۋحانياتىنداعى ۇلى تۇلعانى ۇلىقتاپ, ۇرپاق جادىنا سىڭىرە الساق, ۇلتىمىزدى ۇيىستىرۋدا ۇتارىمىز كوپ. ەڭسەلى عيماراتتىڭ ەسىگى ەل ءۇشىن ءاردايىم اشىق.
باۋىرجان حاليوللا,
قادىر مىرزا ءالي اتىنداعى مادەنيەت جانە ونەر ورتالىعىنىڭ ديرەكتورى