سيريا ۇكىمەتى حيميالىق قارۋدى تەرروريستەر قولدانعانىن راستايتىن ايعاقتاردى رەسەي وكىلدەرىنە تاپسىردى. بۇل تۋرالى يتار-تاسس حابارلادى.
«بىزدە حيميالىق قارۋدى تەرروريستەر قولدانعانىن راستايتىن ايعاقتار بار. ول دەرەكتەر رەسەيگە تاپسىرىلدى», – دەدى سيريا پرەزيدەنتى باشار اساد امەريكانىڭ «فوكس» تەلەارناسىنا بەرگەن سۇحباتىندا.
امەريكانىڭ جۋرناليستەرى سيريا پرەزيدەنتىنە ساۋال قويعاندا, بۇۇ ينسپەكتورلارىنىڭ بايانداماسىنا سۇيەندى. ال باشار اساد ينسپەكتورلاردىڭ سيرياعا قايتا ورالاتىندارىن, ولاردىڭ ونداعى مىندەتتەرى ءالى بىتپەگەنىن ەسكەرتتى.
«ءبىز ەشقانداي حيميالىق قارۋ قولدانعان جوقپىز. سەبەبى, ءبىز ول قارۋدى قولدانعان جاعدايدا ءوز اسكەرىمىزبەن قوسا, داماسك ايماعىنىڭ ونداعان مىڭ بەيبىت تۇرعىنىنا جاپا شەكتىرۋشى ەدىك», – دەدى باشار اساد.
ايدار ورىسباەۆ.