كەشە, 13 قىركۇيەك كۇنى استانادا كوكپاردان ازيا چەمپيوناتىنىڭ ءۇشىنشى كۇنگى جارىستارى ءوتتى.
ءبىزدىڭ كوماندا موڭعوليا قۇراماسىمەن كەزدەسىپ, كەزەكتى جەڭىسىنە جەتتى. ەسەپ – 15:2. تاجىكستان تاعى ۇپايلارىن تۇگەندەپ الدى. ولار رەسەيدىڭ التاي رەسپۋبليكاسىنان كەلگەن قانداستارىمىزدى كوكپار ءۇشىن اسا ۇلكەن ەسەپ بولماسا دا, 5:0 ەسەبىمەن ۇتتى. ءسويتىپ, «ا» توبىندا ءبىزدىڭ قۇراما ءۇش رەت جەڭىپ, ءبىرىنشى ورىندى يەلەنسە, ەكىنشى ورىنعا قارسىلاستارىن ەكى رەت ۇتقان تاجىكستان كومانداسى شىقتى.
«ۆ» توبىندا قىرعىزستان كوكپارشىلارى ءۇشىنشى جەڭىسىنە جەتتى. كەشە ولار كورشىلەس قىتايدىڭ شىڭجاڭ ولكەسىنەن قۇرالعان كوماندانى 12:0 ەسەبىمەن ايقىن باسىمدىقپەن ۇتتى. وسى توپتاعى وزبەكستان قۇراماسى تۇركيا كوكپارشىلارىنان 9:1 ەسەبىمەن ايلاسىن اسىرىپ كەتتى. ەندى ەرتەڭ بەسىنشى ورىن ءۇشىن وزبەكستان مەن رەسەي قۇرامالارى, جەتىنشى ورىن ءۇشىن موڭعوليا مەن تۇركيا كوماندالارى كۇش سىناسادى. ال جەكسەنبى كۇنى فينالدىق جانە ءۇشىنشى ورىن ءۇشىن كەزدەسۋلەر وتەدى. تاجىكستان مەن قىتاي قۇرامالارى ءۇشىنشى ورىننىڭ يەگەرىن انىقتاسا, فينالدا قازاقستان مەن قىرعىزستان جىگىتتەرى ازيا چەمپيوندىعى ءۇشىن تالاسادى.
جالپى, ازيا چەمپيوناتى قىزىقتى دا تارتىستى وتۋدە. كوماندالاردىڭ ءبارى كۇن وتكەن سايىن جارىسقا جاقسى دايىندىقپەن كەلگەندەرىن كورسەتىپ جاتىر. كوكپاردا ءبىر كوماندالاردىڭ جەڭىپ, ەكىنشىلەرىنىڭ جەڭىلىپ جاتقاندارىن دا تۇسىنۋگە بولادى. ويتكەنى, قازىر ازيا چەمپيوناتىندا قازاقستان مەن قىرعىزستانعا تەڭ كەلەر ەشكىم جوق. مىسالى, ءبىزدىڭ قۇرامادا بىرنەشە دۇركىن حالىقارالىق تۋرنيرلەردىڭ جەڭىمپازدارى مەن ەل چەمپيوندارى بار. بۇل جىگىتتەردىڭ قولىنا سەركەنى العاندا قارسىلاستارىنىڭ ءوزى ونى كۇشپەن تارتىپ الۋدىڭ ءوزى قيىن ەكەنىن جاقسى بىلەدى. قازاقستان كوكپارشىلارىن ماقتاپ ايتىپ جاتقانىمىز ەمەس, وسى جاعدايدى دا الاتاۋدىڭ ار جاعىنان كەلگەن ايىرقالپاقتى اعايىندارعا قاتىستى ايتۋعا بولادى. بيىلعى باسەكەگە قىرعىزستان قۇراماسىن باس جاتتىقتىرۋشىسى ازيز ۋراليەۆ باستاپ كەلدى. ونىڭ ايتۋىنشا, قۇرامانىڭ دەنى «قابىلان» كومانداسىنان جاساقتالعان. بۇل كوماندا بىلتىر مارات سىبىرباەۆ دەگەن قىرعىزستاننىڭ بەلگىلى كوكپارشىسىنىڭ جەتەكشىلىگىمەن اسانباي اسقاروۆ اتىنداعى حالىقارالىق ءتۋرنيردىڭ جەڭىمپازى اتانعان. قازىر قىرعىزستان كومانداسىنىڭ ەڭ جاسى كوكپارشىلارى 1993 جىلعى بولسا, ەرەسەكتەرى 1980 جىلعى. راسىن ايتقاندا, قىرعىزداردىڭ ازيا چەمپيونى اتاعىنان دامەسى زور. كوكپار ويىنىن وزدەرىنە باياعىدا جەكەشەلەپ, پاتەنت الىپ العان قىرعىزداردىڭ ىشىندە ءبىر قىجىلى بار سياقتى. ونى ازيا چەمپيوناتى كەزىندە بايقاۋ قيىن ەمەس. ولار ءبىرىنشى كۇننەن باستاپ, وزدەرىن استانا تورىندە ءبىر كورسەتىپ, ازيا چەمپيونى اتاعىنا كىمنىڭ لايىقتى ەكەنىن دالەلدەگى كەلەدى.
ءبىزدىڭ قۇراما دا اسپانعا قاراپ جاتقان جوق. اقىرىنداپ, تاكتيكا مەن ستراتەگيانىڭ نەبىر جولدارىن قاراستىرىپ, جىگىتتەردىڭ بويىنا كۇش سالماي, فينالعا شىعىپ وتىر. وسى كۇشتىڭ ءبارىن باسقاعا ەمەس, قىرعىزستانعا ساقتاپ جاتقانىن ءبىز دە تۇسىنەمىز. ەندەشە, ءبارىن فينال كورسەتىپ بەرەدى دەپ ويلايمىز. وسى كۇنى ءبىز ءبارىمىز قازاقستان مەن قىرعىزستاننىڭ اراسىنداعى تارتىستى كەزدەسۋگە كۋا بولامىز.
داستان كەنجالين.
سۋرەتتى تۇسىرگەن ەرلان وماروۆ.