2020 جىلدىڭ 2 ايى ىشىندە جالپى ۇزىندىعى 682 شاقىرىمدى قۇرايتىن 4 اقىلى جول ۋچاسكەسىنەن تۇسكەن قاراجات 643,1 ملن تەڭگەنى قۇرادى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
ونىڭ ىشىندە رەسپۋبليكالىق ماڭىزى بار «نۇر-سۇلتان-تەمىرتاۋ» تاسجولىنان 215,5 ملن تەڭگە, «نۇر-سۇلتان-شۋچينسك» تاسجولىنان 167 ملن تەڭگە, «الماتى-قاپشاعاي» جولىنان 140,1 ملن تەڭگە, «الماتى-قورعاس» جولىنان 120 ملن تەڭگە جينالعان.
وتكەن جىلدىڭ قورىتىندىسىندا اقىلى جول ۋچاسكەلەرىنەن 5,4 ملرد تەڭگەنى جينالعانىن ايتا كەتۋ كەرەك. ونىڭ 3,8 ملرد تەڭگەسى – اقىلى جولداردى كۇتىپ ۇستاۋ شارالارىنا, 1,6 ملرد تەڭگەسى – تولەم الۋ جۇيەسىنە قىزمەت كورسەتۋ شارالارىنا جۇمسالعان.
ەسكە سالا كەتەيىك, 2019 جىلدىڭ جەلتوقسانىندا ينۆەستيتسيالىق كونكۋرستىڭ قورىتىندىلارى بويىنشا جولداردىڭ 11 مىڭ شاقىرىمىندا تولەم الۋ جۇيەسىن ورناتۋ جانە ونى كۇتىپ ۇستاۋ تۋرالى قۇجاتقا قول قويىلدى. كەلىسىمگە سايكەس بيىل رەكونسترۋكتسيادان وتكەن 5,7 مىڭ شاقىرىمدىق جول ۋچاسكەلەرىندە تولەم الۋ جۇيەسى ورناتىلادى دەپ جوسپارلانىپ وتىر. جولداردىڭ قالعان 5,3 مىڭ شاقىرىمى 2024 جىلعا دەيىن رەكونسترۋكتسيالاۋ شارالارىنىڭ اياقتالۋ مەرزىمىنە بايلانىستى اقىلى جۇيەگە كوشىرىلمەك. وسىلايشا, ول جولداردىڭ كۇتىمىنە بيۋدجەتتەن قاراجات بولىنبەيدى.