ەكىنشى دۇنيەجۇزىلىك سوعىستاعى جەڭىستىڭ 75 جىلدىعىنا وراي نۇر-سۇلتان قالاسىندا «اتا-بابالار رۋحىنا – لايىقتى بولامىز!» اتتى رەسپۋبليكالىق پاتريوتتىق اكتسيا باستالدى.
اكتسيا قازاقستان قارۋلى كۇشتەرى (قك) ۇلتتىق اسكەري-پاتريوتتىق ورتالىعىندا قك اسكەري-تاريحي مۇراجايىنىڭ باسشىلىعىنا رەيحستاگقا تىگۋگە راحىمجان قوشقارباەۆقا جۇكتەلگەن جەڭىس تۋىنىڭ كوشىرمەسىن تاپسىرۋ سالتاناتىنان باستالدى. سونىمەن قاتار ەكىنشى دۇنيەجۇزىلىك سوعىس جىلدارىندا قازاقستان اۋماعىندا قۇرىلعان ديۆيزيالار مەن بريگادالاردىڭ 23 جاۋىنگەرلىك تۋلارى قارۋلى كۇشتەر وكىلدەرىنە تاپسىرىلدى.
ەكى اي بويى جاۋىنگەرلىك تۋلار ەلىمىزدىڭ ءار ايماعىندا جەلبىرەيدى. ول جەرلەردە ارداگەرلەردىڭ, اسكەري قىزمەتشىلەردىڭ, «جاس سارباز» قوزعالىسى تاربيەلەنۋشىلەرىنىڭ, جاستار جانە قوعامدىق بىرلەستىك وكىلدەرىنىڭ, مەكتەپ وقۋشىلارى مەن ستۋدەنتتەردىڭ قاتىسۋىمەن سالتاناتتى ءىس-شارالار ۇيىمداستىرىلادى.
جاۋىنگەرلىك تۋ, اسكەري ءبولىمنىڭ رەسمي نىشانى بولىپ تابىلادى. ول ونىڭ ابىرويىن, ايبىنى مەن داڭقىن بەينەلەيدى, ءاربىر اسكەري قىزمەتشىنىڭ بويىنداعى باتىرلىق داستۇرلەرى مەن وتان قورعاۋداعى قاسيەتتى بورىشىن ەسكە سالادى.
«سۇراپىل سوعىس جىلدارى بۇل جاۋىنگەرلىك تۋ بار اۋىرتپاشىلىققا قاراماستان بەرلينگە سالتاناتتى تۇردە جەتتى. بۇگىن سول قان مايداندا قازا بولعان اتا-بابالارىمىزدىڭ ۇرپاقتارىنا, ياعني اسكەري بولىمدەرگە, ديۆيزيالارعا تاپسىرىلادى. جەڭىس تۋى كوش باستاعان جاۋىنگەرلىك تۋلاردىڭ بۇل جولى ەلوردادا 7 مامىر كۇنى وتەتىن سوعىستاعى جەڭىستىڭ 75 جىلدىعىنا ارنالعان اسكەري پارادتا جالعاسىن تابادى. بۇل ءبىزدىڭ وتانداستارىمىزعا, سوعىس باتىرلارىنا كورسەتىلگەن تاريحي ەستەلىك», دەدى قورعانىس ءمينيسترى نۇرلان ەرمەكباەۆ ءوز سوزىندە.
اتالعان ءىس-شاراعا پارلامەنت ءماجىلىسىنىڭ دەپۋتاتتارى, قورعانىس مينيسترلىگىنىڭ باسشىلىعى, سوعىس ارداگەرلەرى احات بەكمادي مەن ولەگ ليننيك, قارۋلى كۇشتەردىڭ ارداگەرلەرى, تاربيە سالاسىنىڭ وفيتسەرلەرى, «جاس ۇلان» اسكەري مەكتەبىنىڭ وقۋشىلارى, «جاس سارباز» قوزعالىسىنىڭ تاربيەلەنۋشىلەرى قاتىستى.
قورعانىس ۆەدومستۆوسىنىڭ باسشىسى سوعىس ارداگەرلەرىنە ءىلتيپات كورسەتىپ, سوعىس ۋاقىتىنىڭ اۋىرتپاشىلىقتارىن باسىنان وتكەرىپ امان قالعان, قيراعان قالالاردى قالپىنا كەلتىرۋدە باتىلدىق تانىتقان باتىرلارىمىز بۇگىندە جاس ۇرپاققا ەرلىك پەن قايسارلىقتىڭ ۇلگىسى ەكەنىن اتاپ ءوتتى.
«اتا-بابالار رۋحىنا – لايىقتى بولامىز!» اكتسياسى بۇكىل ەلدى قامتيتىن بولادى. اسكەري-تاريحي مۇراجايدىڭ كورمەسى مەن ساۋدا ورتالىقتارى جانە حالىق كوپ جينالاتىن ورىنداردا قورعانىس مينيسترلىگى ورتالىق ءانسامبلى ارتىستەرىنىڭ قويىلىمدارى ورنالاستىراتىن بولادى.
بيىل «اتا-بابالار رۋحىنا – لايىقتى بولامىز!» ۇرانىمەن «ەل تىرەگى» اسكەرگە شاقىرۋ جاساعى مەن «جاس سارباز» اسكەري-پاتريوتتىق قوزعالىسىنىڭ قاتارىنا مەكتەپ وقۋشىلارىنىڭ قوسىلۋ راسىمدەرى بولادى.