قازاقتىڭ ۇلى اقىنى اباي قۇنانباي ۇلىنىڭ 175 جىلدىعىنا وراي تاراز قالاسىنداعى «بالاساعۇن» ورتالىق كونتسەرت زالىندا «جەلسىز تۇندە جارىق اي» اتتى كومپوزيتسيالىق كەش ءوتتى.
كورەرمەندى كوركەم كەڭىستىككە تارتقان كونتسەرت-كومپوزيتسيانى اسقار توقپانوۆ اتىنداعى جامبىل وبلىستىق قازاق دراما تەاترىنىڭ شىعارماشىلىق ۇجىمى مەن كەنەن ازىرباەۆ اتىنداعى وبلىستىق فيلارمونيانىڭ ونەرپازدارى شەبەر ۇيلەستىردى. سونىمەن قاتار شارا اياسىندا «ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۋزەيىنىڭ قىزمەتكەرلەرى «اباي مۇراسى – حالىق ۇلاعاتى» اتتى جىلجىمالى كورمەنى كەلۋشىلەر نازارىنا ۇسىندى.
حاكىم شىعارمالارىنا ارنالعان كەشكە كەلگەن كوپشىلىك اۋەلى LED ەكران ارقىلى «تاريح. تاعدىر. تۇلعا» اتتى دەرەكتى ءفيلمدى تاماشالادى. مۇندا ابايدىڭ ءومىرى مەن شىعارماشىلىعىنا قاتىستى دەرەكتەر ايتىلىپ, ابايتانۋشى عالىمدار ءوز پىكىرلەرىمەن ءبولىستى. ال «جەلسىز تۇندە جارىق اي» اتتى كونتسەرت-كومپوزيتسيا اداي جۇمات ديريجەرلىك ەتكەن قازاق ۇلت-اسپاپتار وركەسترىنىڭ ورىنداۋىنداعى ابايدىڭ «تورجورعا» كۇيىمەن اشىلدى. بۇدان كەيىن «مەرەي» توبى اقىننىڭ «جەلسىز تۇندە جارىق اي» ءانىن ناقىشىنا كەلتىرە ورىنداسا, «شولپى» بي ءانسامبلى ءاننىڭ اجارىن اشىپ, ساحنانىڭ ءسانىن كەلتىردى. سونىمەن قاتار وبلىستىق قازاق دراما تەاترىنىڭ ارتىستەرى اقىننىڭ «ولەڭ – ءسوزدىڭ پاتشاسى, ءسوز ساراسى» ولەڭىن وقىسا, ورىس, كارىس, دۇنگەن ۇلتىنىڭ وكىلدەرى اباي شىعارمالارىن ورىندادى. ال, قازاق ۇلت-اسپاپتار وركەسترىنىڭ سۇيەمەلدەۋىمەن حاكىمنىڭ ايگىلى «كوزىمنىڭ قاراسى» ءانىن ورىنداعان مادەنيەت سالاسىنىڭ ۇزدىگى جاناتبەك كادىروۆ كوپتىڭ ىقىلاسىنا بولەندى.
اباي ولەڭدەرى تۇتاس ۇلتتىڭ رۋحاني قاينار كوزى. اقىن ولەڭدەرىندە مۇڭ مەن سىر, قاسيەت پەن قاسىرەت قاتار ورىلەدى. بۇل رەتتە تەاتر ارتىستەرى ابايدىڭ «جىگىتتەر, ويىن ارزان, كۇلكى قىمبات», «قاجىماس دوس حالىقتا جوق», «سەگىز اياق» تۋىندىلارىنان كوركەم كومپوزيتسيا ورىندادى. مۇندا حاكىم شىعارماشىلىعىنىڭ تۇتاس الەمى جاسالىپ, اقىن باسىنداعى وي بەينەتى, سەزىم شارپىلىستارى كەرەمەت كورىنىس تاپتى. مادەنيەت سالاسىنىڭ ۇزدىگى ايگۇل ماقاشەۆا مەن سۇلۋجان ابەنوۆا «سەگىز اياق» ءانىن شىرقاسا, اباي مەن توعجان, اباي مەن ايگەرىم اراسىنداعى ماحاببات داستانى تۋرالى پوەتيكالىق قويىلىم كورەرمەندى بەي-جاي قالدىرمادى.
بۇل كەشتە اباي وپەراسىنان «اجاردىڭ ارياسى», الەكساندر پۋشكيننەن اۋدارعان «ە.ونەگيننىڭ تاتياناعا جازعان حاتى» شىعارمالارى دا ورىندالدى. سونىمەن قاتار اقىننىڭ «ولسەم ورنىم قارا جەر, سىز بولماي ما؟», «ەسىڭدە بار ما, جاس كۇنىڭ؟» اتتى فيلوسوفيالىق ولەڭدەرى وقىلدى. كوپشىلىككە وي سالارلىق, عيبرات الارلىق شارا سوڭىندا ءوڭىر ونەرپازدارىنا جامبىل وبلىسىنىڭ اكىمى بەردىبەك ساپارباەۆتىڭ ىقىلاس گ ۇلى سالتاناتتى تۇردە تابىس ەتىلدى.
جامبىل وبلىسى