«استانا وپەرا» ساحناسىندا ۇسىنىلعان دجۋزەپپە ۆەرديدىڭ جاۋھار تۋىندىسى – «تراۆياتا» ايرىقشا لەپپەن, جاڭا تىنىسپەن كورەرمەنگە جول تارتتى. تەاتر تابالدىرىعىن اتتاعان ساتتەن باستاپ-اق وزگەشە تولقۋ سەزىلىپ, فويەنى اسەم اۋەنگە دەگەن ساعىنىش بيلەدى. زالعا جينالعان قاۋىمنىڭ ىقىلاسى قويىلىم باستالعان العاشقى مينۋتتاردان-اق انىق اڭعارىلدى.
سپەكتاكلگە قاتىسقان ونەر شەبەرلەرىنە كورسەتىلگەن ەرەكشە قۇرمەت تە كەشتىڭ ماڭىزىن ارتتىرا ءتۇستى. مەملەكەت باسشىسى قاسىم-جومارت توقاەۆتىڭ اتىنان ىقىلاس گۇلدەرىنىڭ ۇسىنىلۋى ارتىستەردىڭ ەڭبەگىنە كورسەتىلگەن قۇرمەتتىڭ, رۋحاني قۇندىلىقتارعا بەرىلگەن جوعارى باعاسىنىڭ كورىنىسىندەي اسەر قالدىردى.
ايتۋلى كەشتىڭ باستى كوركەمدىك جۇگىن الەمدىك ءھام وتاندىق وپەرا ساحناسىنىڭ تانىمال جۇلدىزدارى ارقالادى. پاريج, ميلان, لوندون ساحنالارىن باعىندىرعان وتاندىق سوپرانو ماريا مۋدرياك ۆيولەتتا ۆالەري پارتياسىن ورىنداپ, كەيىپكەردىڭ ىشكى دراماسىن تەرەڭ سەزىممەن جەتكىزدى. بۇل ءرول ءانشى ءۇشىن ايرىقشا مانگە يە. ءدال وسى وبرازبەن ول وسىدان ون جىل بۇرىن ەلوردا ساحناسىندا دەبيۋت جاساعان ەدى. ۋاقىت وتە كەلە ونىڭ ۆيولەتتاسى كەمەلدەنىپ, نازىك پسيحولوگيالىق يىرىمدەرمەن تولىعىپ, كورەرمەنگە جاڭا قىرىنان ۇسىنىلدى. ماريانىڭ ورىنداۋىنداعى ۆيولەتتا – نازىكتىك پەن تراگەديانىڭ, ءۇمىت پەن شاراسىزدىقتىڭ توعىسقان بەينەسى. اسىرەسە كەيىپكەردىڭ ىشكى كۇيزەلىسى مەن ماحاببات جولىنداعى قۇرباندىعى ءانشىنىڭ ۆوكالدىق مۇمكىندىگىمەن قاتار, اكتەرلىك شەبەرلىگى ارقىلى شىنايى جەتكىزىلدى.
ال الفرەد جەرمون بەينەسىن سومداعان يسپاندىق تەنور جوەل پريەتو كورەرمەننىڭ ەرەكشە ىقىلاسىنا بولەندى. ونىڭ داۋىسى مەن ساحنالىق حاريزماسى كەيىپكەردىڭ جاستىق جالىنعا تولى تابيعاتىن اشىپ, ماحاببات پەن قىزعانىش, ءۇمىت پەن وكىنىش سەزىمدەرىن نانىمدى جەتكىزدى. الەمدىك دەڭگەيدەگى ساحنالاردا – كوۆەنت-گاردەن, لا سكالا, پاريج ۇلتتىق وپەراسى مەن زالتسبۋرگ فەستيۆالىندە ونەر كورسەتىپ جۇرگەن ءانشىنىڭ ەلىمىزدەگى العاشقى ونەر كورسەتۋى مادەني بايلانىستىڭ كەڭەيۋىنىڭ جارقىن مىسالى بولدى.
جورج جەرمون پارتياسىندا تالعات مۇساباەۆ ساحناعا شىعىپ, قويىلىمنىڭ درامالىق وزەگىن ايقىندادى. ونىڭ ورىنداۋىنداعى اكە بەينەسى قاتالدىق پەن جاناشىرلىقتىڭ, سالقىن ەسەپ پەن ىشكى تولعانىستىڭ ۇيلەسىمى رەتىندە كورىنىس تاپتى. بۇل كەيىپكەر ارقىلى وپەراداعى نەگىزگى مورالدىق قاقتىعىس ايقىندالىپ, وقيعا تەرەڭدەي ءتۇستى.
مۋزىكالىق جەتەكشىلىكتى قولعا العان يتاليالىق ديريجەر دجۋزەپپە اكۋاۆيۆا سپەكتاكلدىڭ تۇتاستىعىن جوعارى دەڭگەيدە قامتاماسىز ەتتى. ونىڭ باسقارۋىنداعى سيمفونيالىق وركەستر ۆەردي مۋزىكاسىنىڭ نازىك ءليريزمىن دە, درامالىق قۋاتىن دا ءدال جەتكىزىپ, ساحناداعى ءاربىر ەموتسيانى كۇشەيتىپ وتىردى. وركەستر مەن سوليستەردىڭ ۇيلەسىمى, حور پارتيالارىنىڭ ناقتىلىعى قويىلىمنىڭ كاسىبي دەڭگەيىن ايقىندادى.
جالپى العاندا, «تراۆياتا» وپەراسىنىڭ بۇل قويىلىمى مۋزىكالىق سپەكتاكل عانا ەمەس, ۇلكەن مادەني ديالوگ الاڭىنا اينالدى. الەمدىك دەڭگەيدەگى ارتىستەر مەن وتاندىق ونەر شەبەرلەرىنىڭ ءبىر ساحنادا توعىسۋى ۇلتتىق تەاتر ونەرىنىڭ حالىقارالىق بەدەلىن نىعايتا ءتۇستى.