ەلباسى ن.ءا.نازارباەۆ ءوزىنىڭ «بولاشاققا باعدار: رۋحاني جاڭعىرۋ» ماقالاسىندا تاريحي مۇرالارىمىزدى كەڭىنەن ناسيحاتتاۋ ماسەلەسىنە ەرەكشە ءمان بەرگەنى بەلگىلى.
اسىرەسە ۇلتتىڭ تەرەڭ تاريحىنان باستاۋ الاتىن مادەني-رۋحاني قۇندىلىقتاردى ساقتاي وتىرىپ, ونى وسكەلەڭ ۇرپاققا جەتكىزۋگە ايرىقشا دەن قويىلعان. وسى ماقساتتا جىل سايىن بايزاق اۋداندىق تاريحي-ولكەتانۋ مۋزەيىندە «مۋزەيگە سىي» اكتسياسى ۇيىمداستىرىلادى. اتالعان اكتسيا بيىل دا جالعاسىن تابۋدا ءارى وعان ءۇن قوسۋشىلار دا بارشىلىق.
جۋىردا مۇراجاي قورى تاعى دا بىرنەشە جادىگەرمەن تولىقتى. اتاپ ايتار بولساق, كوپتەرەك اۋىلدىق وكرۋگىنە قاراستى كەڭەس اۋىلىنىڭ تۇرعىنى ايات ابىلداەۆ مۋزەيگە ءوز قولىمەن جاساعان ات ابزەلى – ەر توقىم مەن التى ءورىمدى قامشىنى سىيعا تارتتى.
بىرنەشە جىلدان بەرى كوپشىلىكتىڭ تاپسىرىسىمەن ەر توقىم, جۇگەن, اۋىزدىق, شىلبىر, قامشى تاعى باسقا جابدىقتاردى جاساپ, حالقىمىزدىڭ قازىنالى ونەرىن دامىتىپ وتىرعان قولونەرشى بۇل بۇيىمدارىن مۇراجايعا سىيلاۋدى ءجون كورىپتى.
– ء«اۋ باستان-اق اتا-بابا تۇرمىسى جىلقى مالىمەن تىكەلەي بايلانىستى بولعاندىقتان, ونىڭ بۇيىم-جابدىقتارىن جاساپ, پايدالانۋ دا وزىندىك ونەر سانالادى. بۇل ءىستى جانىما سەرىك ەتكەنىمە بىرنەشە جىل بولدى. مۇنداي تۇرمىستىق بۇيىمدار كەيىنگى ۇرپاق ءۇشىن اسا باعالى مۇرا بولادى دەپ ەسەپتەيمىن. «مۋزەيگە سىي» اكتسياسى جونىندە باسىلىم بەتىنەن حاباردار بولىپ, مەن دە ءوز ۇلەسىمدى قوسۋىم كەرەك دەپ شەشتىم. بۇل ءاربىرىمىزدىڭ ازاماتتىق پارىزىمىز, – دەيدى ايات اقجولتاي ۇلى.
ال ءبىز ءوز كەزەگىندە شەبەرگە ۇلكەن العىسىمىزدى بىلدىرە كەلە, ونىڭ قولىنان شىققان ەر توقىم مەن قامشىنى مۋزەيدىڭ ەتنوگرافيا زالىنا ورنالاستىرىپ, حالقىمىزدىڭ ات ابزەلدەرىن ۇستاپ-تۇتىنۋداعى ماقسات-مۇددەلەرىن مۋزەي كەلۋشىلەرىنە تۇسىندىرۋدەمىز.
ايدانا شوتباسوۆا,
بايزاق اۋداندىق تاريحي-ولكەتانۋ مۋزەيىنىڭ قور ساقتاۋشىسى