سوڭعى ءۇش جىلدا قازاقستاندا كاسىپكەرلىك سالاسىنداعى زاڭسىز تەكسەرىستەردىڭ كولەمى 970 فاكتىنى قۇراپ, 351 لاۋازىمدى تۇلعا جاۋاپكەرشىلىككە تارتىلدى. بۇل تۋرالى سىبايلاس جەمقورلىققا قارسى ءىس-قيمىل جونىندەگى كاسىپكەرلەردىڭ IV رەسپۋبليكالىق فورۋمىندا سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ ايتتى.
ۆەدومستۆو باسشىسىنىڭ ايتۋىنشا, پارا بەرۋ دەرەگى مەملەكەتتىك جانە كۆازيمەملەكەتتىك ورگانداردان بولەك, جەكەمەنشىك سەكتوردا دا كەڭ ءورىس العان. ماسەلەن, جەكەلەگەن كوممەرتسيالىق بانكتەردە بيزنەستى دامىتۋ ءۇشىن نەسيەنى الۋدىڭ كولەڭكەلى امالدارى جولعا قويىلىپتى. بۇعان قوسا تابيعي مونوپوليالار سالاسىندا دا جەمقورلىق فاكتىسى ازايماي تۇر. اسىرەسە بۇل ەلەكتر جەلىلەرىنە قوسىلۋ, گاز, جىلۋ, سونداي-اق سۋمەن جابدىقتاۋ ماسەلەسىندە وزەكتى دەيدى ا. شپەكباەۆ. اگەنتتىك توراعاسى ءوندىرىس جانە كەن يگەرۋ ونەركاسىبىندە سىبايلاس جەمقورلىق ادەتتى قۇبىلىسقا اينالعانىن جەتكىزدى. ءتىپتى ريتەيل باعىتىندا جىلدار بويى ابدەن پىسىقتالعان زاڭسىز جۇيەلەر قالىپتاسقان دەدى ول.
– ينۆەستورلاردىڭ 600-دەن استام قوردالانعان ماسەلەسى شەشىلدى. بيزنەستىڭ مۇددەسىن قورعاۋدان بولەك, كاسىپكەرلەردىڭ دە ادەبىن وزگەرتۋ بويىنشا جۇمىستار اتقارىلۋدا. كاسىپتى جۇرگىزۋدە ادەپتىلىك باستى مۇرات بولۋى ءتيىس. سىبايلاس جەمقورلىققا قارسى ستراتەگيانى 2025 جىلعا دەيىن كەزەڭ-كەزەڭمەن ىسكە اسىرۋ جالعاستىرىلادى. بيىل سىبايلاس جەمقورلىق ۇعىمىن جەكە سەكتوردا ءتۇسىندىرۋ جۇمىستارى كۇشەيتىلەدى, – دەدى ا.شپەكباەۆ.
اگەنتتىك باسشىسى «قازاگرو» حولدينگىنىڭ ەنشىلەس كومپانياسىنا قاتىستى تەرگەۋ ءجۇرىپ جاتقانىن ايتتى. انىقتالعانداي, «قازاگروعا» قاراستى «اگرارلىق نەسيە كورپوراتسياسى» اق باسشىلىعى زاڭسىز سىياقىعا ارنالعان 11 ملرد تەڭگەنى «حوۋم كرەديت بانكىنىڭ» دەپوزيتىنە سالعان. ايتسە دە بۇل اقشانىڭ نەگىزگى ماقساتى اۋىلداعى كاسىپكەرلىكتى جەڭىلدىكپەن نەسيەلەۋگە ارنالعان ەكەن. دەگەنمەن, سپيكەر تەرگەۋ جۇمىستارى ەندى باستالعانىن ناقتىلادى. بۇدان وزگە كاسىپكەرلەر قۇرىلتايىندا بيزنەستى تسيفرلاندىرۋ, كاسىپكەرلىك سالاداعى سالىق جۇيەسىن اۆتوماتتاندىرۋعا قاتىستى وزەكتى ماسەلەلەر قاۋزالدى.