پرەزيدەنت قاسىم-جومارت توقاەۆ نۇر-سۇلتان قالاسىنداعى ەكسپو ورتالىعى پاۆيلونىندا ەل وڭىرلەرىنەن كەلگەن ۆولونتەر جاستار دەلەگاتسيالارىمەن كەزدەسۋ كەزىندە ولاردى تولعاندىرىپ جۇرگەن ەكى ماسەلەنىڭ كىلتىن قولدارىنا ۇستاتتى. ايتالىق بۇعان دەيىنگى كەزدە ۆولونتەرلىك قىزمەتپەن اينالىسۋشىلار اراسىندا ەڭبەك ءوتىلىنىڭ جاي-كۇيى قالاي بولار ەكەن دەگەن ەكى-ۇشتى ويدا جۇرگەندەر ءجيى كەزدەسىپ قالاتىن. ءسوز جوق, ولاردىڭ بۇل الاڭداۋشىلىعى وتە ورىندى دەۋگە بولادى.
وسى ورايدا مەملەكەت باسشىسىنىڭ كەزدەسۋدە «ۆولونتەرلىك –ەرىككەننىڭ ەرمەگى ەمەس. بۇل ەلدىك ءمانى مەن ماڭىزى جوعارى ءىستىڭ ءبىرى. ۆولونتەرلىك باعىتقا بەت بۇرعاندار ۋاقىتتى بوسقا وتكىزىپ ءجۇرمىن دەگەن ويدان اۋلاق بولۋى كەرەك» دەي كەلە الداعى كەزدە ۆولونتەرلىك جوبالاردى جۇزەگە اسىرۋعا كەتكەن ۋاقىت ەڭبەك وتىلىنە كىرەتىندىگى جونىندەگى تۇجىرىمدى العا تارتتى. بۇل ءسوز ەلىمىزدىڭ ءار تۇكپىرىنەن كەلگەن ۆولونتەر جاستاردىڭ مەرەيىن ءبىر كوتەرىپ تاستادى. ءارى مۇنىڭ ءوزى پرەزيدەنت باستاماسىمەن ومىرگە كەلگەن بارلىق ۆولونتەرلىك باعدارلامالاردى ويداعىداي جۇزەگە اسىرۋعا جان-جاقتى مۇمكىندىك بەرەدى. اتالعان قولداۋ الداعى كەزدە باعدارلاما اياسىنداعى جەتى باعىتتىڭ بارىنە دە ورتاق ەكەندىگى اتقارىلاتىن ىستەردىڭ ارناسىن كەڭەيتە تۇسپەك. ونىڭ ءبارى ء«بىز بىرگەمىز!» اتتى جالپىۇلتتىق ۇرانعا ۇلاسىپ, كەلەشەكتە بەدەرلى ءىزىن سالا الاتىنىنا ەشقانداي كۇمان جوق.
پرەزيدەنتتىڭ ەلىمىزدەگى ۆولونتەرلىك ءىستى قولداۋ مەن ىنتالاندىرۋعا قاتىستى قوزعاعان ەكىنشى ماسەلەسىنىڭ دە الاتىن ورنى مەن سالماعى جوعارى. اتالعان جايت ۆولونتەرلىك سيپاتتاعى جوبالاردى قارجىلاندىرۋ قاجەتتىلىگىنەن تۋىندايدى. مەملەكەت باسشىسىنىڭ مالىمدەۋىنشە, مۇنداي تەتىكتەردى ورنىقتىرۋدىڭ بىرنەشە جولدارى بار. سونىڭ ەڭ باستىسى, بەلگىلى ءبىر باعىت بويىنشا ءوز جوبالارىن جەرگىلىكتى اتقارۋشى ورگاندار مەن اقپارات جانە قوعامدىق دامۋ مينيسترلىگىنە ۇسىنعان ۆولونتەرلىك توپتار مەن قۇرىلىمدارعا ارنايى گرانتتار بەرۋ بولماق. ونىڭ كولەمى – 300 مىڭ مەن 1 ملن تەڭگە توڭىرەگىندە بەلگىلەنەتىن كورىنەدى.
ءبىزدىڭ جوعارى وقۋ ورنىندا ۆولونتەر بولۋعا تالاپ-تىلەك بىلدىرگەن ستۋدەنتتەردىڭ قاتارى جىلدان-جىلعا ءوسىپ كەلەدى. ولاردىڭ دەنى كۇللى الەۋمەتكە پايداسى مەن شاپاعاتىن تيگىزە الاتىن ومىرشەڭ جوبالار. وسى تۇرعىدان كەلگەندە پرەزيدەنت قاسىم-جومارت توقاەۆ ەلىمىزدىڭ بارلىق وڭىرىنەن جينالعان ۆولونتەر جاستارعا الداعى ۋاقىتتا اتقارىلاتىن ناقتى ءىس-قيمىل جوسپارىن شەگەلەپ ايتىپ بەرگەنى ءبىزدىڭ جاڭا جوبالاردى قولعا الۋىمىزعا سەرپىن بەرەدى. اقىن تولەگەن ايبەرگەنوۆتىڭ ولەڭ شۋماعىمەن ورسەك, بۇل «جانام دەگەن جۇرەككە وت بەرۋدىڭ» تاپتىرماس جولى بولىپ شىعادى.
نارقوزى قارتجان,
ۆولونتەر, ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى جاستار ىستەرى جونىندەگى كوميتەتتىڭ توراعاسى
اقتوبە