كەنشىلەر استاناسىنداعى وڭىرلىك كوممۋنيكاتسيالار قىزمەتىندە وتكەن بريفينگتە قاراعاندى وبلىستىق «رۋحاني جاڭعىرۋ» جوبالىق كەڭسەسىنىڭ جەتەكشىسى گۇلنار قۇربانباەۆا وڭىردەگى ءاربىر ەكىنشى كاسىپكەردىڭ اتالعان باعدارلاما جوباسىنىڭ قاتىسۋشىسى ەكەنىن ءمالىم ەتتى.
وتكەن جىلى وبلىستا «رۋحاني جاڭعىرۋ» باعدارلاماسى اياسىندا جوبالار سانى 200-دەن 1 مىڭعا دەيىن وسكەن. وبلىس تۇرعىندارى ۇسىنعان قىزىقتى يدەيالاردى كاسىپكەرلەر قىزۋ قولداپ وتىرعان. مىسالى, بۇگىنگى كۇنگە دەيىن ءومىر ءسۇرۋدى جاقسارتۋ بويىنشا 25-تەن استام جوبا مەتسەناتتار تاراپىنان قارجىلاندىرىلعان جانە ىسكە اسىرىلعان.
– قايىرىمدىلىق اكتسيالارعا قاتىساتىن الەۋمەتتىك جوبالار مەن ادامدار سانى ارتا باستادى. الەۋمەتتىك جوبالاردىڭ كوپشىلىگىن مەتسەناتتار مەن ەرىكتىلەر جۇزەگە اسىرادى. ياعني, 88 مىڭ كاسىپكەرلىك سۋبەكتىنىڭ جارتىسى – «رۋحاني جاڭعىرۋ» باعدارلاماسىن جۇزەگە اسىرۋعا قاتىساتىن ءبىزدىڭ بەلسەندى كاسىپكەرلەرىمىز, – دەدى گۇلنار قۇربانباەۆا.
سونداي-اق بريفينگتە قاراعاندى وبلىسى اكىمىنىڭ «رۋحاني جاڭعىرۋ» باعدارلاماسىن جۇزەگە اسىرۋ ماسەلەلەرى بويىنشا شتاتتان تىس كەڭەسشىسى بەكزات التىنبەكوۆ اعىمداعى جىلعا ارنالعان جوسپارلار تۋرالى باياندادى. ەڭ ءبىرىنشى كەزەكتە وسكەلەڭ ۇرپاقتى وتانسۇيگىشتىك رۋحتا تاربيەلەۋگە ايرىقشا كوڭىل بولىنەتىنىن اتاپ ءوتتى ول.
– بيىل وڭىردە بىرنەشە جوبا جۇزەگە اسىرىلادى. مىسالى, ابايدىڭ 175 جىلدىعىنا ارنالعان ءىس-شارالار اياسىندا «ابايدىڭ ىنىلەرى – قازاقتىڭ ىرىلەرى» اتتى پوەزيا كۇنىن وتكىزۋ جوسپاردا بار. سونداي-اق, بيىل قاراعاندى وبلىسىنىڭ «100 جاڭا ەسىم» انىقتالىپ, ءار اۋدان مەن قالا بويىنشا كورنەكتى تۇلعالاردىڭ ءتىزىمى جاسالادى. قاسيەتتى جەرلەردىڭ سايتى جانە ولارعا جولسىلتەمەلەر ازىرلەنەدى. سونىمەن قاتار «تۋعان جەرگە تۋىڭدى تىك» اتتى جەرلەستەر فورۋمىن وتكىزبەكپىز, – دەدى بەكزات التىنبەكوۆ.
بريفينگكە قاتىسقان وبلىستىق ىشكى ساياسات باسقارماسىنىڭ باسشىسى ەرلان قۇسايىن بيىل جاريالانعانىنا ءۇش جىل تولعان «رۋحاني جاڭعىرۋ» باعدارلاماسىنىڭ اياسىنداعى جۇمىستارعا جەرگىلىكتى اتقارۋشى بيلىك تاراپىنان الداعى ۋاقىتتا دا ايرىقشا ءمان بەرىلەتىنىن اتاپ ءوتتى.
قاراعاندى