بۇگىن «استانا جاستارى» ۆولونتەرلەرى العىس ايتۋ كۇنىنە وراي ء«بىز بىرگەمىز» اكتسياسى اياسىندا ترانسفۋزيولوگيا عىلىمي-وندىرىستىك ورتالىعىندا قان تاپسىردى. بۇل تۋرالى قالا اكىمدىگىنىڭ رەسمي سايتى حابارلادى.
قايىرىمدىلىق شاراسىنا 70 استانالىق ۆولونتەر قاتىستى. سولاردىڭ ءبىرى - ايان ەرمەنتاەۆ. ەرىكتى وسىمەن بەسىنشى جىل قاتارىنان دوناتسياعا قاتىسىپ جاتىر. ولاردىڭ ارقايسىسى 450 مل قان تاپسىردى.
«ەلوردالىق جاستار ء«بىز بىرگەمىز» اكتسياسى اياسىندا توپتاسا وتىرىپ, ارداگەرلەردىڭ, جالعىز باستى انالار مەن زەينەتكەرلەردىڭ اۋلاسىن قاردان تازالاۋدان بولەك, تۇراقتى تۇردە دونور رەتىندە قان تاپسىرۋ شاراسىنا قاتىسادى. ءبىر دونور - ءبىر ءومىر دەمەكشى, ءبىزدىڭ يگى ءىسىمىز كوپتەگەن ادامداردىڭ ءومىرىن قۇتقارۋعا سەپتىگىن تيگىزەدى دەپ ويلايمىن. وسى كومەكتىڭ ارقاسىندا ءبىز بىرەۋدىڭ اناسىنىڭ, اكەسىنىڭ, بالاسى مەن باۋىرىنىڭ ءومىرىن ساقتاپ قالامىز. ءبىز وسى ارەكەتىمىزبەن ازاماتتاردى قان تاپسىرىپ, كومەك كورسەتۋگە شاقىرامىز. ءار ادام وسىنداي قيىن جاعدايعا تاپ بولۋى مۇمكىن», - دەدى ول.
ايتا كەتەيىك, قىس باستالعاننان بەرى ۆولونتەرلەر ارداگەرلەرگە, زەينەتكەرلەر مەن جالعىزباستى انالارعا اۋلالارىن تازارتۋعا قولداۋ كورسەتىپ كەلەدى. العىس ايتۋ كۇنىنە وراي «ارداگەرلەرگە مىڭ العىس» جوباسى اياسىندا ارداگەرلەرگە ازىق-ت ۇلىك سەبەتتەرىن تاراتۋدا.
ترانسفۋزيولوگيا عىلىمي-وندىرىستىك ورتالىعىنىڭ دارىگەرى ايدوس كەنجيننىڭ ايتۋىنشا, ورتالىققا كۇنىنە 100-گە جۋىق ادام قان تاپسىرۋعا كەلەدى.
ء«بىزدىڭ ورتالىققا كۇنىنە 100-گە جۋىق ادام دونور رەتىندە قان تاپسىرادى. سوڭعى ەكى جىلدا دوناتسياعا قاتىسۋشى ادامدار سانى كوبەيدى. اتاپ ايتساق, 2018 جىلى 34 مىڭعا جۋىق, ال 2019 جىلى 35 مىڭعا جۋىق ادام قان تاپسىردى. مەديتسينالىق تەكسەرىستەن وتكەن ادامنان ستاندارت بويىنشا 450 مل قان 10-12 مينۋتتا الىنادى. سودان كەيىن قان قۇرامى زەرتحانالىق تەكسەرىستەن ءوتىپ, كارانتينگە جىبەرىلەدى. بىراق ءبىر ايدان كەيىن دونور مۇمكىندىگىنشە قايتا كەلىپ قان تاپسىرىپ كەتكەنى دۇرىس», - دەدى ورتالىق دارىگەرى.
ايتا كەتسەك, اكتسياعا قوسىلعىسى كەلەتىن تۇرعىندار قان تاپسىرار الدىندا ىشىمدىك, شىلىمنان باس تارتىپ, مەديتسينالىق دارىلەردى قابىلداماعان ءجون. سونداي-اق دوناتسيا كۇنى جەڭىل تۇردە تاماقتانۋى قاجەت.