بۇل تۋرالى ماڭعىستاۋ وبلىسىنىڭ اكىمى سەرىكباي ترۇموۆ تۇرعىندارعا ەسەپ بەرۋ بارىسىندا باياندادى. سونىمەن قاتار ايماق باسشىسى تۇرمىستىق قالدىقتاردى وڭدەۋ, قورشاعان ورتانى قورعاۋ بويىنشا اتقارىلعان جۇمىستارعا دا توقتالدى.
-قاراقيا اۋدانىنىڭ سەنەك اۋىلى, ماڭعىستاۋ اۋدانىنىڭ تۇششىقۇدىق جانە شەبىر اۋىلدارىن كوشپەلى قۇمداردان قورعاۋ, تۇيەسۋ جانە بوستانقۇم قۇمدى الاپتارىنداعى وسىمدىك جابىندىسىن قالپىنا كەلتىرۋگە 2019 جىلى جەرگىلىكتى بيۋدجەتتەن 166 ملن. تەڭگە ءبولىندى, دەدى ايماق باسشىسى.
ماڭعىستاۋ وبلىسىندا تۇرمىستىق قاتتى قالدىقتاردىڭ (تقق) 66,2%-ى پوليگوندارعا شىعارىلادى. پوليگونداردا تۇزىلگەن تقق كولەمى 2019 جىلدا 188,3 مىڭ توننانى قۇراپ, ونىڭ 63,7 مىڭ تونناسى نەمەسە 33,8%-ى كادەگە جاراتىلعان.
2019 جىلدىڭ باسىندا «اقتاۋتازاقالا» جشس-ءنىڭ جەكە ينۆەستيتسياسى ەسەبىنەن قالدىقتاردى سۇرىپتاۋ ستانتسياسى مۇنايلى اۋدانىندا ورناتىلىپ, 25 000 توننا قالدىق سۇرىپتالىپتى.
-قاراقيا اۋدانىنىڭ جەتىباي جانە قۇرىق ەلدى مەكەندەرىندەگى تقق پوليگوندارىنىڭ جانىنان «ماڭعىستاۋ تازالىق» جشس-ءنىڭ جەكە ينۆەستيتسياسىنىڭ ەسەبىنەن قالدىقتاردى سۇرىپتايتىن ەكى الاڭ ىسكە قوسىلدى. 2019 جىلى 750 توننا قالدىقتى سۇرىپتادى, دەدى وبلىس اكىمى.