2020 جىلى ەكونوميكانىڭ ءتۇرلى سالالارىندا 111,0 ملرد. تەڭگەگە 17 جوبانى ىسكە قوسۋ جوسپارلانعان. ناتيجەسىندە, 1200-دەن استام جۇمىس ورنى اشىلادى دەپ كوزدەلىپ وتىر. بۇل تۋرالى ماڭعىستاۋ وبلىسىنىڭ اكىمى سەرىكباي ترۇموۆ ايماق تۇرعىندارى الدىندا ەسەپ بەرۋىندە مالىمدەدى.
2020 جىلعا جوسپارلانعان ەڭ ماڭىزدى جوبالار - اقتاۋ قالاسى اۋماعىندا جىلى جاعاجاي اۋدانىندا تۋريستىك-قوناق ءۇي كەشەنى, تۇپقاراعان اۋدانىندا قۇس فابريكاسى, شاعىن گاز پورشەندى ەلەكتر ستانتسيالارى بازاسىندا «قازاق گاز وڭدەۋ زاۋىتى» جشس ءۇشىن ەلەكتر ەنەرگياسىن ءوندىرۋ, پوليپروپيلەن قاپتاماسىن ءوندىرۋ, قانت شيكىزاتىن قايتا وڭدەۋ جانە ونىڭ نەگىزىندە قانت قۇمى مەن نابات ءوندىرىسى بويىنشا شاعىن زاۋىتى.
«اقتاۋ تەڭىز پورتى» اەا اۋماعىندا 30 مەكەمە, ونىڭ ىشىندە 1 ترانسۇلتتىق كومپانيانى (تەناريس) قوسا العاندا, شەتەلدىك كاپيتالدىڭ قاتىسۋىمەن 10 كومپانيا تىركەلگەن. بۇگىنگى كۇنى اتالعان اۋماقتا 1500-دەن استام جۇمىس ورنى قۇرىلعان. 18 كاسىپورىن جۇمىس ىستەيدى.
2019 جىلى «Satex Chemie» جشس – بيتۋم ەمۋلسياسى نەگىزىندە گيدرو وقشاۋلاعىش ماتەريالدار ءوندىرۋ جوباسى ىسكە قوسىلدى.
2020 جىلعا جالپى سوماسى 3,9 ملرد تەڭگەگە 247 جاڭا جۇمىس ورنىن قۇرۋمەن «بولات قۇيۋ ورتالىعى» جشس بولاتتان جاسالعان بۇيىمدار ءوندىرىسى (جوبا قۇنى - 871 ملن تەڭگە, 15 جۇمىس ورنى), «PERAPLASTIC SEZ» جشس پوليپروپيلەن قاپتاماسىن ءوندىرۋ. (جوبا قۇنى – 2,8 ملرد تەڭگە, 200 جۇمىس ورنى), «دوستىق-پوليمەر پليۋس» جشس پوليمەرلىك ورام (ىدىس) ءوندىرىسى (جوبا قۇنى - 295 ملن. تەڭگە, 32 جۇمىس ورنى) سىندى 3 جوبانى ىسكە قوسۋ جوسپارلانعان.
ينۆەستيتسيا كولەمىن ۇلعايتۋ بويىنشا جۇمىستاردى جالعاستىرۋ ماقساتىندا جىل باسىنان بەرى الەمنىڭ 10-نان استام ەلىنەن, ۇلىبريتانيا, قىتاي, گەرمانيا, ءباا, شۆەيتساريا, يتاليا, فرانتسيا, تۇركمەنستان, رەسەي جانە ت.ب. ەلدەرىنەن الەۋەتتى ينۆەستورلار مەن كەزدەسۋلەر وتكىزىلىپ, وندا ينۆەستورلار ەنەرگەتيكا, كولىك جانە لوگيستيكا, اۋىل شارۋاشىلىعى, قالالىق ينفراقۇرىلىم جانە ت.ب. سياقتى ەكونوميكا سالالارىنداعى جوبالاردى ىسكە اسىرۋعا قىزىعۋشىلىق تانىتتى.
2019 جىلدىڭ 17-18 مامىرىندا «استانا ەكونوميكالىق فورۋمى» اياسىندا ماڭعىستاۋ وبلىسى «استانانىڭ حالىقارالىق قارجى ورتالىعىمەن» بىرلەسىپ «Global Silk Road Mangystau invest 2019» حالىقارالىق ينۆەستيتسيالىق فورۋمىن وتكىزدى. ونىڭ بارىسىندا استانانىڭ حالىقارالىق قارجى ورتالىعى مەن حالىقارالىق قۇقىق قاعيداتتارىندا ينۆەستورلارمەن جۇمىس جۇرگىزۋ بويىنشا مەموراندۋمعا قول قويىلدى.
فورۋم قورىتىندىسى بويىنشا ينۆەستورلارمەن ماڭعىستاۋ وبلىسىندا 2,2 ملرد. اقش دوللار سوماعا 4 ينۆەستيتسيالىق جوبانى جۇزەگە اسىرۋ تۋرالى كەلىسىمگە قول جەتكىزىلدى. اتاپ ايتقاندا, ولار - «ولەفيندەر مەن مەتانول وندىرەتىن زاۋىت سالۋ», -«لوگيستيكالىق ورتالىقتىڭ قۇرىلىسى», «بەسكەمپىر كەن ورنى بازاسىندا شويىن زاۋىتىن سالۋ» جانە «كومىرسۋتەك شيكىزاتىن قايتا وڭدەۋ كەشەنىن سالۋ».