بەينەۋ اۋدانىنىڭ اكىمى بەينەۋبەك ءابىلوۆ تۇرعىندار الدىندا ەسەپ بەردى.
اۋداننىڭ وتكەن جىلداعى جالپى الەۋمەتتىك ەكونوميكالىق دامۋى مەن 2020 جىلداعى مىندەتتەرى سارالاندى. قورىتىندى جيىنعا وبلىس اكىمى سەرىكباي ترۇموۆ جانە باسقارما باسشىلارى قاتىستى. الەۋمەتتىك سالا, ينفراقۇرىلىم, اۋىل شارۋاشىلىعى جانە جۇمىسپەن قامتۋ ماسەلەلەرى بويىنشا اتقارىلعان جۇمىستار جان جاقتى باياندالدى. بۇل جايىندا ماڭعىستاۋ وبلىسى اكىمىنىڭ ءباسپاسوز قىزمەتى حابارلادى.
اۋدان بيۋدجەتىنىڭ ءبۇيىرىن تولتىراتىن سالىقتاردىڭ ءتۇسىمى دە بىلتىرعى جىلمەن سالىستىرعاندا بىرنەشە پايىزعا ارتقان. ياعني 43,3 % كوبەيىپ, 14,4 ملرد تەڭگەنى قۇرادى. مەنشىكتى كىرىستەردىڭ ورىندالىسى 105,5% بولسا, دامۋ بيۋدجەتتى 100 %, رەسپۋبليكالىق ترانسفەرتتەرى 99,2% جەتتى. ءوڭىر ەكونوميكاسىن ورگە سۇيرەپ وتىرعان ونەركاسىپ سالاسىندا اتقارىلعان جۇمىستارعا كەڭىنەن توقتالىپ ءوتتى. ءوز ءىسىن اشىپ, كاسىپكەرلىككە بەت بۇرعان بەينەۋلىكتەردىڭ سانى ارتىپ كەلەدى.
«بيزنەستىڭ جول كارتاسى-2020» باعدارلاماسى اياسىندا وتكەن جىلى 113,3 ملن تەڭگەگە 11 جوبا ماقۇلدانىپ قولداۋ كورسەتىلدى. ونىڭ ىشىندە: 49,4 ملن تەڭگەگە 2 جوبا سۋبسيديالاندى, 62,9 ملن تەڭگەگە 8 جوبا كەپىلدەندىرىلدى. جاڭا بيزنەس يدەيالارعا 1,0 ملن تەڭگە كولەمىندە مەملەكەتتىك گرانت بەرىلدى.
مونيتورينگ بويىنشا اۋداندا 845 كاسىپكەرلىك نىسان حالىق يگىلىگىنە جۇمىس جۇرگىزۋدە. نەگىزگى ونەركاسىپ ءونىمىنىڭ كولەمى 81,8 ملرد تەڭگەگە, كاپيتالعا سالىنعان ينۆەستيتسيا 36,4 ملرد تەڭگەگە جەتتى. ونەركاسىپتىك ءوندىرىستىڭ ناقتى يندەكسى 100,8% بولسا, ينۆەستيتسيا كولەمى 104,5% قۇرادى.