ورال قالاسىنا قاراستى ەلدىمەكەندەردەگى بالاباقشا ماسەلەسى تۋرالى بۇرىن دا ءسوز قوزعاعان بولاتىنبىز. قالا ىرگەسىندەگى 2 مىڭنان اسا تۇرعىنى بار جەلاەۆ اۋىلى دا بۇگىنگە دەيىن مەكتەپ ىشىندەگى شاعىن ورتالىقتى قاناعات ەتىپ كەلگەن.
جەلاەۆ تۇرعىندارى وسى بالاباقشانى 40 جىل كۇتىپتى. بۇعان دەيىن اكىمدەردىڭ حالىقپەن كەزدەسۋىندە ايتىلعان امانات اقىرى ورىندالدى. اۋىلدان ارنايى عيمارات تاڭدالىپ, ءۇش اي ىشىندە تولىق جوندەۋدەن وتكەن. كوممۋنيكاتسيا جەلىلەرى تارتىلىپ, مەكتەپكە دەيىنگى مەكەمەگە قاجەتتى بارلىق قۇرالمەن جابدىقتالعان عيماراتقا ەندى 2 جاستان جوعارى بۇلدىرشىندەر قابىلداناتىن بولدى. مۇندا ويىنالاڭدارى, دەمالىس بولمەلەرى, اكت زالى, سپورت زالى, ادىستەمەلىك كابينەت, مەديتسينالىق قىزمەت بولمەسى, يزولياتور, تاماق پىسىرەتىن ورىن – ءبارى بار.
- بيىل قالا بويىنشا مەكتەپكە دەيىنگى ۇيىمداردىڭ جۇمىسىن كەڭەيتۋدى قولعا الىپ وتىرمىز. ياعني, قازىرگى ۋاقىتتا بوس تۇرعان, پايدالانىلماي جاتقان عيماراتتاردى حالىق يگىلىگىنە بەيىمدەۋ باعىتىنداعى جۇمىستار جالعاسادى. قالامىزدا وسىنداي بىرنەشە بالاباقشا اشىلادى. جاقىندا ورتالىقتان بۇرىن بالاباقشا بولعان, كەيىن باسقا ماقساتتا پايدالانىلعان عيماراتتى قايتادان بەيىمدەپ, جەكە ينۆەستيتسيانى تارتۋ ارقىلى 280 ورىندىق بالاباقشا اشۋدى كوزدەپ وتىرمىز. مۇنىڭ بارلىعى مەملەكەتتىڭ قولداۋىمەن, مەملەكەتتىك باعدارلامالاردىڭ ارقاسىندا كىشكەنتاي بۇلدىرشىندەرىمىز ءۇشىن زامانعا ساي ءتالىم-تاربيە, ساپا ءبىلىم بەرۋ ءۇشىن جۇزەگە اسىرىلىپ جاتىر. قۇرمەتتى اتا-انالار, بۇرىن بالالارىڭىزدى مەكتەپكە اپارىپ جۇردىڭىزدەر, ەندى مىنە, بۇلدىرشىندەرگە ارنالعان بالاباقشا بولەك عيماراتقا يە بولدى. بۇل بالاباقشا ۇلكەن تاربيە ورتالىعىنا اينالىپ, وسى جەردەن تۇلەپ شىققان بۇلدىرشىندەرىمىز ەلدىڭ بەتكە ۇستار ازاماتتارى بولۋىنا تىلەكتەسپىن! – دەدى اۋىلدىقتاردىڭ قۋانىشىن بولىسكەن ورال قالاسىنىڭ اكىمى ابات شىنىبەكوۆ.
بۇگىندە ورال قالاسىندا مەكتەپكە دەيىنگى ۇيىمداردا 15 مىڭنان استام ءبۇلدىرشىن تاربيەلەنىپ جاتىر. جالپى وبلىس ورتالىعىندا مەكتەپكە دەيىنگى 135 ۇيىم بولسا, ونىڭ 50-ءى – مەملەكەتتىك, 50-ءى – جەكەمەنشىك, ال قالعانى شاعىن ورتالىق رەتىندە جۇمىس ىستەپ تۇر.
باتىس قازاقستان