ءبىلىم ورداسىنىڭ 10-11-سىنىبىندا وقيتىن اقتاۋ قالاسىنداعى نازارباەۆ زياتكەرلىك مەكتەبىنىڭ 10 وقۋشىسى قاڭتاردىڭ 30-ى مەن اقپاننىڭ 1-ءى ارالىعىندا فرانتسيانىڭ ليون قالاسىندا وتەتىن بۇۇ مودەلى دۇنيەجۇزىلىك جاستار كونفەرەنتسياسىنا قاتىسادى.
الەمدەگى بەلسەندى جاس كوشباسشىلاردىڭ باسىن قوسقان بۇۇ مودەلى كونفەرەنتسياسىنىڭ بيىلعى تاقىرىبى «سۋ: وزگەرىستەرگە قۇلشىنىس» دەپ اتالادى. بۇل تۋرالى اقتاۋ قالاسىنداعى نازارباەۆ زياتكەرلىك مەكتەبىنىڭ ءباسپاسوز قىزمەتى حابارلادى.
بۇگىن نۇركامال ءاليحان, قۇرالاي سانات, ايدانا باكيتوۆا كامشات اقمۇراتوۆا, ميرلانبەك شانشاروۆ, اقبوتا الپامىسوۆا, دانا ەسبەرگەنوۆا, اقجىبەك ساعىندىققىزى, حيسامي توميريس كونفەرەنتسياعا قاتىسۋ ءۇشىن جولعا شىقتى. كونفەرەنتسيا قاتىسۋشىلارى الەمدەگى سۋ پروبلەمالارىنا توقتالىپ, پىكىرتالاستار سايىسىنا قاتىسادى دەپ جوسپارلانىپ وتىر.
- بۇل وقۋشىلار مەكتەبىمىزدە ەكى جىل بۇرىن قۇرىلعان بۇۇ مودەلى كلۋبىنىڭ بەلسەندى مۇشەلەرى. كلۋب مۇشەلەرى بۇۇ قابىلداعان قۇجاتتامالارعا سايكەس جەر بەتىندەگى قاۋىپسىزدىك پەن بەيبىتشىلىكتى ساقتاۋعا ارنالعان تۇراقتى دامۋ ماقساتتارىن نەگىزگە الىپ جۇمىس ىستەيدى. دۇنيە جۇزىندە كەڭىنەن تارالعان تاجىريبەنى اقتاۋدا العاش بولىپ جۇزەگە اسىرۋشى جاستار, - دەيدى بالالارمەن اتتانعان مەكتەپ ديرەكتورىنىڭ ورىنباسارى ءاليا حاسەنەەۆا.
فرانتسيانىڭ وڭتۇستىگىندە ورنالاسقان ليون قالاسىندا وتەتىن جاستار كونفەرەنتسياسىنا اقتاۋلىق وقۋشىلار تۇڭعىش رەت قاتىسقالى وتىر. جيىندى ليونداعى حالىقارالىق مەكتەپ پەن سكولە حالىقارالىق ۋنيۆەرسيتەتىنىڭ بەلسەندى ستۋدەنتتەرى بيىل سەگىزىنشى رەت وتكىزگەلى وتىر.
- بۇۇ مودەلى مەكتەبىمىزدە تۇراقتى جۇمىس ىستەپ كەلە جاتقان كلۋبتاردىڭ ءبىرى. ۇيىمنىڭ ماقساتى - الەمدىك پروبلەمالارعا جاستاردىڭ نازارىن اۋدارىپ, وزەكتى پروبلەمالاردى تالقىلاۋ ارقىلى شەشۋگە ۇمتىلۋ. بۇل ءبىزدىڭ ديپلوماتيالىق جانە كوشباسشىلىق قابىلەتتەرىمىزدى ارتتىرادى دەپ ەسەپتەيمىن. الداعى ءۇش كونفەرەنتسيادا تاريحي قاۋىپسىزدىك كەڭەسى كوميتەتىندە ءسوز سويلەيمىن, - دەيدى كونفەرەنتسيا قاتىسۋشىسى ايدانا باكيتوۆا.