بيىلدان باستاپ تۇڭعىش رەت وڭىرلىك كاسىپكەرلەر پالاتاسى مەن وعان قاراستى فيليال باسشىلارى ىسكەرلەر الدىندا ەسەپتىك كەزدەسۋ وتكىزەتىن بولدى. ماڭعىستاۋدا بۇل كەلەلى شارانى مو كاسىپكەرلەر پالاتاسى مۇنايلى اۋداندىق فيليالىنىڭ ديرەكتورى ءمادينا جانجىگىتوۆا باستادى. الدىمەن وبلىستاعى ىرگەلى كاسىپورىنداردىڭ ءبىرى «كاسكور-ماشزاۆود» اق ۇجىمىنا اتقارىلعان جۇمىستار تۋرالى باياندادى. اشىق سۇحبات الاڭىندا كاسىپورىن قىزمەتكەرلەرى نەسيە الۋ, بيزنەستى وركەندەتۋ, كاسىپكەرلىكتى سۇيەمەلدەۋ سىندى سۇراقتارىنا تۇشىمدى جاۋاپ الدى دەپ حابارلايدى مو كاسىپكەرلەر پالاتاسىنىڭ ءباسپاسوز قىزمەتى.
م.جانجىگىتوۆا مۇنايلى اۋداندىق اكىمدىگىنىڭ ءماجىلىس زالىندا اۋدان كاسىپكەرلەرىنىڭ الدىندا ەسەبىن جالعاستىردى. ماڭىزدى شاراعا اۋدان اكىمى راحات ەليزاروۆ پەن وڭىرلىك كاسىپكەرلەر پالاتاسىنىڭ ديرەكتورى نۇربەك قاراساەۆ تا قاتىستى. مۇنايلى اۋدانىندا پالاتا فيليالى جۇمىسىن 2015 جىلى باستادى. سودان بەرى اۋدان بويىنشا كاسىپكەرلىك سەكتورىن دامىتۋ, كاسىپكەرلەردىڭ مۇددەلەرىن قورعاۋ, كاسىپكەرگە قولايلى جاعدايلاردى قامتاماسىز ەتۋ, كاسىپكەرلىك سالاسىندا مەملەكەتتىك ساياساتتى, بيزنەستى جانە اكىمشىلىك ءوزارا ءىس-قيمىلداردى جەتىلدىرۋ, سەرۆيستىك قىزمەت كورسەتۋ قىزمەتتەرىن اتقارىپ كەلەدى.
مۇنايلى اۋدانىندا قازىر 140 مىڭداي ادام تۇرادى. 5700-دەي بيزنەس سۋبەكتى تىركەلگەن. ولارداعى جۇمىسپەن قامتىلعان ادامدار سانى - 10 097. «بيزنەستىڭ جول كارتاسى - 2020» بيزنەستى قولداۋ مەن دامىتۋدىڭ بىرىڭعاي باعدارلاماسى اياسىندا كەپىلدەندىرۋ بويىنشا 31, سۋبسيديالاۋ نىسانىندا 35 جوباعا مەملەكەتتىك قولداۋ كورسەتىلدى.
وتكەن جىلى اۋداندىق فيليالدا كاسىپ اشۋ بويىنشا 100 ادامعا كەڭەس بەرىلگەن, تاعى 50-نە بيزنەس جوسپار جاساقتاۋ بويىنشا كومەك جاسالدى. مەملەكەتتىك باعدارلامالار بويىنشا كەڭەستەر 840 كاسىپكەرگە, زاڭگەرلىك كەڭەستەر 35 ىسكەرگە, بۋحگالتەرلىك كەڭەستەر 92 ادامعا, نەسيە الۋعا دايىندالاتىن قۇجاتتار بويىنشا سۇيەمەلدەۋ 60 كاسىپكەرگە جاسالدى.
ەسەپتىك كەزدەسۋ وتە ەركىن, اشىق ءوتتى. ىسكەرلەردى اۋىل شارۋشىلىعىنا سۋبسيديا الۋ, بيزنەستى وركەندەتۋگە كەپىلسىز نەسيە, قىسقا مەرزىمدى كۋرستاردا وقۋ ماسەلەلەرى تولعاندىراتىن بولىپ شىقتى.
اۋداندىق كاسىپكەرلەر پالاتاسىنىڭ ديرەكتورى ءمادينا جانجىگىتوۆا: «اۋدانداعى كاسىپكەرلەردىڭ قۇقىقتارىن قورعاۋ جۇمىستارى دا ناتيجەلى بولدى. 2019 جىلى بارلىعى 28 كاسىپكەردىڭ قۇقىعى قورعالدى. “باستاۋ” جوباسىمەن اۋداندا تىڭداۋشىلار 6 توپقا ءبولىنىپ وقىتىلدى. بارلىعى 313 قاتىسۋشى وقۋمەن قامتىلدى, ونىڭ ىشىندە 39 قاتىسۋشى گرانت يگەرى اتاندى.
«جاس كاسىپكەر» جوباسىمەن 108 قاتىسۋشى وقىپ شىعىپ, ونىڭ ىشىندە 32 قاتىسۋشى 505 مىڭ تەڭگە گرانت يەگەرى اتاندى. ال «بيزنەس كەڭەسشى» بويىنشا 192 ادام وقىتىلدى. «بيزنەس ءوسۋ» وقۋى بويىنشا 43 كاسىپكەر ءبىلىم الدى» دەدى.
مۇنايلى اۋدانى بويىنشا شاعىن نەسيەلەر بويىنشا 97 ادام 510,6 ملن تەڭگە العان. ونىڭ ىشىندە «اتامەكەن» ميكروقارجى ۇيىمى ارقىلى 12 كاسىپكەر 108,4 ملن تەڭگەگە قول جەتكىزدى.
اعىمداعى جىلدىڭ قىركۇيەگىندە مۇنايلىدا اۋداننىڭ ەكونوميكالىق الەۋەتىن ەگجەي-تەگجەيلى زەرتتەۋ ماقساتىندا شاعىن جانە ورتا بيزنەسكە ساۋالناما جۇرگىزۋ ارقىلى سكرينينگ جوباسى باستالدى. سكرينينگ ناتيجەسىندە الىنعان اقپارات نەگىزىندە ناقتى ماماندانۋدى قاراستىراتىن اۋداندىق دامۋدىڭ كارتاسى ازىرلەنەدى. كارتا اۋداننىڭ اگرارلىق, وڭدەۋ ونەركاسىبى جانە باسقا سالالاردىڭ ءوسۋ نۇكتەلەرىن, سونداي-اق, ولارداعى قاجەتتىلىكتەردى كورسەتەتىن بولادى. وسى ورايدا اۋداننىڭ ءۇي شارۋاشىلىقتارى مەن كاسىپكەرلىك سۋبەكتىلەرگە سكرينينگ جۇرگىزۋ ءساتتى اياقتالدى. ءۇي شارۋاسىنداعى 22 140 ادام, ال 5138 كاسىپكەرلىك سۋبەكتىسى ارنايى بازاعا ەنگىزىلدى.
وبلىستىق ىسكەر ايەلدەر كەڭەسىنىڭ قولداۋىمەن اۋداندا 2 وقۋ ورتالىعى, 4 بالاباقشا اشىلدى. ىاك ۇيىمداستىرۋىمەن وتكەن ء«سان قۇراق» فەستيۆالىندە كەڭەس مۇشەسى, مۇنايلى تۇرعىنى گ. دەمەۋوۆا ءبىرىنشى ورىنعا يە بولدى. اۋداننان 5 قىز-كەلىنشەك قاتىستى. ىاك-ءنىڭ مۇشەسى اۋەس ساعىناەۆا 11 مەكتەپتە اۋداننىڭ قىز-كەلىنشەكتەرىنە تەكەمەت باسۋدىڭ جاڭا تەحنولوگياسىن ۇيرەتىپ, ءۇش كۇندىك اقىسىز ترەنينگ ۇيىمداستىردى. مۇنايلى اۋدانىندا 2019 جىلى اتقارىلعان تولاعاي تابىستار جەتەرلىك. بيىل دا سول ىستەردى جالعاستىرۋ مەجەلەنگەن.
ەسەپتىك كەزدەسۋلەر وبلىستىڭ بارلىق قالا, اۋدان كاسىپكەرلەرىمەن وتەدى.