بۇگىنگى تاڭدا ەلىمىزدە ءتورت اسكەري مەكتەپ بار. ولار نۇر-سۇلتان, الماتى, شىمكەنت, قاراعاندى قالالارىندا بالالاردى اسكەرگە ماشىقتىرىپ, جان-جاقتى ءبىلىم بەرەدى.
«جاس ۇلان» اسكەري مەكتەپتەرىنە 11 جىلدىق ءبىلىم بەرۋ باعدارلاماسى بويىنشا 9 سىنىپتى نەمەسە 12 جىلدىق ءبىلىم باعدارلاماسى بويىنشا 10 سىنىپتى اياقتاعان ۇل بالالار قابىلدانادى. ول ءۇشىن ۇمىتكەرلەر بىرنەشە ىرىكتەۋ كەزەڭدەرىنەن ءوتۋى ءتيىس: ماتەماتيكا مەن وقۋ تىلىنەن تەستىلەۋ, پسيحولوگيالىق ىرىكتەۋ, دەنە- شىنىقتىرۋ نورماتيۆتەرى مەن مەديتسينالىق كۋالاندىرۋ. وقۋعا تۇسكەن ساتتەن باستاپ تاربيەلەنۋشىلەردى مەملەكەت قامقورلىعىنا الادى.
العاشقى «جاس ۇلان» مەكتەبى 1999 جىلدىڭ ناۋرىز ايىندا قۇرىلدى. تاۋەلسىز قازاقستاننىڭ قارۋلى كۇشتەرى ءۇشىن مەكتەپ قابىرعاسىنان بولاشاق كومانديرلەردى دايارلايتىن ارنايى وقۋ ورنىن قۇرۋ ەلىمىزدىڭ تۇڭعىش پرەزيدەنتى ن.نازارباەۆتىڭ يدەياسى ەدى. مىنە, وسى, ياعني ارميا گەنەرالى س.نۇرماعامبەتوۆ اتىنداعى «جاس ۇلان» رەسپۋبليكالىق اسكەري مەكتەبى كەشە ءوزىنىڭ 20 جىلدىعىن تويلادى. وسىعان وراي استانالىق مەكتەپتە قورعانىس مينيسترلىگى وكىلدەرىنىڭ, قارۋلى كۇشتەر ارداگەرلەرىنىڭ جانە تاربيەلەنۋشىلەردىڭ اتا-انالارىنىڭ قاتىسۋىمەن مەرەكەلىك ءىس-شارا ءوتتى. مەكتەپتىڭ باستىعى, ادىلەت پولكوۆنيگى تىلەۋحان باسقوجاەۆ ماڭىزدى مەرەيتويمەن قاتىسۋشىلاردى قۇتتىقتادى. ءداستۇر بويىنشا ۇلاندار مەكتەپتىڭ تۋىن شىعارىپ, حالىق قاھارمانى, كەڭەس وداعىنىڭ باتىرى, ارميا گەنەرالى س.نۇرماعامبەتوۆتىڭ ەسكەرتكىشىنە گۇل شوعىن قويدى.
قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى گەنەرال-مايور اسحات رىسپاەۆ تا ءوز قۇتتىقتاۋىندا مەكتەپتىڭ وسى جىلدار بويى اتقارعان كۇردەلى دە جاۋاپتى مىندەتى مەن شىعارماشىلىق قىزمەتى تۋرالى ايتا كەلىپ: «بۇل وسى مەكتەپتىڭ تاريحى – بۇل مامان اتانعان مىڭداعان ۇل بالالار تاعدىرىنىڭ تاريحى. قۇرمەتتى ارىپتەستەر, سىزدەردىڭ قولدارىڭىزدان عاجاپ ءىس – ادام قالىپتاستىرۋ كەلەدى. تەك سىزدەر ۇشقالاق بالالاردان بولاشاق سارباز-وفيتسەردى كورەسىزدەر. سىزدەردىڭ بارلىق ۇمىتتەرىڭىز اقتالىپ, اتقارعان جۇمىستارىڭىز بەكەرگە كەتپەي, ءار ۇلان مەكتەپتىڭ ماقتانىشىنا اينالۋىنا تىلەكتەسپىن», – دەدى. كورمەدە 20 جىلدا مەكتەپتە بولعان ءىس-شارالار مەن جەتىستىكتەر كورسەتىلگەن فوتوكورمە ۇيىمداستىرىلدى. مەرەيتوي قارساڭىندا «جاس ۇلان – 20 جىل» اتتى كىتاپ دايىندالىپ, شىعارىلدى.
قازىرگى كەزدە مەكتەپتە مەملەكەتىمىزدىڭ تۇكپىر-تۇكپىرىنەن جينالعان 425 ۇلان ءبىلىم الۋدا. الماتى, شىمكەنت جانە قاراعاندى قالالارىندا تاعى دا ءۇش «جاس ۇلان» اسكەري مەكتەبى جۇمىس ىستەيدى. اسكەري مەكتەپتەردە تاربيەلەنۋشىلەر مەملەكەتتىك جانە شەت تىلدەرىن, جالپى ءبىلىم بەرەتىن پاندەردى تەرەڭدەتىپ وقيدى جانە دەنە-شىنىقتىرۋمەن شۇعىلدانادى. مەكتەپ پاندەرىمەن قوسا ولار جالپى اسكەري تاكتيكا, بايلانىس نەگىزدەرى, ساپتىق دايارلىق, جالپى اسكەري جارعىلار جانە باسقا دا اسكەري پاندەردى مەڭگەرەدى.
زاماناۋي وقۋ-ماتەريالدىق بازا جاڭا تەحنيكالىق قۇرالداردى قولدانا وتىرىپ ينتەراكتيۆتى, كومپيۋتەرلىك جانە لينگافون سىنىپتارىندا ساپالى وقۋ پروتسەسىن ۇيىمداستىرۋعا مۇمكىندىك بەرەدى. اسكەري پاندەر بويىنشا كابينەتتەردە ۇلاندىقتار تاجىريبە جۇزىندە وتكەن تاقىرىپتاردى پىسىقتاۋعا اسكەري تەحنيكا مەن قارۋ-جاراقتاردىڭ جاڭا ۇلگىلەرى بار. اسكەري اۆياتسيانى ودان ءارى وقۋدى جوسپارلاعان تاربيەلەنۋشىلەرگە اسكەري ۇشقىش ماماندىعىنىڭ نەگىزدەرىن وقۋعا مۇمكىندىك بەرىلەدى. 2007 جىلعى قىركۇيەكتەن باستاپ «مەملەكەتتىك اۆياتسيا ورتالىعى» رەسپۋبليكالىق مەملەكەتتىك كاسىپورنىنىڭ نەگىزىندە ۇلاندار ءۇشىن «جەڭىل قوزعالتقىشتى ۇشقىش» بىلىكتىلىگى بەرىلەتىن ۇشۋ دايىندىقتارى بويىنشا ساباقتار جۇرگىزىلەدى.
ۇلاندار وليمپيادالارعا, ءتۇرلى جارىستار مەن تۋرنيرلەرگە بەلسەنە قاتىسادى. ولاردىڭ جان-جاقتى دامۋلارى ءۇشىن مۇراجاي, تەاترلار مەن سپورتتىق ءىس-شارالارعا قاتىسۋلارى, اتاقتى عالىمدار مەن تانىمال سپورتشىلارمەن كەزدەسۋلەر ۇيىمداستىرىلادى. ال ودان ءارى وقۋلارىن جالعاستىرۋ ءۇشىن تۇلەكتەر قورعانىس مينيسترلىگىنىڭ وقۋ ورىندارىنا جىبەرىلەدى. سونىمەن قاتار وقۋدى شەت مەملەكەتتەردىڭ اسكەري وقۋ ورىندارىندا جالعاستىرا الادى. قازىرگى كەزدە «جاس ۇلان» استانالىق مەكتەبىنىڭ تۇلەكتەرى قازاقستان, رەسەي, بەلارۋس, ۋكراينا, تۇركيا, قىتاي اسكەري وقۋ ورىندارىندا ءبىلىم الۋدا.