كەنشىلەر استاناسىنداعى «شالقىما» كونتسەرت زالىندا قازاقستاننىڭ حالىق ءارتىسى ءجانيا اۋباكىروۆانىڭ شىعارماشىلىق كەشى ءوتتى. قازاق مۋزىكا ونەرىنىڭ كوگىندەگى جارىق جۇلدىز قاراعاندى سيمفونيالىق وركەسترىمەن بىرگە حالىقارالىق «اۋەندى سارىارقا» فەستيۆالىنىڭ اشىلۋىندا ونەر كورسەتتى.
– قاراعاندىعا ءاردايىم ەرەكشە سەزىممەن كەلەمىن. كلاسسيكالىق مۋزىكاعا, مەنىڭ شىعارماشىلىعىما دەگەن سۇيىسپەنشىلىكتەرىڭىزگە باسىمدى ءيىپ العىس ايتامىن! قاراعاندى وركەسترىمەن بىرگە ونەر كورسەتۋ مەن ءۇشىن ەرەكشە باقىت, – دەدى الەمگە ايگىلى مۋزىكانت.
شىعارماشىلىق كەش بارىسىندا مادەنيەت جانە سپورت ءمينيسترى اقتوتى رايىمقۇلوۆانىڭ ونەر مايتالمانىنا ارناپ جولداعان قۇتتىقتاۋ حاتى وقىلدى. وبلىس اكىمى جەڭىس قاسىمبەك حالىق ارتىسىنە التىن ۋاقىتىن قيىپ, ارقاعا كەلىپ ونەر كورسەتكەنى ءۇشىن العىس سەزىمىن جەتكىزدى. سونداي-اق ول ءجانيا اۋباكىروۆا ءۇشىن قاراعاندى وبلىسىنىڭ بوتەن ەمەستىگىن, ونىڭ اكەسىنىڭ وسى وڭىردەگى شەت اۋدانىنىڭ تۋماسى ەكەنىن ايتا كەلىپ, ونەر جۇلدىزىنا شىعارماشىلىق تابىس تىلەدى.
ايگىلى مۋزىكانتتىڭ ءوزى تولقىنىسىن جاسىرا الماي, كورسەتىلگەن سىي-قۇرمەتكە شىنايى العىسىن ءبىلدىردى. زور تەبىرەنىستىڭ ۇستىندە تۇرىپ, قاراعاندى وبلىسىنىڭ ءوسىپ-وركەندەۋىنە تىلەكتەس ەكەندىگىن جەتكىزدى.
– ۇمىتىلماس ءسات! مۇنداي قۇرمەت ونەر ادامدارىن كەرەمەت قاناتتاندىرادى. مەن باقىتتىمىن. ارينە قاراعاندى جەرىندە مەنىڭ ونەرىم مويىندالاتىنى – مەن ءۇشىن ەرەكشە ماراپات, ەرەكشە ماقتانىش. بۇل مەن ءۇشىن اسا قىمبات. شىعارماشىلىق, شابىت, جالپى ءومىرىم ءۇشىن وتە كۇشتى سەرپىن بەرەدى, – دەدى ءجانيا اۋباكىروۆا اعىنان جارىلىپ.
ەسكە سالساق, قاراعاندىداعى «جۇلدىزدار اللەياسى» 2007 جىلى «قاراعاندى – مەنىڭ جاستىعىمنىڭ قالاسى» اتتى ءبىرىنشى رەترو-فەستيۆال اياسىندا اشىلعان بولاتىن. مۇندا ءبىرىنشى بولىپ حالىق ءارتىسى بيبىگۇل تولەگەنوۆانىڭ اتى-ءجونى جازىلعان ەسكەرتكىش بەلگى قويىلعان. سونداي-اق اتالعان اللەيادا روزا رىمباەۆانىڭ, «دوس-مۇقاسان» ءانسامبلىنىڭ, قايرات بايبوسىنوۆتىڭ, ەسكەندىر حاسانعاليەۆتىڭ, ماقپال ءجۇنىسوۆانىڭ, بولات سىزدىقوۆتىڭ جانە باسقا دا مادەنيەت پەن ونەر قايراتكەرلەرىنىڭ اتاۋلى بەلگىلەرى بار. ال حالىق ءارتىسى, مەملەكەتتىك سىيلىقتىڭ لاۋرەاتى, تۇڭعىش پرەزيدەنتتىڭ مەملەكەتتىك بەيبىتشىلىك جانە پروگرەسس سىيلىعىنىڭ لاۋرەاتى ءجانيا اۋباكىروۆانىڭ قۇرمەتىنە ارنالعان اتاۋلى بەلگى «جۇلدىزدار اللەياسىندا» جاعىلعان ونىنشى جۇلدىز.
قاراعاندىف