ءماجىلىس توراعاسى نۇرلان نىعماتۋلين مەن قازاقستانعا رەسمي ساپارمەن كەلگەن چەحيا پارلامەنتى دەپۋتاتتار پالاتاسىنىڭ سپيكەرى رادەك ۆوندراچەك ەكى ەلدىڭ پارلامەنتشىلەرى اراسىنداعى ىنتىماقتاستىقتى نىعايتۋ ماسەلەلەرىن تالقىلادى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
چەحيا ورتالىق جانە شىعىس ەۋروپا ەلدەرىنىڭ اراسىنداعى قازاقستاننىڭ نەگىزگى ساياسي جانە ەكونوميكالىق سەرىكتەستەرىنىڭ ءبىرى بولىپ تابىلاتىنىن ايتقان نۇرلان نىعماتۋلين قازاقستان باسشىلىعى چەحيا ەلىمەن قارىم-قاتىناستى تەرەڭدەتۋگە ەرەكشە ءمان بەرەتىنىن اتاپ ءوتتى.
ءماجىلىس توراعاسىنىڭ پىكىرىنشە, ەكىجاقتى ىنتىماقتاستىقتى دامىتۋعا دەنساۋلىق ساقتاۋ, ماشينا جاساۋ, اگروونەركاسىپتىك تەحنولوگيالار, «جاسىل» ەنەرگەتيكا سياقتى الەۋەتتى سالالاردىڭ ماڭىزى زور. ەكىجاقتى قاتىناستاردىڭ ماڭىزدى قۇرامداس بولىگى رەتىندە پارلامەنتارالىق ىنتىماقتاستىق تۋرالى ايتقان نۇرلان نىعماتۋلين قازاقستاندىق پارلامەنتشىلەردىڭ چەح ارىپتەستەرىمەن ديالوگتى نىعايتۋعا نيەتتى ەكەنىن جەتكىزدى.
ءماجىلىس توراعاسى ءتيىستى كوميتەتتەر مەن ىنتىماقتاستىق توپتارىنىڭ بىرلەسكەن جۇمىسى زاڭنامالىق تاجىريبە الماسۋعا, ەڭ الدىمەن الەۋمەتتىك ساياسات جانە ءبىلىم, سونداي-اق ەكونوميكانىڭ يننوۆاتسيالىق دامۋى مەن تسيفرلاندىرىلۋىنا مۇمكىندىك بەرەتىنىنە توقتالدى.
ءوز كەزەگىندە رادەك ۆوندراچەك قازاقستان مەن چەحيا اراسىنداعى بايلانىستىڭ دەڭگەيىن جوعارى باعالادى. نۇرلان نىعماتۋلين چەحيا پارلامەنتى دەپۋتاتتار پالاتاسى سپيكەرىنىڭ ساپارى ۇزاق مەرزىمدى جانە ءوزارا ءتيىمدى ىنتىماقتاستىقتى جان-جاقتى تەرەڭدەتۋگە ماڭىزدى سەرپىن بەرەتىنىنە سەنىم ءبىلدىردى. كەزدەسۋ سوڭىندا ءماجىلىس توراعاسى ءوزىنىڭ ارىپتەسىن 28 قازاندا چەحيادا اتاپ وتىلەتىن مەملەكەتتىلىك كۇنىمەن قۇتتىقتاپ, دوستاس ەلدىڭ گۇلدەنۋى مەن وركەندەۋىنە تىلەكتەستىك ءبىلدىردى.