شىمكەنتتە قازاقستان حالقى اسسامبلەياسىنىڭ مۇشەلەرى قازاق حالقىنىڭ «ميزام» ۇلتتىق مەرەكەسىن قايتا جاڭعىرتتى. قالالىق «ىنتىماق» ەتنوسارالىق مادەني بىرلەستىگىنىڭ ۇيىمداستىرۋىمەن وتكەن شارادا ۇمىتىلا باستاعان مەرەكەنىڭ ءمان-ماڭىزى ناسيحاتتالىپ, داستۇرگە ساي تاعامداردى قىس ماۋسىمىنا دايىنداۋدىڭ ءادىس-تاسىلدەرى كورسەتىلدى.
قالالىق «ىنتىماق» ەتنوسارالىق مادەني بىرلەستىگىنىڭ ءتورايىمى گاۋحار تولەپوۆا مەرەكەنىڭ ەرەكشەلىگىنە توقتالىپ, رۋحاني جاڭعىرۋعا باستايتىن يگى شارالار الداعى ۋاقىتتا دا ءوز جالعاسىن تاباتىنىن جەتكىزدى.
«ميزام» – مال سەمىرىپ, ەگىن ورىلىپ, قىسقا ازىق تولىق جينالىپ بەرەكەگە كەنەلەتىن ساتتە اتالىپ وتەتىن مەرەكە. ەرتەدە بۇل مەرەكە قىركۇيەك ايىنىڭ سوڭعى كۇندەرىنەن باستالىپ, قازان ايىنىڭ ورتاسىنا دەيىنگى شۋاقتى كۇندەردە تويلاناتىن بولعان. جالپى, حالقىمىزدىڭ ءار مەرەكەسى ەرەكشە مانگە يە. ونى بۇگىنگى جاستار ءبىلىپ, جالعاستىرعانى ءجون», دەيدى گ.تولەپوۆا.
جيىندا قارىنعا ماي سالىپ, ەت سۇرلەگەن اق جاۋلىقتى انالار كونە ءداستۇر بويىنشا تاعامداردى قىسقا دايىنداۋدىڭ جولدارىن كوپشىلىككە تانىستىرسا, قولونەرشىلەر شەبەرلىك ساباقتارىن ۇيىمداستىردى.
مەرەكەلىك جيىن ءارى قاراي پوليتەحنيكالىق كوللەدجدە ەتنوس جاستارىنىڭ قاتىسۋىمەن «تىلگە قۇرمەت – ەلگە قۇرمەت» تاقىرىبىنداعى ماجىلىسپەن جالعاستى.
ايتا كەتەرلىگى, «ىنتىماق» ەتنوسارالىق مادەني بىرلەستىگى وڭىرىمىزدە 1996 جىلدان بەرى جۇمىس ىستەيدى. قالاداعى سانى از ەتنوستاردىڭ باسىن بىرىكتىرگەن ۇيىم وسىنداي ءىس-شارالار ارقىلى قازاق حالقىنىڭ سالت-ءداستۇرى مەن مادەنيەتىن ناسيحاتتاپ, دامىتۋعا سۇبەلى ۇلەس قوسىپ كەلەدى.