جاڭا وقۋ جىلىنا ساناۋلى كۇندەر قالعانىنا قاراماستان مەكتەپتەردى جوندەۋمەن اينالىساتىن قۇرىلىس ۇيىمدارىنىڭ جايباسارلىعى قارىن اشتىرادى. ونى باق وكىلدەرىمەن وتكىزگەن بريفينگتە وبلىستىق ءبىلىم باسقارماسىنىڭ باسشىسى گۇلميرا كارىموۆا دا ايتادى.
ونىڭ ايتۋىنشا, مەكتەپتەردەگى وقۋشىلار سانى 70 مىڭعا جۋىقتاپ, 9 مىڭنان استامى ءبىرىنشى سىنىپ تابالدىرىعىن اتتاماق. بالا سانىنىڭ ازايۋىنا بايلانىستى 7 باستاۋىش مەكتەپ جابىلىپ, وسىنشا مەكتەپ نەگىزگى جانە باستاۋىش ءبىلىم وشاعىنا اينالدىرىلعان. سالانى قارجىلاندىرۋ مولشەرى 30 ملرد تەڭگەنى قۇراپ, 18 پايىزعا ۇلعايعان. ءوڭىردىڭ الەۋمەتتىك-ەكونوميكالىق دامۋىنىڭ ءۇش جىلعا ارنالعان كەشەندى باعدارلاماسى شەڭبەرىندە 120 ءبىلىم ورداسىن جوندەۋ بەلگىلەنگەن. بىراق قاراستىرىلعان قارجى ارتىلىپ قالعاندىقتان تاعى 17 مەكتەپتى جوندەۋگە كونكۋرس ۇيىمداستىرۋ ۇيعارىلعان.
– كونكۋرس جاريالانعان سوڭ تەندەر ەرەجەسى بويىنشا 30 كۇن مەملەكەتتىك ساتىپ الۋلار سايتىندا تۇرۋى ءتيىس. بۇدان تىسقارى كونكۋرستىق شارتتاردى راسىمدەۋگە 20 كۇن كەتەدى. وسى سەبەپتى تىزىمگە كەش قوسىلعان مەكتەپتەردى جوندەۋ كەستەدەن قالىپ كەلەدى. ع. مۇسىرەپوۆ اتىنداعى اۋداننىڭ ەكى مەكتەبىنىڭ وقۋشىلارى وقۋدى مادەنيەت ۇيىندە جالعاستىراتىن بولادى, دەگەن گۇلميرا رايىنبەكقىزى جامبىل اۋدانى كلادبينكا مەكتەبىندە ورىن العان وقىس وقيعانى تۇزەتۋدى قۇرىلىس مەكەمەسى ءوز مىندەتىنە العانىن جەتكىزدى. وندا جاڭبىر جاۋىپ, شاتىرعا زاقىم كەلسە كەرەك.
مۇنداي ورالىمسىزدىقتار وبلىس ورتالىعىندا دا كەزدەسەدى. قالالىق ءبىلىم ءبولىمىنىڭ ماماندارى بەس مەكتەپتە قۇرىلىس جۇمىستارىنىڭ كەشەۋىلدەپ وتىرعانىن ايتادى. اسىرەسە, اپاتتىق دەپ تانىلعان قوجابەرگەن جىراۋ اتىنداعى №6 قازاق مەكتەبىندە جاعداي ءالى دابىل قاعارلىق. تەندەر جىل باسىندا وتكىزىلىپ, قازىنادان 98 ملن تەڭگە بولىنگەنىنە قاراماستان «ەڭبەك-قىزىلجار» كاسىپورنى ءوز مىندەتىن جۇمىس كۇشى, كاسىبي ماماندارى جەتىسپەيتىن قوسالقى مەردىگەرگە ارتا سالعانى بايقالادى. اتا-انالاردىڭ شاعىمى بويىنشا وسىندا بولعانىمىزدا قۇرىلىسشىلاردان گورى مۇعالىمدەردىڭ كوپتىگى, مەردىگەردىڭ سىلبىر قيمىلى سالدارىنان ۇستازدار قاۋىمىنىڭ قولبالا قۇساپ جۇمىسقا تارتىلعانىن بايقادىق. تاڭ اتقاننان كەش باتقانعا دەيىن ەدەن جۋ, جيھاز تاسۋ, باسقا دا ۇساق-تۇيەك شارۋالارعا «جەگىلۋىنە» قاراعاندا ادەت بولىپ كەتكەن سىقىلدى. الدە پرەزيدەنتتىڭ تامىز كەڭەسىندە جۇكتەگەن تالاپتارىنىڭ وڭىرگە قاتىسى جوق پا؟ مەملەكەت باسشىسى ءوز سوزىندە ۇستاز – ارقاشان ءىلىم مەن ىزگىلىكتى العا تارتاتىن تۇلعا, ۇلاعاتتى ۇرپاق تاربيەلەۋ – اسا جاۋاپتى ءارى كۇردەلى جۇمىس ەكەنىن قاداپ ايتقان بولاتىن.
«مەردىگەرلەردىڭ ورالىمسىزدىعىنان ۋاقىتىمىزدى ەش ەتىپ, سالپاقتاپ جۇرگەنىمىزگە بىرنەشە اي بولدى. الاتىن جالاقىمىز ونسىز دا ماردىمسىز. قيت ەتسە, مىندەتىڭ دەپ شىعا كەلەدى. تىم بولماسا 10-15 كۇن بۇرىن تاپ-تۇيناقتاي ازىرلەپ قويسا, ءبىر ءسارى. العاشقى قوڭىراۋ مەرەكەسىنە ۇلگەرمەك نيەتپەن اسىعىپ-ۇسىگىپ ساپاسىز سالىنىپ جاتقانىن ءبارى كورىپ-ءبىلىپ وتىر. ايتەۋىر بىتىرسە دەگەن پيعىل باسىم. ءبىزدىڭ بالا-شاعامىزدىڭ قامى, مەكتەپكە باراتىنىن كىم ويلايدى؟ كەشكە تامان اكىمدىكتىڭ باسشىلارى دىگىرلەپ جەتىپ كەلەدى. ءبارى ديرەكتورعا, مۇعالىمدەرگە عانا قوجا, بي. جۇيكەمىزگە ابدەن ءتيىپ ءبىتتى», دەدى بىزگە اتى-ءجونىن اتاماۋدى وتىنگەن جۇمىسشىلاردىڭ ءبىرى. «ەڭبەك-وسكەمەن» قۇرىلىس كومپانياسى دا ميمىرت جۇرىسىنەن اسا الماي كەلەدى. سوعان قاراعاندا قۇرىلىسى ساعىزداي سوزىلعان مەكتەپتەر وقۋشىلاردى قابىلداماق تۇگىل ەتەك-جەڭىن جيناي الماي قالۋى مۇمكىن. دارىندى بالالارعا مامانداندىرىلعان «لورد» ليتسەيىندەگى جوندەۋ جۇمىستارى قازان ايىنا دەيىن جالعاسۋى ابدەن ىقتيمال.
جىل وتكەن سايىن قوجابەرگەن جىراۋ اتىنداعى مەكتەپتە وقۋشىلاردىڭ سانى كوبەيىپ, ءبىلىم بەرۋ ءۇردىسىن ءۇش اۋىسىمدا ۇيىمداستىرۋعا ءماجبۇر. تىعىرىقتان شىعۋدىڭ بىردەن-ءبىر جولى – «جاس وركەن» شاعىن اۋدانىندا قوڭىر كۇزگە تامان پايدالانۋعا بەرىلەتىن 900 ورىندى مەكتەپكە كوشىرۋ. بىراق مۇنداي قادامعا جەرگىلىكتى بيلىكتىڭ اياق باسپاۋى, باستاپقىدا كوشىرەمىز دەگەن قۇدايى ۋادەسىنەن تايقىپ كەتۋى تۇسىنىكسىز. اتا-انالاردىڭ ەندىگى بار ءۇمىتى وبلىس اكىمىندە.
قولدارىنا قالاق ۇستاپ, قابىرعا سىلاماسا دا, قۇرىلىسشىلاردان ءبىر مىسقال قالىسپاي جۇرگەن ۇستازدار جوندەۋ جۇمىستارى شاتقاياقتاپ جاتقان باسقا مەكتەپتەردە دە از ەمەس.
سولتۇستىك قازاقستان وبلىسى