قىر استىندا – قىركۇيەك. ءوڭىر مەكتەپتەرى جاڭا وقۋ جىلىنا دايىن با؟ وبلىستا قانشا مەكتەپ اشىلادى؟ وسى جانە وزگە دە ساۋالدارعا وبلىس اكىمىنىڭ ورىنباسارى اسەم ءنۇسىپوۆا مەن وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆانىڭ قاتىسۋىمەن وتكەن بريفينگتە جان-جاقتى جاۋاپ بەرىلدى.
قازىر وبلىستا 655 مەكتەپ بار بولسا, بيىل وسى ءبىلىم وردالارىندا 193 مىڭنان استام وقۋشى ءبىلىم الماق. ال جاڭا وقۋ جىلىندا ءوڭىر مەكتەپتەرىنىڭ 1 سىنىبىنا 21 مىڭنان استام وقۋشى بارادى دەپ كۇتىلۋدە (بۇل – وتكەن جىلعى كورسەتكىشتەن 1 مىڭعا ارتىق). وكىنىشكە قاراي بيىل وبلىستا 5 وقۋ وشاعى (جارما اۋدانىندا – 2, كاتونقاراعاي اۋدانىندا – 3 باستاۋىش مەكتەپ) بالا سانىنىڭ جەتكىلىكسىزدىگىنە بايلانىستى جابىلماق. ەسەسىنە, وسكەمەندە 2 مىڭ ورىندىق, تارباعاتاي اۋدانىنىڭ اقجار اۋىلىندا 600 ورىندىق 1 مەكتەپ پايدالانۋعا بەرىلەدى. وبلىستاعى مەكتەپتەرگە وقۋلىقتار مەن وقۋ-ادىستەمەلىك كەشەندەردى ساتىپ الۋعا 2 ملرد 383 ملن تەڭگە ءبولىنىپتى. بۇل قاراجاتقا 1 ملن 58 مىڭ 730 دانا وقۋلىق ساتىپ الىنادى. بۇگىندە ايماقتاعى مەكتەپتەردە 22 526 پەداگوگ ەڭبەك ەتەدى. بيىل 237 جاس مامان جۇمىسقا كىرىسپەك. «14 تامىزداعى مالىمەتتەرگە سۇيەنسەك, وبلىستاعى 19 اۋداننىڭ وقۋشىلارىنىڭ 70 پايىزى مەكتەپ فورماسىمەن قامتاماسىز ەتىلگەن. ەندى جوسپارعا سايكەس, 25 تامىزعا دەيىن وڭىردەگى كوپ بالالى جانە از قامتىلعان وتباسىلاردا تاربيەلەنىپ جاتقان بالالارعا مەكتەپ فورمالارى بەرىلەدى. بيىل «مەكتەپكە –جول» اكتسياسى جىل سوڭىنا دەيىن جالعاسادى. اتالعان اكتسيا اياسىندا 33 مىڭنان استام وقۋشىعا كومەك كورسەتىلەدى. بۇگىندە 143 مىڭ بالاعا بيۋدجەتتىك جانە بيۋدجەتتەن تىس قاراجاتتان 156 ملن 741 مىڭ تەڭگە سوماسىنا كومەك بەرىلدى», دەيدى اسەم ءنۇسىپوۆا.
وڭىردەگى مەكتەبى جوق 307 اۋىلدىق وكرۋگتىڭ 3695 وقۋشىسى جاقىن ماڭداعى ەلدى مەكەندەردىڭ مەكتەپتەرىنە ارنايى بولىنگەن 163 اۆتوبۋسپەن تاسىمالداناتىن كورىنەدى. وسى وقۋشىلاردىڭ ىشىندە 2948 بالا كۇن سايىن ساباق بىتكەن سوڭ ۇيلەرىنە جەتكىزىلسە, 750 وقۋشى مەكتەپ جانىنداعى ينتەرناتتاردا تۇرادى دەپ جوسپارلانعان. «بيىلدان باستاپ جالپىعا مىندەتتى ءبىلىم بەرۋ قورىنان الەۋمەتتىك جاعىنان از قامتىلعان جانە كوپ بالالى وتباسىلاردان شىققان بالالاردى قولداۋ ماقساتىندا 2 ملرد تەڭگە قارجى قاراستىرىلعان. ونىڭ 625 ميلليون تەڭگەسى 33 582 بالاعا مەكتەپ فورماسىن الىپ بەرۋگە جۇمسالماق» دەيدى سايرانگۇل ءجۇمادىلوۆا.
شىعىس قازاقستان وبلىسى