تۇركيانىڭ بەدەلدى باسىلىمدارىنىڭ ءبىرى, بيىل جارىق كورگەنىنە 95 جىل تولعان, اتىن اتاتۇرىكتىڭ ءوزى قويعان Cumhuriyet گازەتىندە «Egemen Qazaqstan» گازەتى تۋرالى ماقالا جاريالاندى.
گازەتتىڭ انكاراداعى تىلشىلەر قوسىنىنىڭ باسشىسى يكليم ونگەل ەل گازەتى «Egemen Qazaqstan» رەداكتسياسىنا ارنايى كەلىپ, ۇجىم قىزمەتكەرلەرىمەن كەزدەسكەن بولاتىن. تۇركيانىڭ باس باسىلىمى «ۇشقىننان» «Egemen Qazaqstan-عا» دەيىنگى گازەت تاريحى مەن بۇگىنگى تىنىسى تۋرالى بايانداعان. «گازەت 54 جىل بويى «سوتسياليستىك قازاقستان» اتىمەن جارىق كورەدى, 90-جىلدارى بۇگىنگى اتىن العان ۇلكەن باسىلىمنىڭ تيراجى قازىرگى تاڭدا 200 مىڭعا جەتەدى. بيلىك پەن حالىق اراسىنداعى كوپىرگە اينالعان گازەتتە 120-عا جۋىق قىزمەتكەر بار. قازاق حالقىنىڭ ءبىرتۋار ازاماتتارى مەن زيالىلارىنىڭ باسشىلىق ەتۋى Cumhuriyet گازەتىنىڭ تاريحىن ەسكە سالادى» دەلىنگەن ماقالادا.
سونىمەن بىرگە گازەتىمىزدىڭ سايتى ءۇش تىلدە حابار تاراتاتىنى, لاتىن قارپىندە ارنايى بەتتەر شىعىپ تۇراتىنى تۋرالى جازىلعان. «Egemen Qazaqstan» رەسپۋبليكالىق گازەتى» اق باسقارما توراعاسى دارحان قىدىرالىمەن سۇحباتى جارىق كورگەن.