اباي ەلى بۇرىن دا, قازىر دە ابايدىڭ تۋعان كۇنىن 10 تامىز كۇنى اتاپ ءوتۋدى داستۇرگە اينالدىرعان. بيىلعى اقىننىڭ تۋعان كۇنى دە جيدەباي باسىندا ەرەكشە اتالىپ ءوتتى. وعان مۇرىندىق بولعان وسكەمەندەگى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى.
ۋنيۆەرسيتەت ۇجىمى عالىمدارىمەن, ستۋدەنتتەرىمەن, ءانشى-جىرشىلارىمەن, اس-سۋلارىمەن كەلىپ, جيدەباي باسىن ءبىر كۇن ءان مەن كۇيگە بولەپ, قۇران-قاتىم ءتۇسىرىپ, تاعىلىمى مەن تاربيەلىك ءمانى زور «اباي ەلىنە تاعزىم» اتتى ۇلكەن فورۋم وتكىزدى. بۇل فورۋمعا اباي اۋدانى اكىمىنىڭ ورىنباسارى باۋىرجان تاتتىبەكوۆ باستاعان قاراۋىل اۋىلىنىڭ ارداگەر-اقساقالدارى, زيالى قاۋىم وكىلدەرى, «قالامقاس» حالىق ءانسامبىلىنىڭ ونەرپازدارى دا قاتىسىپ, ەكى ۇجىم ءبىر جاعادان باس, ءبىر جەڭنەن قول شىعارىپ, جيدەباي جازىعىن ابايدىڭ ولەڭدەرىمەن, قارا سوزدەرىمەن سۋسىنداتتى. بۇل رەتتە وبلىس اكىمىنىڭ ورىنباسارى اسەم ءنۇسىپوۆانىڭ سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ رەكتورى مۇحتار تولەگەننىڭ باستاماسىن قىزۋ قولداپ, ۋنيۆەرسيتەت ۇجىمىنىڭ يگى قادامدارىنا ءسات ساپار تىلەگەنىن, اباي اۋدانىنىڭ اكىمى جارقىنبەك بايسابىروۆتىڭ ۋنيۆەرسيتەت ۇجىمىن قۇشاق جايا قارسى العاندىقتارىن دا قوسا ايتا كەتكەن ءجون.
اقىننىڭ 175 جىلدىق تورقالى تويىنىڭ الاتىن ورنى ەرەكشە بولماق. بۇل جونىندە وبلىس اكىمدىگىندە دە ۇلكەن جيىن بولىپ, ءوڭىر باسشىلارى ءبىزدىڭ باستامامىزدى قىزۋ قولدادى. سول جەردە «اباي ەلىنە تاعزىم» اتتى فورۋمدى اباي ەلىندە, جيدەبايدا وتكىزۋ جونىندە شەشىم قابىلداندى. ويتكەنى اباي تويى شىعىستان, جيدەبايدان باستاۋ الۋى كەرەك. ۋنيۆەرسيتەتىمىزدە ابايدىڭ ارنايى ءدارىسحاناسى جۇمىس ىستەيدى. ابايتانۋ كۋرسى مىندەتتى ءپان رەتىندە وقىتىلۋدا. اباي جولى – ماڭگىلىك جول. ول – ەشقاشان ەسكىرمەيدى, ەشقاشان ولمەيدى. ول – جاڭا بيىكتەرگە كوتەرىلە بەرەدى», دەدى مۇحتار تولەگەن.
شارا بارىسىندا ۋنيۆەرسيتەت ۇجىمى ەڭبەك ارداگەرى, ابايدىڭ تۋىسى ماناتاي تولعانباەۆتى, اقىن تولەگەن جانعاليەۆتى, ۇستاز باعدات ەسداۋلەتوۆانى, «قالامقاس» حالىقتىق ءانسامبىلىنىڭ ءانشىسى باقىت شاعاتاەۆانى, اباي, شاكارىم پوەزياسى كۇندەرى شاكىرتتەرى ۇنەمى توپ جارىپ جۇرگەن ۇلاعاتتى ۇستاز رايگۇل تىزگىنباەۆانى «اباي» توسبەلگىسىمەن ماراپاتتادى. ابايلىق كونەكوز اقساقالدار ۇلت اقىنىن ۇلىقتاۋ ءۇشىن وسكەمەننەن ارنايى كەلگەن ازاماتتارعا العىسىن جەتكىزدى. «بۇل ءان – بۇرىنعى اننەن وزگەرەك» دەمەكشى, بۇل فورۋمنىڭ مادەني-تانىمدىق ءمانى دە سالماقتى بولدى. ولاي دەيتىنىمىز وسكەمەندىك ستۋدەنتتەر مەن ۇستازدار اباي, شاكارىم مۇراجايلارىنا ساياحات جاساپ, ابايدىڭ ەلى, ۇلى تۇلعالارى, اباي, شاكارىم, مۇحتار مۇراسىنا قاتىستى تاعىلىمدى اڭگىمەلەرگە قانىقسا, جينالعان قاۋىم «شقو-نىڭ قاسيەتتى جەرلەرىن زەرتتەۋدەگى س.امانجولوۆ اتىنداعى شقمۋ-دىڭ ۇلەسى» كورمەسىنەن ولكەمىزدەگى ارحەولوگيالىق قازبا جۇمىستارىنىڭ ناتيجەلەرى جايلى قۇندى ماعلۇماتتارعا قانىقتى», دەيدى شىڭعىستاۋدىڭ اقساقالى ماناتاي تولعانباەۆ.
وسكەمەننەن كەلگەن مۇحامەدي مەشىتىنىڭ يمامى دۋبەك قۇسمان ۇلى اباي, شاكارىم جانە مۇحتار رۋحتارىنا قۇران باعىشتالىپ, قاتىم ءتۇسىرىلدى. كەسەنە باسىندا بولىپ, اباي باسقان توپىراقتى باسىپ, اباي جۇرگەن جولمەن ءجۇرىپ وتكەن ۋنيۆەرسيتەتتىڭ عالىم-ۇستازدارى مەن ستۋدەنتتەرى بۇل كۇنى ەرەكشە كوڭىل كۇيدە بولدى. قازاقستانداعى 100 كيەلى مەكەننىڭ بىرىنە سانالاتىن جيدەباي ولاردىڭ بويلارىنا تىڭ كۇش قۇيىپ, ارمان قۇستارىن شىڭعىستاۋ اسپانىندا شارىقتاتتى.
سوۆەت ماحمەتوۆ,
ارداگەر جۋرناليست
شىعىس قازاقستان وبلىسى,
اباي اۋدانى