ساياسي كەڭەستىڭ ايماقتىق بيۋروسىنىڭ ۇسىنىسمەن بەيسەنباي تاجىباەۆ «Nur Otan» پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى بولىپ تاعايىندالدى. ول بۇعان دەيىن تۇركىستان وبلىستىق ىشكى ساياسات باسقارماسىنىڭ باسشىسى قىزمەتىن اتقاردى. بۇل تۋرالى پارتيانىڭ ءباسپاسوز قىزمەتى حابارلادى.
بۇعان دەيىن «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ەلىمىزدىڭ بىرنەشە وبلىستارىن ارالاپ, وندا جەرگىلىكتى اتقارۋشى ورگان باسشىلارىنىڭ پارتيالىق جاۋاپكەرشىلىگىن كۇشەيتۋ جانە بارلىق دەڭگەيدەگى ماسليحاتتارداعى دەپۋتاتتىق فراكتسيالارىنىڭ ءرولىن ارتتىرۋ تۋرالى بىرقاتار ماسەلەلەر تالقىلانعان-دى. ونىڭ ىشىندە تەز ارادا شەشىمىن تابۋى ءتيىس پروبلەمالىق وبەكتىلەر جەكە پارتيالىق باقىلاۋعا الىنعان بولاتىن.
ارىس قالاسىنا جاساعان ءىس-ساپارىنان سوڭ باۋىرجان بايبەك ءوزىنىڭ Twitter-دەگى پاراقشاسىندا پارتياعا «Nur Otan»-نىڭ تۇركىستان وبلىستىق فيليالى ءبىرىنشى ورىنباسارىنىڭ ۇستىنەن كوپتەگەن شاعىمدار تۇسكەنىن جازدى.
– فيليال توراعاسىمەن كەلىسە وتىرىپ, بۇل ماسەلەنى ساياسي كەڭەستىڭ ايماقتىق بيۋروسىندا قاراپ, ن.جولداسوۆتى پارتيا قاتارىنان شىعارۋعا دەيىن شارا قولدانۋ كەرەك دەپ ەسەپتەيمىن. جالپى, حالىقتىڭ پارتياعا دەگەن سەنىمىن ارتتىرۋ ءۇشىن پارتيالىق ءتارتىپتى تۇبەگەيلى كۇشەيتىپ, ىشكى «تازارتۋ» جۇمىستارىن جۇرگىزۋ قاجەت», دەدى ول.
ايتا كەتۋ كەرەك, «Nur Otan» پارتياسىنىڭ ليدەرى نۇرسۇلتان نازارباەۆتىڭ پارتيانى «قايتا جۇكتەۋ» جانە كادرلاردى جاڭارتۋ جونىندەگى تاپسىرماسىنا سايكەس, بۇعان دەيىن ەرلان كاناليموۆ نۇر-سۇلتان قالاسىنداعى پارتيا فيليالى توراعاسىنىڭ ءبىرىنشى ورىنباسارى بولىپ تاعايىندالعان بولاتىن.