«بولاشاققا باعدار: رۋحاني جاڭعىرۋ» مەملەكەتتىك باعدارلاماسىنىڭ «تۋعان جەر – تۋعان ەل» باعىتىن جۇزەگە اسىرۋ اياسىندا اقمولا وبلىسى مادەنيەت, ارحيۆتەر مەن قۇجاتتامالار باسقارماسىنىڭ كوكشەتاۋ قالاسىنىڭ تاريحى مۋزەيى قىزمەتكەرلەرىمەن بىرقاتار تانىمدىق جوبالار جۇزەگە اسىرىلۋدا.
كوكشە ولكەسى – تاريحي وقيعالار مەن اتتارى اڭىزعا اينالعان ءبىرتۋار تۇلعالار: ەل قورعاعان باتىرلار, اقىن-جىراۋلار, بي-شەشەندەر ءدۇنيەگە كەلگەن كيەلى مەكەن. قوپا كولىنىڭ وڭتۇستىك جاعالاۋى مەن بۇقپا شوقىسىنىڭ ەتەگىندە, تابيعات سۇلۋلىعى قايتالانباس ايماقتا ورنالاسقان كوكشەتاۋ قالاسىنىڭ قۇرىلعانىنا بيىل 195 جىل. اقمولا وبلىسىنىڭ اكىمشىلىك ورتالىعى بولىپ تابىلاتىن قالامىزدىڭ مەرەيتويىنا وراي مۋزەي قىزمەتكەرلەرىمەن ارنايى جوسپارلانعان ءتۇرلى فورماتتاعى تانىمدىق ءىس-شارالار, اتاپ ايتار بولساق, كورىكتى قالامىز بويىنشا اۆتوبۋستىق ەكسكۋرسيالار, قالامىزدىڭ قۇرىلعانىنان باستاپ بۇگىنگى كۇنگە دەيىنگى دامۋ جولىنان ماعلۇمات بەرەتىن جىلجىمالى فوتوكورمەلەر, كەزدەسۋلەر, ءدارىستەر, بايقاۋلار, ەكسپوزيتسيالىق زالدار بويىنشا قىزىقتى ەكسكۋرسيالار كوپشىلىك كوڭىلىنەن شىعۋدا.
سولاردىڭ ءبىرى – ستەپنوگور قالاسىنىڭ تاريحي-ولكەتانۋ مۋزەيىندە 20-25 ماۋسىم ارالىعىندا وتكەن «تۋعان ولكەم – كورىكتى كوكشەم» اتتى جىلجىمالى كورمە. كورمە ەكسپوزيتسياسى ارقىلى ستەپنوگور قالاسى تۇرعىندارى مەن قالا قوناقتارى كوكشەتاۋ قالاسىنىڭ قۇرىلۋ تاريحى, ەكونوميكاسى, وندىرىستىك كاسىپورىندارى, دەنساۋلىق ساقتاۋ, مادەنيەت, ءبىلىم بەرۋ, سپورت سالالارىنىڭ دامۋى مەن ەل تاۋەلسىزدىگىنىڭ نىعايۋى جىلدارى كوپتەگەن وزگەرىستەرگە ۇشىراعان بۇگىنگى تىنىس-ءتىرشىلىگى تۋرالى ماعلۇمات الدى. كوپشىلىك نازارىنا ۇسىنىلعان ءداستۇرلى قولونەر شەبەرى سماعۇل كەنجەباي, اعاش شەبەرى ە.ماكەنوۆ, تەرى مەن مەتالل شەبەرى ر.ءشارىپوۆتىڭ بىرەگەي تۋىندىلارىمەن قاتار, كوكشەتاۋ قالاسىنىڭ بالالار كوركەمسۋرەت مەكتەبى ءتۇلەكتەرىنىڭ زاماناۋي قالامىزدىڭ كەلبەتىنە كورىك بەرىپ تۇرعان ناۋان حازىرەت اتىنداعى اقشاڭقاي مەشىت, دوستىق ءۇيى عيماراتى, جاڭا شىركەۋ, «ءتاۋەلسىزدىك» الاڭى جانە تاعى باسقا كورىكتى جەرلەر بەينەلەنگەن كارتينالارى كوپشىلىك قاۋىمدى تامساندىرىپ, رۋحاني ءلاززات سىيلادى.
كوكشەتاۋ قالاسىنىڭ قۇرىلۋ جانە دامۋ كەزەڭدەرىنە قىزىعۋشىلىق تانىتىپ, تۋعان جەرىمىزدىڭ شەجىرەلى تاريحىنا تەرەڭىرەك بويلاۋعا نيەتتى جەرلەستەرىمىز بەن قالا قوناقتارى ءۇشىن مۋزەيىمىزدىڭ ەسىگى ءاردايىم ايقارا اشىق.
كۇنسۇلۋ نۇرعاليەۆا,
كوكشەتاۋ قالاسىنىڭ تاريحى مۋزەيىنىڭ عىلىمي قىزمەتكەرى