دەپۋتاتتار قاراۋىنا پالاتانىڭ الداعى جالپى وتىرىسىنىڭ كۇن تارتىبىندە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا زاڭنامالىق تۇزەتۋلەر ەكىنشى وقىلىمدا قاراۋ ۇسىنىلادى.
زاڭ جوباسى اتاپ ايتقاندا, كوندومينيۋم وبەكتىلەرىن باسقارۋ جانە كۇتىپ-ۇستاۋ بويىنشا قىزمەتتى, ونى رەسىمدەۋ ءتارتىبىن, ورتاق م ۇلىكتى كۇردەلى جوندەۋ ءۇشىن اقشا قاراجاتىن جيناۋعا, وسى پروتسەستەرگە مەنشىك يەلەرىنىڭ وزدەرىنىڭ قاتىسۋىن, ونىڭ ىشىندە جەرگىلىكتى اتقارۋشى ورگانداردىڭ تۇرعىن ءۇي ينسپەكتسياسىن تارتۋ جانە تۇرعىن-ءۇي كوممۋنالدىق شارۋاشىلىق سالاسىنىڭ بىرىڭعاي مەملەكەتتىك اقپاراتتىق جۇيەسىن قۇرۋ مۇمكىندىگىن, سونداي-اق, تۇرعىن-ءۇي شارۋاشىلىعى سالاسىنداعى قولدانىستاعى زاڭناماداعى ولقىلىقتار مەن كولليزيالاردى جويۋعا باعىتتالعان.
سونىمەن قاتار, دەپۋتاتتار قازاقستان ۇكىمەتى مەن ەۋروپالىق يادرولىق زەرتتەۋلەر جونىندەگى ۇيىم (CERN) اراسىنداعى عىلىمي-تەحنيكالىق ىنتىماقتاستىققا قاتىستى حالىقارالىق ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسىن قارايدى دەپ كۇتىلۋدە.
بيۋرو وتىرىسىنىڭ كۇن تارتىبىندە لوتەرەيالار جانە لوتەرەيا قىزمەتى ماسەلەلەرى جانە كوشى-قون پروتسەستەرىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارىن, سونداي-اق, ەۋرازيالىق ەكونوميكالىق وداققا مۇشە مەملەكەتتەردىڭ قارجى نارىعى سالاسىنداعى زاڭناماسىن ۇيلەستىرۋ تۋرالى كەلىسىمدى راتيفيكاتسيالاۋ تۋرالى زاڭ جوباسىن جۇمىسقا الۋ كوزدەلۋدە.