جاڭادان سايلانعان پرەزيدەنتتىڭ ەلباسى نۇرسۇلتان ءابىش ۇلى نازارباەۆتىڭ باستامالارى مەن جاقسى ىستەرىن ودان ءارى جالعاستىرىپ, ساباقتاستىقتى ساقتاۋ ساياساتىن ۇستاناتىنى الاڭ كوڭىلدەردى ورنىنا ءتۇسىرىپ, ەرتەڭگى كۇنگە دەگەن سەنىمدى نىعايتا ءتۇستى دەگەن ويدامىن.
تاعى ءبىر جۇرەككە جىلىلىق ۇيالاتقان جايت, جاڭا پرەزيدەنتتىڭ ەل ەرتەڭى جاستاردىڭ زور الەۋەتىن, ياعني ولاردىڭ جاس قايراتى مەن جالىندى رۋحىن, تەرەڭ ءبىلىمىن مەملەكەتتىڭ نەگىزىن نىعايتۋ ىسىنە مولىنان پايدالانۋ كەرەك دەگەن ءسوزى كوڭىلدەن شىعىپ, كوكەيدەگىنى تاپ باستى.
قاسىم-جومارت توقاەۆ: «مەنىڭ ماقساتىم – قوعامنىڭ ءبىرلىگىن قامتاماسىز ەتۋ جانە ءاربىر ازاماتتىڭ قۇقىعىن قورعاۋ. ەڭ باستىسى, ءار جەردە جانە ءارقاشان قازاقستاننىڭ ۇلتتىق مۇددەسىن قورعايتىن بولامىن», دەگەن ۋادەسىن بەردى. مۇنى مەن ۇزاق جىلداردان بەرى تۇڭعىش پرەزيدەنتتىڭ سەنىمدى سەرىكتەسى بولىپ, تاۋەلسىز قازاقستاننىڭ دامۋىنا بار كۇش-جىگەرىن ارناپ كەلە جاتقان مەملەكەتشىل تۇلعانىڭ حالقىنىڭ الدىندا اعىنان جارىلىپ, زور جاۋاپكەرشىلىكتى موينىنا العانى دەپ قابىلدادىم.
كونستيتۋتسياعا قولىن قويىپ, ءۇمىت ارتقان حالقىنا انت بەرىپ, رەسمي تۇردە قىزمەتىنە كىرىسكەن جاڭا پرەزيدەنتىمىزگە سەنەمىز جانە اق جول تىلەيمىز!
بەكزات التىنبەكوۆ,
قازاقستان حالقى اسسامبلەياسى كەڭەسىنىڭ مۇشەسى,
قاراعاندى وبلىستىق قوعامدىق كەلىسىم كەڭەسىنىڭ توراعاسى, وبلىستىق ءماسليحاتتىڭ دەپۋتاتى
قاراعاندى