وڭتۇستىك كورەيانىڭ پرەزيدەنتى مۋن چجە ين قۇتتىقتاۋىندا ەكى ەل اراسىنداعى ستراتەگيالىق ارىپتەستىكتىڭ نىعايا تۇسەتىنىنە سەنىم ءبىلدىرىپ, مەملەكەت باسشىسىن سەۋلگە ساپارمەن كەلۋگە شاقىردى.
«قوس تاراپقا قولايلى ۋاقىتتا وزىڭىزبەن سەۋل قالاسىندا تاعى دا كەزدەسىپ, ەكى ەل اراسىنداعى ىنتىماقتاستىقتى دامىتۋ بويىنشا جاسامپاز ديالوگىمىزدى جالعاستىرۋعا دايىنمىن», – دەلىنگەن جەدەلحاتتا.
يران يسلام رەسپۋبليكاسىنىڭ پرەزيدەنتى حاسان رۋحاني قاسىم-جومارت توقاەۆقا تابىس, قازاقستان حالقىنا باق-بەرەكە تىلەپ, ەكى ەلدىڭ كوپجاقتى قارىم-قاتىناستارىنىڭ تەرەڭدەي تۇسەتىنىنە سەنىم ءبىلدىردى.
ليۋكسەمبۋرگتىڭ پرەمەر-ءمينيسترى كساۆە بەتتەل قازاقستان پرەزيدەنتىنە قۇرمەت ءبىلدىرىپ, تابىس تىلەدى.
«مەن قازاقستان مەن ليۋكسەمبۋرگ اراسىنداعى دوستىق قارىم-قاتىناستى دامىتۋ ءۇشىن سىزبەن ىنتىماقتاستىقتى جالعاستىرۋعا مۇمكىندىك تۋعانىنا قۋانىشتىمىن», – دەلىنگەن جەدەلحاتتا.
ليتۆا رەسپۋبليكاسىنىڭ پرەزيدەنتى داليا گريباۋسكايتە ءوز قۇتتىقتاۋ حاتىندا ليتۆا مەن قازاقستان اراسىنداعى ەكى جاقتى دەڭگەيدەگى دوستىق قارىم-قاتىناستار مەن ءوزارا ديالوگتى جالعاستىرۋعا, سونداي-اق ەۋروپالىق وداق اياسىنداعى ەكىجاقتى قارىم-قاتىناسىمىزدىڭ قارقىنى تومەندەمەيتىنىنە سەنىم بىلدىرەمىن. بۇل ءبىزدىڭ ەلدەرىمىز بەن ازاماتتارىمىز ءۇشىن مەملەكەتتەرىمىزدىڭ ەكونوميكالىق ءوسىمىن ارتتىرۋعا, سونداي-اق ءبىزدىڭ حالىقتارىمىزدىڭ ءال-اۋقاتىن نىعايتۋعا, ىنتىماقتاستىقتى ودان ءارى كەڭەيتۋگە جاڭا مۇمكىندىك اشاتىنىنا كامىل سەنەمىن, – دەپ جازعان.
ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيان قاسىم-جومارت توقاەۆتىڭ ايقىن جەڭىسى قازاقستاننىڭ زاماناۋي ءارى سەرپىندى مەملەكەت رەتىندە ودان ءارى سەنىمدى دامۋىنىڭ نەگىزى بولاتىنىن اتاپ ءوتتى.
«ءبىزدىڭ ينتەگراتسيالىق بىرىگۋىمىزدىڭ دامۋىنا ءسىزدىڭ قاتىسۋىڭىز وداقتىڭ تۇراقتى, ماقساتشىل جولمەن جۇرۋىنە جانە الەمدىك ەكونوميكانىڭ قوزعاۋشى كۇشىنە اينالۋىنا سەپتىگىن تيگىزەرىنە سەنىمدىمىن», – دەدى تيگران ساركيسيان.
سونداي-اق, قاسىم-جومارت توقاەۆتىڭ اتىنا ۇجىمدىق قاۋىپسىزدىك شارتى ۇيىمى باس حاتشىسىنىڭ مىندەتىن اتقارۋشى ۆالەري سەمەريكوۆ, شانحاي ىنتىماقتاستىق ۇيىمىنىڭ باس حاتشىسى ۆلاديمير نوروۆ, تۇركى كەڭەسىنىڭ باس حاتشىسى باعدات امرەەۆ, تۇركسوي ۇيىمىنىڭ باس حاتشىسى دۇيسەن قاسەيىنوۆ, جالپىعا ورتاق ەڭبەك فەدەراتسياسىنىڭ باس حاتشىسى ۆلاديمير ششەرباكوۆ, «گازپروم» كوپشىلىك اكتسيونەرلىك قوعامىنىڭ باسقارما توراعاسى الەكسەي ميللەر قۇتتىقتاۋ جولدادى.