ورتالىق زاماناۋي تۇلعاعا قاجەتتى بارلىق جاعدايمەن قامتاماسىز ەتىلگەن. ينتەرنەت-كافە, ەمدىك-ۋقالاۋ, فيزيكالىق-ەمدەۋ بولمەسى, كينوزال, كىتاپحانا, جاتتىعۋ زالى, يوگا, ۇستەل تەننيسى, بيليارد ۇستەلىمەن جانە بالالارعا ارناپ جابدىقتالعان ويىن ءبولمەلەرىمەن قامتىلعان. بۇل ورتالىقتىڭ ءبىر ەرەكشەلىگى – مۇندا تەك قاريالار عانا ەمەس, سونىمەن بىرگە ءومىردىڭ تالكەگىنە ۇشىراعان بالدىرعاندار اتا-اجە مەيىرىمى مەن قامقورلىعىنا ءبولەنبەك. سايكەسىنشە, قارتتار ءومىردىڭ ءبىر قۋانىشى – بالالارمەن ۋاقىت وتكىزىپ, نەمەرە ماپەلەمەك.
مەگاپوليستەگى جانعا جايلىلىق سىيلايتىن ورتالىقتا زەينەتكەرلەر مەن مۇمكىندىگى شەكتەۋلى جاندار, بالالار ءۇيىنىڭ تاربيەلەنۋشىلەرى بوس ۋاقىتتارىن وتكىزىپ, دەنساۋلىقتارىن جاقسارتا الادى. سونداي-اق مۇندا زەينەتكەرلەرگە تەگىن الەۋمەتتىك جانە مەديتسينالىق قىزمەت كورسەتىلەدى.
«قوعامنىڭ دامۋى قاريالارعا كورسەتىلەتىن قامقورلىقتان بايقالادى. جىلدىڭ باسىنداعى ەسەپتىك كەزدەسۋدە قالا تۇرعىندارىنىڭ ءبىرى شىمكەنتتەن قارت كىسىلەرگە ءومىر سالتىن جاقسارتىپ, دەنە شىنىقتىرۋعا ارنالعان ورتالىق اشۋدى سۇراعان بولاتىن. مىنە, وسى ورتالىقتى اشىپ وتىرمىز. زەينەتكەرلەر مەن قاريالار بۇل ورتالىققا وتباسىمەن, بالالارىمەن جانە نەمەرەلەرىمەن كەلە الادى», دەدى ع.ءابدىراحىموۆ.
اتالعان ورتالىق ەلباسى نۇرسۇلتان ءابىش ۇلى نازارباەۆتىڭ وتانداستارىمىزدىڭ ءومىر ءسۇرۋ جاسىن ۇزارتۋ مەن بۇقارالىق سپورتتى دامىتۋ تاپسىرماسى اياسىندا اشىلىپ وتىر. ايتا كەتەرلىگى, شىمكەنتتىكتەردىڭ ءومىر ءسۇرۋ جاسى ۇزارىپ كەلەدى. مەگاپوليس تۇرعىندارىنىڭ قازىرگى تاڭداعى ورتاشا جاسى 78 جاستان اسادى.
يگىلىكتى شارادا قالا اكىمى تۇرعىنداردى سپورتپەن جاپپاي شۇعىلدانىپ, سالاماتتى ءومىر سالتىن ۇستانۋعا شاقىردى. قارتتارعا ارناپ قويىلعان كونتسەرتتىك قويىلىمدا بالاشا قۋانعان زەينەتكەرلەر بي بيلەپ, ءان سالىپ, مەرەكە شاتتىعىنا بولەندى.
شىمكەنت