سىرت الاڭداعى كەزدەسۋ الدىندا قازاقستان قۇراماسى ساپىنداعى نەگىزگى ويىنشىلار يۋري لوگۆينەنكو, دميتري شومكو, باقتيار زاينۋتدينوۆ, ازات نۇرعاليەۆ, الەكساندر مەركەل جاراقات الىپ, ارىپتەستەرىنە كومەكتەسە المادى. ارينە بۇكىل ماتچ بويى ولاردىڭ ورنى ويسىراپ, قۇرامادا جوق ەكەنى بىردەن بايقالدى. ءتىپتى العاشقى ەكى گولدىڭ ەكەۋى دە قورعاۋشىلاردىڭ قاتەلىگىنەن سوعىلدى. بەلگياعا قارسى كەزدەسۋ الدىندا ميحال بيلەك جۋرناليستەرمەن تىلدەسكەندە نەگىزگى قۇرامنىڭ بىرنەشە ويىنشىسى كومەكتەسە الماعانىمەن, قالعان ويىنشىلارعا سەنەتىنىن ايتىپ, «فيفا رەيتينگىندە كوش باستاپ كەلە جاتقان كوماندامەن وينايمىز. جاسىل الاڭعا شىققان فۋتبولشىلار قولدان كەلگەننىڭ ءبارىن كورسەتەدى دەپ ويلايمىن», دەگەن ەدى. ۇلتتىق قۇرامانىڭ ناۋرىز ايىندا وتكىزگەن ەكى ماتچىمەن سالىستىرعاندا بۇل كەزدەسۋدە قازاقستان قۇراماسىنىڭ ويىنشىلار تىزىمىندە اسا قاتتى وزگەرىس بايقالا قويعان جوق. تەك ۇلتتىق قۇراماعا جاڭادان شاقىرىلعان «قايسار» كلۋبىنىڭ قورعاۋشىسى الەكساندر ماروچكين مەن ەل چەمپيوناتىنىڭ سوڭعى تۋرىندا گول سوعىپ, كوزگە ءتۇسىپ جۇرگەن «ورداباسىنىڭ» شابۋىلشىسى توقتار جاڭعىلىشبايدىڭ ءبىرىنشى مينۋتتان باستاپ الاڭعا شىققانى ازداپ تاڭداندىردى. قاقپانى قورعاۋ ادەتتەگىدەي «ورداباسى» قاقپاشىسى دميتري نەپوگودوۆقا سەنىپ تاپسىرىلسا, ورتالىق قورعاۋشى بولىپ «ورداباسىنىڭ» ەكى ويىنشىسى تەمىرلان ەرلانوۆ پەن سەرگەي مالىي شىقتى. سول قاپتالدا يان ۆوروگوۆسكي («قايرات»), وڭ قاپتالدا ابزال بەيسەبەكوۆ («استانا») ورنالاستى. ال جارتىلاي قورعانىستا يۋري پەرتسۋح («استانا»), يسلامبەك قۋات پەن گەورگي جۋكوۆ («قايرات») جانە ماكسيم فەدين («توبىل») وينادى.
ماتچتىڭ العاشقى 10 مينۋتىندا ەكى قۇراما دا ءبىر-ءبىرىن الىستان بايقاسىپ ءجۇردى. ال 11-مينۋتتا بەلگيانىڭ العاشقى قاۋىپتى شابۋىلى بىردەن گولعا اينالدى. ەدەن ازاردىڭ قاپتالدان اۋەلەتە اسىرعان دوبىنا ءبىرىنشى دريس مەرتەنس جەتىپ, ەسەپتى اشتى. ارادا نەبارى ءۇش مينۋت وتكەندە الاڭ يەلەرى ساپىنان تيموتي كاستانە مەرگەندىگىمەن كوزگە ءتۇسىپ, ەسەپتى 2:0-گە جەتكىزدى. كەزدەسۋدىڭ ەكىنشى بولىگىندە باس باپكەر ميحال بيلەك الاڭعا شابۋىلدا ويناعان توقتاردىڭ ورنىنا باۋىرجان يسلامحاندى شىعاردى. باپكەردىڭ باستى ماقساتى – يسلامحان ارقىلى دوپتى ورتادا كوبىرەك ۇستاپ, ءوز ايىپ الاڭىمىزعا دوپ ءجىبەرمەۋ ەدى. بىراق 50-مينۋتتا رومەلۋ لۋكاكۋ قاقپامىزعا ءۇشىنشى گولدى سالدى. دەگەنمەن, قازاقستان قۇراماسىنىڭ فۋتبولشىلارى ەكىنشى تايمدا بەلسەندى ويناپ, كۋرتۋا قورعاعان قاقپاعا قاۋىپتى شابۋىل ۇيىمداستىرعانىن دا ايتا كەتەيىك. ەكى تايمنىڭ قورىتىندىسى بويىنشا كەزدەسۋ 3:0 ەسەبىمەن بەلگيا قۇراماسىنىڭ جەڭىسىمەن اياقتالدى.
«ءى» توبىنداعى قازاقستان-بەلگيا ماتچىنان بولەك تاعى ەكى كەزدەسۋ ءوتتى. تۋرنير كەستەسىندە ەكىنشى ورىندا تۇرعان رەسەي قۇراماسى ءوز الاڭىندا سان-مارينو فۋتبولشىلارىن ويسىراتا (9:0) جەڭدى. ال شوتلانديا قۇراماسى كيپردەن 2:1 ەسەبىمەن باسىم ءتۇستى. ءۇش تۋردان كەيىن بەلگيا 9 ۇپايمەن كوش باستادى. 6 ۇپايى بار شوتلانديا ءۇشىنشى, كيپر مەن قازاقستان قۇراماسى ءۇش ۇپايمەن ءتورتىنشى جانە بەسىنشى ورىندا تۇر. بىردە-ءبىر ۇپايى جوق سان-مارينو كوش سوڭىندا قالىپ قويدى. ايتا كەتەيىك, قازاقستان قۇراماسى ەرتەڭ ەلورداداعى «استانا ارەنا» ستاديونىندا ءدال وسى سان-مارينو قۇراماسىنا قارسى وينايدى. ماتچ نۇر-سۇلتان ۋاقىتىمەن كەشكى ساعات 20:00-دە باستالادى.