سايلاۋعا داۋىس بەرۋگە ەرتە بارعان ازاماتتاردىڭ قاتارىندا قالا اكىمى عابيدوللا ءابدىراحىموۆ تا بولدى. ول №1 ا.س.پۋشكين مەكتەبىندە ورنالاسقان №92 سايلاۋ ۋچاسكەسىندە تاڭداۋ جاساپ, بارشا قالالىقتاردى ەلدەگى ماڭىزدى ساياسي ناۋقانعا بەلسەنە قاتىسۋعا شاقىردى.
«بۇگىنگى كۇن - مەملەكەتىمىزدىڭ بولاشاعىن ايقىندايتىن اسا ماڭىزدى تاريxي ءسات. بۇگىن ءبىز ورتاق بولاشاعىمىز - وركەندەۋ مەن دامۋ ءۇشىن داۋىس بەرەمىز. الدىمىزدا مەملەكەتىمىزدى العا ودان ءارى جەتەلەيتىن اۋقىمدى مىندەتتەر تۇر. قازاقستان دامۋدىڭ داڭعىل جولىمەن ۇلكەن قادام جاسارىنا سەنىمدىمىن. بارشاڭىزدى سايلاۋ ۋچاسكەلەرىنە بارىپ, داۋىستارىڭىزدى ءوز كانديداتىڭىزعا بەرۋگە شاقىرامىن. بۇل ساياسي ءىس-شارا - ەلىمىز ءۇشىن وتە ماڭىزدى. ەڭ ءبىرىنشى بولىپ, ارىپتەستەرىممەن بىرگە كەلىپ داۋىس بەرۋدى ۇيعاردىم. بۇل - بولاشاعىمدى تاڭداۋ. بارشا قالا تۇرعىندارىن ءوز كونستيتۋتسيالىق قۇقىعىن پايدالانىپ, داۋىس بەرۋگە شاقىرامىن. بارىندە ءوز تاڭداۋ قۇقىعى بار», - دەدى ع.ءابدىراحىموۆ.
شىمكەنت قالالىق سايلاۋ كوميسسياسىنىڭ مالىمدەۋىنشە شىمشاھارداعى سايلاۋ بارىسىن قاداعالاۋعا 24 حالىقارالىق باقىلاۋشى تىركەلگەن. ولاردىڭ دەنى تمد اۋماعىن كەلگەن ازاماتتار.
«بۇل 2016 جىلدىڭ 20 ناۋرىزىنداعى قازاقستان رەسپۋبليكاسىنىڭ پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنداعى سايلاۋشىلار سانىنان 1,5 ەسەدەي ارتىق», دەيدى شىمكەنت قالالىق سايلاۋ كوميسسياسىنىڭ حاتشىسى قايىربەك قۇنانباەۆ مالىمدەدى.
ايتا كەتەرلىگى, شىمكەنتتە 9 ماۋسىم – قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا قوعامدىق كولىكتەر جولاۋشىلاردى تەگىن تاسىمالدادى. بۇگىندە شىمكەنتتە 27 كولىك كومپانياسىنا قارايتىن 80 باعىت بار. وسى باعىتتاردا 1155 كولىك جولاۋشىلارعا قىزمەت كورسەتەدى. سول كولىكتەردىڭ بارلىعى دا سايلاۋ كۇنى جولاۋشىلاردى تەگىن تاسىمالدادى.
شىمكەنت قالاسىنداعى جاستار رەسۋرستىق ورتالىعىندا ورنالاسقان №99 سايلاۋ ۋچاسكەسىندە 2402 ادام تىركەلگەن. ونىڭ ىشىندە 3-ءى مۇمكىندىگى شەكتەۋلى جاندار. مۇندا كەلۋشىلەردىڭ ساياسي دوداعا ءبىر كىسىدەي اتسالىسۋى ءۇشىن بار جاعداي جاسالعان. قالا تۇرعىندارىنىڭ دا, ەل ىرگەسىن ۇستار جاستاردىڭ دا بەلسەندىلىگى ەرەكشە. «امانات» ازاماتتىق پلاتفورماسىنىڭ دا سايلاۋداعى باقىلاۋ جۇمىستارى جوعارى دەڭگەيدە.
«تاڭەرتەڭنەن ءاربىر كەلگەن سايلاۋشىلارىمىز ءوزىنىڭ قالاعان كانديداتتارىنا داۋىس بەرىپ جاتىر. داۋىس بەرۋگە قۇقىلى ءار ازامات سايلاۋدا ءوز تاڭداۋىن جاساۋى ءتيىس. ولار وسىنداي كەزەڭدە بەيتاراپ قالماۋى كەرەك», - دەيدى سايلاۋدىڭ باقىلاۋشىلار.
«شىمكەنت تۇرعىندارىنىڭ بەلسەندىلىگى جوعارى. ساعات 18:00 گە دەيىنگى مالىمەت بويىنشا شىمقالادا 362 مىڭنان استام تۇرعىن سايلاۋ ۋچاسكەلەرىنە بارىپ ءوز تاڭداۋىن جاسادى. بۇل جالپى سايلاۋشىلاردىڭ 63 پايىزىن قۇرايدى. بۇل كورسەتكىش 20:00-گە دەيىن ارتا تۇسەدى», دەيدى قالالىق سايلاۋ كوميسسياسىنىڭ توراعاسى ەرلان داۋىلباەۆ.