ءوز كەزەگىندە «پاراساتتىلىق ەلشىلەرى» پاراسات, ادالدىق سەكىلدى قۇندىلىقتاردىڭ ەل اراسىندا تارالىپ, ناسيحاتتالۋىنا ىقپال ەتەتىن امباسسادورلار بولماق. جالپى, پاراساتتىلىق ەلشىسى, ياعني امباسسادور بولۋ وڭاي شارۋا ەمەس ەكەن. ول ءۇشىن ءسوزى مەن ءىسى كەلىسكەن, وزىندىك ورتاسىندا ءادىل, ەڭبەكقور ازامات رەتىندە بەينەسىن قالىپتاستىرعان تۇلعا بولۋدىڭ ماڭىزى جوعارى. ياعني,سالاعا ەنگىزىلگەلى وتىرعان امباسسادور ۇعىمى – پاراساتتىلىق پەن ادالدىق قۇزىرەتتەرىنىڭ ەڭ بيىك ولشەمى بولماق.
مەملەكەتتىك قىزمەتشىلەر قوعامدا مورالدىق قۇندىلىقتاردى جان-جاقتى قالىپتاستىرىپ, باسقا ادامدارعا ادالدىق پەن پاراساتتىلىق ۇلگىسىن كورسەتۋلەرى كەرەك. تەك وسىلاي عانا ينتەللەكتۋالدى جانە پاراساتتى قوعام قۇرۋعا قول جەتكىزە الامىز- دەيدى قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى سەرىكباي نۇرعيساەۆ.
وسىلايشا, پاراساتتىلىق ەلشىلەرى ارقىلى جالپى قوعامدىق سىبايلاس جەمقورلىققا قارسى مادەنيەتتى قالىپتاستىرۋ مەن ادالدىق, ادامگەرشىلىك جانە ادىلدىك, ار-ۇجدان سياقتى ءبىر-بىرىمەن پاراپار ۇستانىمدارعا جول اشىلماق.
قازىر الماتى وبلىسىنداعى جيىرما اۋدان مەن قالادا سىبايلاس جەمقورلىققا قارسى ارنايى مونيتورينگتەۋ توپتارى, «جەتىسۋ – ادالدىق الاڭى» جوباسىنىڭ اياسىنداعى لەكتورلىق توپتار قۇرىلعان. بۇدان بولەك, 762 مەكتەپتە «ادال ۇرپاق» ەرىكتى مەكتەپ كلۋبتارى مەن 60 كوللەدج بەن 3 جوعارعى وقۋ ورنىندا «سانالى ۇرپاق» كلۋبتارى مەن كەڭسەلەرى جۇمىس جاساۋدا.