سەرىك بەكبوسىنوۆتىڭ ايتۋىنشا, بۇل ۋچاسكىدە قىرعىزستان مەن رەسەيدەن كەلگەن باقىلاۋشىلار سايلاۋ بارىسىن باقىلىپ وتىر. مۇندا مۇمكىندىگى شەكتەۋلى ازاماتتار ءۇشىن بارلىق جاعداي جاسالىپتى. كوزى ناشار كورەتىندەر ءۇشىن ارنايى لۋپا, ال جۇرە المايتىندار ءۇشىن داۋىس بەرۋ كابيناسىنا دەيىن الىپ باراتىن قول اربالار جەتكىزىلگەن.
قىرعىزستاندىق باقىلاۋشى شىنار الىباەۆا بىزگە بەرگەن سۇحباتىندا تاڭەرتەڭ ساعات 8-دە, ەسىك اشىلىسىمەن ادامدار كەلىپ داۋىس بەرە باستاعانىن ايتتى.
بۇگىن الماتىدا جولاۋشىلاردى تاسىمالدايتىن قوعامدىق كولىكتە تەگىن قىزمەت كورسەتىلۋدە. بارلىق باعىتتاعى كولىكتەردىڭ قىزمەتى جەكسەنبىلىك جوسپار بويىنشا ۇيىمداستىرىلعان. الدىن الا جۇرگىزىلگەن ەسەپ بويىنشا, بۇل كۇنى 700 000 مىڭ ادامعا تەگىن قىزمەت كورسەتىلەدى.
جولاۋشىلاردى تاسىمالدايتىن كاسىپورىندار قاۋىمداستىعىنىڭ توراعاسى دانا احاتوۆا بۇل شەشىم الماتىلىقتاردىڭ ساياسي ناۋقاندا قالىس قالماۋىنا اسەر ەتەدى دەپ وتىر.