سالتاناتتى جيىندا ءوڭىر باسشىسى اباي اۋدانىنداعى توپار ەلدى مەكەنىنىڭ ايەلدەر ۆولەيبول كومانداسىنا جانە «جىگەر» ستاديونىنىڭ فۋتبول ۇجىمىنا سپورتتىق جابدىقتار جيىنتىعىن تارتۋ ەتتى.
وليمپيادا چەمپيونى سەرىك ساپيەۆ تە جەرلەستەرىن جاڭا سپورتتىق نىساننىڭ اشىلۋىمەن قۇتتىقتادى.
– مۇنداي عاجاپ سپورتتىق عيماراتتار جاستاردى سپورتپەن اينالىسۋعا ىنتالاندىرادى. كەزىندە مەن سپورتتىق مەكتەپ رەتىندە قايتا جابدىقتالعان قاراپايىم ورتا مەكتەپتە وقىعان ەدىم. قازىر جاعداي جاقسى جاققا قاراي وزگەرگەن. بالالاردىڭ كەڭ دە زامانۋي زالداردا جاتتىعۋعا مۇمكىندىگى بار, – دەدى س.ساپيەۆ.
ىشىندە جاتتىعۋ, كۇرەس, ۆولەيبول, باسكەتبول جانە شاعىن فۋتبولعا ارنالعان زالدارى بار جاڭا كەشەندە ءبىر مەزگىلدە 600 ادامعا دەيىن جاتتىعا الادى. سونداي-اق, مۇندا 320 ورىندىق كورەرمەن زالى دا بار. بۇل جەردە مۇمكىندىگى شەكتەۋلى ادامدار ءۇشىن ۇستەل تەننيسى, ۆولەيبول جانە جەڭىل اتلەتيكا ۇيىرمەلەرى ۇيىمداستىرىلعان.
ابايداعى جاڭا دەنە شىنىقتىرۋ-ساۋىقتىرۋ كەشەنىندە 20 باپكەر مەن 30 تەحنيكالىق جانە اكىمشىلىك قىزمەتكەر جۇمىسپەن قامتاماسىز ەتىلدى.