جۇمىسشى توپقا قالا اكىمى ع.ءابدىراحىموۆ كاسىپكەرلىك سالاسىندا مەملەكەتتىك قىزمەتتەر كورسەتىپ وتىرعان «بيزنەس سۋپەرماركەت» پەن «E-Commerce Center» ەلەكتروندى كوممەرتسيا ورتالىقتارىنىڭ جانە اكىمدىك عيماراتىنىڭ ءبىرىنشى قاباتىنان اشىلعان «اشىق اكىمدىك» ورتالىعىنىڭ جۇمىسىمەن تانىستىردى.
اكىم تانىستىرۋ بارىسىندا اتالعان ورتالىقتار ارقىلى مەملەكەتتىك قىزمەت سالاسىن ۋاقىت تالابىنا ساي جەتىلدىرىپ, باسقارۋ جۇيەسىنىڭ تيىمدىلىگىن ارتتىرۋ كوزدەلگەنىن اتاپ ءوتتى.
قىزمەتتەردى تسيفرلاندىرۋ - سىبايلاس جەمقورلىق كورىنىستەرىن الدىن الۋدىڭ نەگىزگى كومەكشىسى ەكەنىن ايتقان اگەنتتىك توراعاسى اكىمدىك باستامالارىن قولداپ, اتقارىلىپ جاتقان جۇمىستارعا وڭ باعاسىن بەردى.
سونىمەن قاتار, قالا اكىمىنىڭ ورىنباسارى د.جۋمين جۇمىسشى توپقا ەكسپريمەنت جۇزىندە ەنگىزىلگەن باسقارۋ جۇيەسى بويىنشا اتقارىلعان ەكى ايلىق جۇمىسىن باياندادى. ءوز سوزىندە اليك شپەكباەۆ مەملەكەتتىك قىزمەتتەردى الۋدىڭ قولايلى جاعدايى جاسالىپ جاتقان əكىمدىكتىڭ وسىناۋ باستامالارىن اۋقىمدى جۇمىستارعا بالاپ, مۇنى سىبايلاس جەمقورلىقتان تازا قوعامنىڭ ەڭ باستى قۇندىلىقتارىنا جاتقىزدى. سونداي-اق, ول شىمكەنتتىڭ ەڭ كرەاتيۆتى قالا ەكەنىن اتاپ ءوتتى.
اگەنتتىك توراعاسى باستاعان جۇمىسشى توپ وسى كۇنى شىمكەنت قالاسىنىڭ اكتيۆىمەن كەزدەستى. قالا باسشىسى عابيدوللا ءابدىراحىموۆتىڭ توراعالىعىمەن وتكەن جيىندا سىبايلاس جەمقورلىققا قارسى ءىس-قيمىل بويىنشا ەلىمىزدە جۇزەگە اسىرىلىپ جاتقان ساياسات پەن ازاماتتاردىڭ قاجەتتىلىگىنە باعىتتالعان مەملەكەتتىك اپپاراتتىڭ الداعى پەرسپەكتيۆاسى تۋرالى ءسوز قوزعالدى.
جيىن بارىسىندا اليك شپەكباەۆ ۇزدىك كومپانيالاردا جۇمىس تاجىريبەسى بار نەمەسە جەتەكشى الەمدىك ۋنيۆەرسيتەتتەردىڭ عىلىمي دارەجەسى بار جوعارى بىلىكتى ازاماتتاردى مەملەكەتتىك قىزمەتكە قابىلداۋدىڭ وڭتايلاندىرىلعان مەحانيزمى ەنگىزىلىپ جاتقانىن ءمالىم ەتتى.
سونداي-اق, ول كادرلىق قامتاماسىز ەتۋ ماسەلەلەرىندە جەدەلدىكتى ارتتىرۋ ءۇشىن ىشكى كونكۋرستار ءبىر كونكۋرسقا بىرىكتىرىلەتىن جانە جاڭا جالاقى جۇيەسىن كەڭەيتۋ بويىنشا جۇمىستار جالعاساتىنىن جەتكىزدى.