قازاقستان رەسپۋبليكاسىنىڭ پرەمەر-ءمينيسترىنىڭ ءبىرىنشى ورىنباسارى – قارجى ءمينيسترى ءاليحان سمايىلوۆ پەتەربۋرگ حالىقارالىق ەكونوميكالىق فورۋمى اياسىندا سينگاپۋر رەسپۋبليكاسىنىڭ ساۋدا جانە ونەركاسىپ ءمينيسترى كو پو كۋنمەن كەزدەستى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
كەزدەسۋ بارىسىندا قازاقستان مەن سينگاپۋر اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋ ماسەلەلەرى تالقىلاندى. اسىرەسە, ەكى ەل اراسىنداعى قىزمەتتەردىڭ ەركىن ساۋداسى مەن ينۆەستيتسيالار تۋرالى كەلىسىمگە نازار اۋدارىلدى.
«بىزدە تاۋار اينالىمىنىڭ كولەمىن ارتتىرۋ الەۋەتى بار, قالىپتاستىرىلىپ جاتقان ەركىن ساۋدا ايماعى بۇعان ىقپال ەتۋى ءتيىس. بيىل كۇزدە وسىنداي ماڭىزدى شارتقا قول قويۋدى جوسپارلاپ وتىرمىز» دەدى ءا. سمايىلوۆ.
قازاقستان ءوز تاراپىنان كەلىسسوزدەردى بەلگىلەنگەن مەرزىمدە اياقتاۋ ءۇشىن بارلىق كۇش-جىگەردى جۇمساۋعا دايىن.
«بولاشاق كەلىسىم ەلدەرىمىز اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى ارتتىرۋدىڭ ماڭىزدى قۇرالىنا اينالادى» دەدى ءا. سمايىلوۆ.