قايىرىمدىلىق شاراسى بارىسىندا جينالعان 3 ميلليون تەڭگەدەن استام قارجى اۋىر ناۋقاسقا ۇشىراعان بالالار ءۇشىن قولاربالار مەن ەستۋ اپپاراتتارىن ساتىپ الۋعا جۇمسالادى. سونداي-اق 3 بالاعا اقشالاي كومەك بەرىلەدى.
«ءبىزدىڭ ماقساتىمىز – كومەككە مۇقتاج جاندارعا قول ۇشىن بەرىپ قانا قويماي, جاس ۇرپاقتى وزگەنىڭ قيىندىعىن بىرگە بولىسە بىلۋگە باۋلۋ. مەكتەبىمىزدە ءتۇرلى الەۋمەتتىك جوبالار جۇزەگە اسىرىلادى. بيىل قايىرىمدىلىق بالىن وتكىزۋدى ۇيعاردىق. وسىنداي شارانى ەكى جىلدا ءبىر رەت ۇيىمداستىراتىن بولامىز», دەيدى مەكتەپ حورەوگرافى ۆيكتوريا تيحونكو.
اۋكتسيونعا 12 لوت شىعارىلىپ, كارتينالار, قىشتان جاسالعان بۇيىمدار لەزدە ساتىلىپ كەتكەن. 9 سىنىپ وقۋشىسى ارۋجان بەكەتتىڭ قولىنان شىققان «ءپىل» اتتى كارتينا 136 مىڭ تەڭگەگە ساۋدالانعان.
«ءپىل – دانالىقتىڭ, اقىلدىڭ, سابىردىڭ سيمۆولى. بۇل كارتينا ءوزى بارعان شاڭىراققا سەنىم, ماحاببات, بەرەكە اكەلەتىنىنە سەنىمدىمىن. وسى سۋرەتتى سالۋ ءۇشىن 5 كۇن ەڭبەكتەندىم. بويىمداعى بار ونەرىمدى دارىتۋعا تىرىستىم. از دا بولسا كومەك بولاتىنى جايىنداعى وي مەنى العا يتەرمەلەدى. باعاسى 8 مىڭ تەڭگەدەن باستالعان كارتينام بۇگىنگى اۋكتسيوندا ەڭ قىمباتقا باعالاندى. ەڭبەگىمنىڭ اقتالعانىنا قاتتى قۋاندىم. سەبەبى ءدال وسىنداي باعاعا ساتىلادى دەپ ويلاماپپىن. كاسىبي سۋرەتشى ەمەسپىن عوي. ونى ساتىپ العان كاسىپكەرگە العىسىم شەكسىز», - دەيدى ارۋجان ىشكى تولقىنىسىن جاسىرا اماي.
اۋكتسيونعا شىعارىلعان بۇيىمداردان عانا تۇسكەن قاراجات 569 مىڭ تەڭگەنى قۇرادى. دەمەۋشىلەر ايتارلىقتاي ۇلەستەرىن قوستى. جينالعان قاراجات تۋا ءبىتتى سال كەسەلىنە شالدىققان 2 بالاعا ارنايى اربا مەن قۇلاعىندا مۇكىسى بار 3 جەتكىنشەككە ەستۋ اپپاراتتارىن الۋعا جۇمسالماق.
«مەنىڭ بالاما ەستۋ اپپاراتىن سىيعا تارتقاندارىڭىز ءۇشىن راحمەت. وسىنداي ىزگى ۇرپاق ءوسىپ كەلە جاتقان قوعامدا ءومىر ءسۇرىپ جاتقانىما قۋانامىن. شىعارماشىل, ىزدەنىمپاز, تالانتتى جاستار باردا ەلىمىزدىڭ بولاشاعى جارقىن بولاتىنىنا سەنىمدىمىن. بارشاڭىزعا مىڭ العىس», - دەدى كوپشىلىك الدىندا ءسوز العان يرينا ديدەنكو.
قايىرىمدىلىق بالى بارىسىندا 8 وتباسىنا ماتەريالدىق كومەك كورسەتىلدى.