- فورۋم – ءبىزدىڭ جاس مۇعالىمدەردىڭ جەكە باستاماسى. جاس مۇعالىمنىڭ موتيۆاتسياسىن ارتتىرۋ ماقساتىندا سونىمەن قاتار Facebook, تەلەگرام سياقتى تانىمال الەۋمەتتىك جەلىلەردى پايدالانا وتىرا تاجىريبە الماسۋ پلاتفورماسىن قۇرۋدى كوزدەيمىز. وسىلايشا, مۇعالىمدەر اراسىندا ءبىلىم الماسۋ, ارقايسىمىزدىڭ تيىمدىلىگىن ارتتىرادى, - دەيدى تالدىقورعان قالاسىنداعى نازارباەۆ زياتكەرلىك مەكتەبى ديرەكتورىنىڭ وقۋ جونىندەگى ورىنباسارى ۆيكتور سوسين فورۋمنىڭ ماقساتى جايىندا.
جاس ۇستازدار پەداگوگيكالىق شەبەرحانالارعا, كاسىبي تۇرعىدان, جەكە تۇلعا رەتىندە دامۋعا ارنالعان ادىستەمەلىك, ارت سەسسيا, ءارتۇرلى كوماندالىق جانە كرەاتيۆتى دامىتۋعا ارنالعان ترەنينگتەرىنە قاتىستى. زياتكەرلىك مەكتەپتىڭ سپيكەرلەرى ءوز ادىستەمەلەرىن جاڭا فورماتتا ۇسىندى.
- بۇل فورۋمدا بىزگە بەلگىلى ءادىس-تاسىلدەردىڭ «موزايكا», «رافت», «ءۇنسىز كينو», «ۆەنن دياگرامماسى» قىر-سىرىن, ماقساتىن ناقتى ايقىنداپ بەردى. كوپتەگەن كرەاتيۆتى ويلاۋعا يتەرمەلەيتىن تاپسىرمالار ورىندادىق. قالاي ۇستاز-بلوگەر جانە سالاۋاتتى ءومىر سالتىن ۇستاناتىن تابىستى مامان بولۋدىڭ جولدارىن قاراستىردىق. سونداي-اق مۋزىكالىق ءبىلىم دە بەردى, ارت-سەسسيا كەزىندە قولونەر بۇيىمدارىن جاساپ, ءبىراز دەمالىپ قالدىق. فلەشموب تا بيلەدىك, ءان دە سالدىق. جاس ۇستازدار فورۋمىندا ءبىلىم كوكجيەگىم كەڭەيىپ, وزىمە ۇلكەن ادىستەمەلىك كومەك الدىم,- دەيدى تەكەلى قالاسىنىڭ №2 ورتا مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى گۇلجازيرا وردەنبەك.
جاس مۇعالىمدەر فورۋمىنىڭ ارنايى قوناعى بولىپ «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى توراعاسىنىڭ ورىنباسارى ايدانا شيليبەكوۆا, OYLA اتتى تانىمال عىلىمي باسىلىمنىڭ رەداكتورى الماس ورداباەۆ جانە تالدىقورعان قالاسىنىڭ اكىمى عالىمجان ءابدرايموۆ شاقىرىلدى.
- قازىرگى تاڭدا مۇعالىم جالعىز اقپاراتتىڭ كوزى بولۋدان قالدى. ناقتى ءبىلىم وزەكتىلىگىن جوعالتتى. ەندى اقپاراتپەن جۇمىس ىستەي ءبىلۋ, ياعني ونى ومىردە قولدانۋ مۇمكىندىگى الدەقايدا ماڭىزدى, سوندىقتان مۇعالىمنىڭ ءرولى دە وزگەرىپ جاتىر, - دەپ الماس ورداباەۆ ءوز پىكىرىن ءبىلدىردى.
وبلىستىق جاس مۇعالىمدەر فورۋمى نازارباەۆ زياتكەرلىك مەكتەپ وقۋشىلارىنىڭ مەرەكەلىك كونتسەرتىمەن اياقتالدى.