سلەتكە قىزىلوردا وبلىسىنىڭ اكىمى قىرىمبەك كوشەرباەۆ, قر اۋىل شارۋاشىلىعى ءمينيسترى ساپارحان وماروۆ, «قازاگرو» ۇلتتىق باسقارۋشى حولدينگىنىڭ باسقارما توراعاسى ەربول قاراشوكەەۆ, قارجى ينستيتۋتتارى باسشىلارى, مال شارۋاشىلىعى عىلىمي-زەرتتەۋ ينستيتۋتتارىنىڭ جەتەكشى عالىمدارى, سونداي-اق اتىراۋ, اقتوبە, باتىس قازاقستان, جامبىل, قاراعاندى جانە پاۆلودار وبلىستارىنىڭ اگرارشىلارى قاتىستى.
مۇندا جەرگىلىكتى اۋىل شارۋاشىلىعى تاۋارىن وندىرۋشىلەردىڭ اۋىل شارۋاشىلىعى ونىمدەرى, ۆەتەرينارلىق تەحنيكا جانە جابدىقتارىنىڭ كورمەسى ۇيىمداستىرىلدى. سونىمەن قاتار, سەمينار وتكىزىلىپ, وندا سەلەكتسيالىق مال شارۋاشىلىعىن دامىتۋ جانە اۋىل شارۋاشىلىعى ونىمدەرىنىڭ باسەكەگە قابىلەتتىلىگىن ارتتىرۋ ماسەلەلەرى تالقىلاندى.
سلەتتىڭ سالتاناتتى اشىلۋىندا وبلىس اكىمى قىرىمبەك كوشەرباەۆ سوڭعى جىلدارى مەملەكەتتىك قولداۋلاردىڭ ارقاسىندا مال شارۋاشىلىعىندا تۇراقتى دامۋ تەندەنتسياسى قالىپتاسىپ, اگروونەركاسىپتىك كەشەنىنە باعىتتالعان ينۆەستيتسيالار ەسەلەپ ءوسىپ جاتقانىن اتاپ ءوتتى. ماسەلەن, سوڭعى 5 جىلدا اگرارلىق سالاعا سالىنعان ينۆەستيتسيا كولەمى 27 ەسەگە ۇلعايىپ, ەكسپورتتالاتىن ءونىم تۇرلەرى 3-تەن 16-عا دەيىن ارتىپ وتىر.
«مال شارۋاشىلىعىنا تۇراقتى قولداۋلاردىڭ ارقاسىندا وبلىستا مال باسى وتكەن عاسىرداعى ەڭ كوپ بولعان 1993 جىلدان استى. سوڭعى 5 جىلدا ەت ءوندىرىسى 2,8 ەسەگە, ال, ءسۇت ءوندىرىسى 1,7 ەسەگە ارتتى. ەلباسى «اگرارلىق سەكتور – ەكونوميكانىڭ جاڭا درايۆەرىنە اينالۋى» قاجەتتىگىن ەرەكشە اتاپ كورسەتىپ, اگرارلىقتاردىڭ الدىنا ەڭبەك ونىمدىلىگىن جانە قايتا وڭدەلگەن ونىمدەردىڭ ەكسپورتىن 2,5 ەسەگە ارتتىرۋ تۋرالى ماقسات قويعانىن جاقسى بىلەسىزدەر. وسى تاپسىرمالاردى ورىنداۋ ماقساتىندا ءبىز وبلىستىڭ اۋىلشارۋاشىلىعى ونىمدەرىن وتكىزۋ رىنوكتارىنا كەشەندىك ماركەتينگتىك زەرتتەۋلەر جۇرگىزىپ, ناتيجەسىندە, وبلىستىڭ اگروونەركاسىپ كەشەنىن 2022 جىلعا دەيىن دامۋىنىڭ «اگروكارتاسى» ازىرلەنىپ, ىسكە اسىرىلۋدا. «اگروكارتا» اياسىندا اۋىل شارۋاشىلىعى ونىمدەرىن ەكسپورتتاۋ كولەمىن 2021 جىلعا قاراي 5 ەسەگە دەيىن ۇلعايتۋ جولدارىن ايقىندادىق», دەدى وبلىس اكىمى.
سلەت اياسىندا اگرارلىق سالانىڭ ەڭ ۇزدىك قىزمەتكەرلەرىن 11 نوميناتسيا بويىنشا ماراپاتتاۋ ءراسىمى ءوتتى. ءىس-شارا كونتسەرتتىك باعدارلاما مەن ۇلتتىق سپورت تۇرلەرى بويىنشا سايىستارمەن جالعاسىن تاپتى.
قىزىلوردا وبلىسى