بايقاۋ قورىتىندىسى بويىنشا ايماق باسشىسىنىڭ العىس حاتى سەمعاليەۆتەر (اتىراۋ), يماشەۆتار (جىلىوي), تۇرسىنباەۆتار (يندەر), امانباەۆتار (يساتاي), يبراەۆتار (قۇرمانعازى), دوسكەنجيەۆتەر (قىزىلقوعا), يمانعاليەۆتار (ماقات), سامالىقوۆتار (ماحامبەت) وتباسىلارىنا تاپسىرىلدى. جىلىويلىق قابدراحمانوۆتار, قىزىلقوعالىق ارالوۆتار مەن ماقاتتىق جۋليمانوۆتاردىڭ شاڭىراقتارى جۇلدەلى ءۇشىنشى ورىننىڭ تۇعىرىنان كورىندى. جاڭاباەۆتار (اتىراۋ), امانوۆتار (يساتاي), تۇسەكەنوۆتەر (ماحامبەت) وتباسىلارى ەكىنشى ورىندى جەڭىپ الدى. ال ۇلتتىق بايقاۋدىڭ وبلىستىق كەزەڭىندە قۇرمانعازىلىق باقتىگەرەەۆ پەن يندەرلىك تىلەكقابىلوۆتاردىڭ وتباسىلارى جەڭىمپاز بولىپ تانىلدى. نۇر-سۇلتان قالاسىندا وتەتىن رەسپۋبليكالىق كەزەڭگە ءوڭىر اتىنان ناقتى قاي وتباسىنىڭ باراتىنىن الداعى ۋاقىتتا ارنايى قۇرىلعان كوميسسيا انىقتايدى. جۇلدەگەر ەكى وتباسىنا دا قوستانايداعى «قاراعاي ورمانى» شيپاجايىنا جولداما بەرىلدى.
سالتاناتتى شاراعا ۇل-قىزدارىمەن, نەمەرە-شوبەرەلەرىمەن كەلگەن وتباسىلار باقىت پەن بەرەكەنىڭ ۇياسىنا اينالعان شاڭىراقتارى جايلى تاعىلىمدى اڭگىمەلەر ايتتى.باقتىگەرەەۆتەر وتباسىنىڭ التىن دىڭگەگى مەڭدىحان اعا مەن شاتتىق اپاي 53 جىلدان بەرى بىرگە عۇمىر كەشىپ كەلەدى. ايماققا ۇستازدار اۋلەتى رەتىندە تانىمال وتباسى مۇشەلەرى ءبىلىم بەرۋ سالاسىندا ەڭبەك ەتكەن. بۇگىندە التى بالاسى مەن نەمەرەلەرى دە وسى ىزگى جولدى جالعاستىرىپ وتىر.
ال ەكىنشى جۇلدەگەر ايمەكەن تىلەكقابىلوۆا – «التىن القا» يەگەرى. 8 بالاسىنان 28 نەمەرە, 16 شوبەرە سۇيگەن انا ۇرپاقتارىنىڭ ورتاسىندا مەيىرىمنىڭ شۋاعىنداي جايلى ءومىر سۇرۋدە.
ەلباسى باستاماسىمەن قولعا الىنعان «مەرەيلى وتباسى» ۇلتتىق بايقاۋى قازاق ەلىندەگى بىرلىك پەن بەرەكەگە نەگىزدەلگەن, تۇسىنىستىك پەن تاتۋلىقتى تەمىرقازىق قىلعان جاراسىمدى وتباسىلاردىڭ جارقىن ءومىرىن, باقىتتى نەكە قۇندىلىقتارىن ۇلگى ەتۋگە باعىتتالعان. ىزگى نيەتتەن تۋىنداعان يدەياعا قولداۋ كورسەتىپ, قاتىسۋشىلاردىڭ سانى دا جىل ساناپ ارتىپ كەلە جاتقانى قۋانتادى.
اتىراۋ